Sinambu II 14

1Yoasi Yoakasin bii, Isireliban sina bokon bandun wɔ̃ɔ yiruse sɔɔra Amasia, Yoasi Yudaban sina bokon bii u bandu di Yudaɔ. 2Saa ye u ban te di, wɔ̃ɔ yɛnda nɔɔbuwa u mɔ. Ma u kua wɔ̃ɔ tɛna tia sari bandu sɔɔ Yerusalɛmuɔ. Win mɛron yĩsira Yoadani Yerusalɛmugii. 3Gea u kua Yinni Gusunɔn nɔni sɔɔ, adama ya ǹ Dafidigia tura. U kuawa nge mɛ win tundo Yoasi u kua. 4U ǹ maa gunguu nìn mi ba ra bũnu yãkuru ko kɔsuke. U dera ba yãkunu mɔ̀ ma ba turare dɔ̃ɔ dokemɔ nin wɔllɔ. 5Sanam mɛ win banda dam kua, yera u win bwãabu go, be ba raa win tundo go. 6Adama u ǹ tɔn ben bibu go nge mɛ ya yorua Mɔwisin tireru sɔɔ tè sɔɔ Yinni Gusunɔ u nɛɛ, ba ǹ tundo goomɔ win biin torarun sɔ̃. Mɛya ba ǹ maa bii goomɔ win tundon torarun sɔ̃. Adama wi u tora wiya ba koo go. 7Amasia wiya, u maa Edɔmuban tabu kowobu nɔrɔbun suba wɔkuru (10.000) go wɔwa sɔɔ ye ba sokumɔ Bɔru. Taa bi sɔɔra u wuu ge ba sokumɔ Sila mwa, ma u gen yĩsiru gɔsia Yokutɛɛli. Yĩsi tera ba ka gu sokumɔ sere ka gisɔ. 8Yera u maa Yoasi Yoakasin bii, Yehun debubu sɔmɔ gɔria u nɛɛ, u seema bu yinna bu tabu ko. 9Yera Yoasi wi, u Amasia sɔ̃ɔwa u nɛɛ, sãku koru garu ta wãa Libanin guurɔ, tera ta dãa bakaru garu gɔria ta nɛɛ, a man wunɛn bii wɔndia kɛ̃ɛma u ko nɛn biin kurɔ. Yera gbeeku yɛɛ yi seewa yi da yi sãku koo te taaka yi go. 10Geema Amasia, wee tɛ̃ a Edɔmuba kamia ma a tii sue. A ǹ sinamɔ wunɛn yɛnuɔ sɛ̃ɛ? Kpa a n nuku dobu mɔ̀ wunɛn nasaran sɔ̃? Mban sɔ̃na kaa maa tii tabu kpɛ̃ɛ bi bu koo ka nun kɔ̃sa naawa kpa wunɛ ka Yudaba i kam ko. 11Adama Amasia kun win gere swaa sue. Ma Yoasi Isireliban sina boko u da u bu tabu wɔri. Ma ba yinna ba waana nɔni ka nɔni wi ka Yudaban sina boko Bɛti Semɛsiɔ, Yudaban temɔ. 12Ma Isireliba ba Yudaba kamia ba duki yakikira, ben baawure u da u wɔri win kuu bekurugirɔ. 13Isireliban sina boko Yoasi, Akasian debubu u Amasia Yudaban sina boko yoru mwa Bɛti Semɛsi mi. Yen biru u da Yerusalɛmuɔ ma u yen gbãrarun gana sura gɔm soonu nɛɛru (400) saa kɔnnɔ ge ba mɔ̀ Efaraimun di sere n ka da kɔnnɔ ge ga wãa sɔ̃ɔ yɛ̃san nɔm geu gia. 14Ma u da u wura gura, ka sii geesu ka sere gãa gee ni nu wãa Yinni Gusunɔn sãa yerɔ ka sinambun arumanin beru yerɔ. Yen biru u maa tɔmbu mɔɔru mwɛɛra. Ma u gɔsira Samariɔ. 15Ye Yoasi u kuan sukum ka wɔrugɔɔ te u sɔ̃ɔsi ka taa bi u ka Amasia Yudaban sina boko kua, ye kpuron gari yi yorua Isireliban sinambun faagin tireru sɔɔ. 16Sanam mɛ Yoasi u kpuna u gu, ba nùn sikua Samariɔ mi ba ra Isireliban sinambu sike. Ma win bii Yeroboamu u bandu kɔsire kua. 17Isireliban sina boko Yoasi, Yoakasin biin gɔɔn biru, Amasia Yoasin bii, Yudaban sina boko u maa kuawa wɔ̃ɔ wɔkura nɔɔbu. 18Ye Amasia u kuan sukum mu yorua Yudaban sinambun faagin tireru sɔɔ. 19Yera sɔ̃ɔ teeru ba nùn seesi Yerusalɛmuɔ. Ma u duka yakura u da Lakisiɔ. Adama ba nùn naa swĩi mi, ba go. 20Ma ba win goo te sua ka kɛkɛ ye dumi gawe ba ka na Yerusalɛmuɔ ba sikua win baababan sikaɔ, Dafidin wuuɔ. 21Yeniban biru Yudaba kpuro ba Asaria Amasian bii sua ba swĩi win tundon bandun sɔɔ. Saa ye sɔɔ, u mɔwa wɔ̃ɔ wɔkura nɔɔbu ka tia. 22Ye Asaria u bandu di u kpa, yera u Elati mwa ma u ye bana sɔnwa. 23Amasia Yoasin bii Yudaban sina bokon bandun wɔ̃ɔ wɔkura nɔɔbuse sɔɔra Yeroboamu Yoasin bii, Isireliban sina boko u bandu di Samariɔ. Ma u kua wɔ̃ɔ weeru ka tia. 24Kɔ̃sa u kua Yinni Gusunɔn wuswaaɔ. Yeroboamu Nɛbatin biin yira u swĩi mam mam, wi u Isireliba doke toraru sɔɔ. 25U Isireliban wusu kpuro mwɛɛra si su wãa saa Hamatin di, sɔ̃ɔ yɛ̃san nɔm geu gia sere n ka da nim wɔ̃ku bɔruguuɔ nge mɛ Yinni Gusunɔ u gerua saa win sɔmɔ Yonasi Amitain biin nɔɔn di, wi u sãa Gati Hefɛɛgii. 26Mɛya Yinni Gusunɔ u Isireliban nɔni swãaru wa ta kpã. Domi be kpurowa ba yoru dimɔ, ba ǹ maa goo mɔ wi u koo bu wɔra. 27N deema Yinni Gusunɔ u ǹ gɔ̃ru doke u ka Isireliban yĩsiru go. Yen sɔ̃na u bu faaba kua saa Yeroboamu Yoasin biin nɔman di. 28Ye Yeroboamu u kuan sukum ka wɔrugɔɔ te u sɔ̃ɔsi taa bi u kua sɔɔ, ka nge mɛ u wuu si su wãa Damasiɔ ka Hamatiɔ mwɛɛra si su raa sãa Yudabagisu, ye kpurowa ya yorua Isireliban sinambun faagin tireru sɔɔ. 29Sanam mɛ u kpuna u gu, ba nùn sikua win baababan sikaɔ mi ba ra Isireliban sinambu sike. Ma win bii Sakari u bandu kɔsire kua.

will be added

X\