Sinambu II 13

1Yoasi Akasian bii, Yudaban sina bokon bandun wɔ̃ɔ yɛnda itase sɔɔra Yoakasi, Yehun bii u bandu di Isireliba sɔɔ, Samariɔ. Yoakasi wi, u kuawa wɔ̃ɔ wɔkura nɔɔbu ka yiru ban te sɔɔ. 2Kɔ̃sa u kua Yinni Gusunɔn nɔni sɔɔ, Yeroboamu Nɛbatin biin yira u swĩi mam mam, wi u Isireliba doke toraru sɔɔ. 3Saa ye sɔɔra Yinni Gusunɔ u ka Isireliba mɔru bara too. Ma u bu Sirin sina boko Hasaɛli nɔmu bɛria ben wãaru kpuro sɔɔ n ka girari sere win bii Bɛni Hadadin waati kpuro sɔɔ. 4Yera Yoakasi u Yinni Gusunɔ somiru kana. Ma Yinni Gusunɔ u nùn wurari. Domi u wa dam mɛ Sirin sinam be, ba Isireliba dɔremɔ. 5Yera u bu faaba kowo seeya wi u bu yara nɔni swãa ten min di. Saa yera ba sina ka bɔri yɛndu ben yɛnusɔ nge yellu. 6Adama ka mɛ, ba ǹ Yeroboamun bweserun yira deri wi u Isireliba doke toraru sɔɔ. Ba wɔriwa win durum sɔɔ. Ba maa dera bũu wi ba mɔ̀ Asitaaten bwãarokunu nu gire Samariɔ. 7Yoakasin tabu kowobu sɔɔ, Yinni Gusunɔ u dera Sirin sina boko u ben dabiru go, u nama muku muku ba kua nge tua. Maasɔbu weeraakuru tɔnawa u nùn deria ka tabu kowobu nɔrɔbun suba wɔkuru (10.000) ka tabu kɛkɛ yi dumi gawe wɔkuru. 8Ye Yoakasi u kuan sukum, ka wɔrugɔɔ te u sɔ̃ɔsi, ye kpuron gari yi yorua Isireliban sinambun faagin tireru sɔɔ. 9Yeniban biru u kpuna u gu. Ma ba nùn sikua win baababan sikaɔ Samariɔ. Ma win bii Yoasi u bandu kɔsire kua. 10Yoasi Yudaban sina bokon bandun wɔ̃ɔ tɛna ka nɔɔba yiruse sɔɔra, Yoasi Yoakasin bii u bandu di Isireliba sɔɔ Samariɔ. U kuawa wɔ̃ɔ wɔkura nɔɔbu ka tia ban te sɔɔ. 11Yoasi wi, kɔ̃sa u kua Yinni Gusunɔn wuswaaɔ. Yeroboamu Nɛbatin biin yira u swĩi mam mam, wi u Isireliba doke toraru sɔɔ. 12Ye Yoasi u kuan sukum ka wɔrugɔɔ te u sɔ̃ɔsi, ka sere maa taa bi u kua ka Amasia Yudaban sina boko, ye kpuron gari yi yorua Isireliban sinambun faagin tireru sɔɔ. 13Ma u kpuna u gu, ba nùn sikua mi ba ra Isireliban sinambu sike. Ma win bii Yeroboamu u bandu kɔsire kua. 14Elisee u bara. Bara tera u ka gu. Adama u sere gbi, Yoasi Isireliban sina boko u da win mi, u swĩ win wuswaaɔ u nɛɛ, nɛn baaba! Nɛn baaba wunɛ wi a sãa Isireliban dam mɛ mu bu kɔ̃su nge ben tabu kɛkɛ dumigii ka ben maasɔbu. 15Elisee u nùn sɔ̃ɔwa u nɛɛ, a doo a tɛndu sua ka sɛ̃ɛnu. Ma u tɛn te sua ka sɛ̃ɛ ni. 16- 17U maa nùn sɔ̃ɔwa u nɛɛ, a fɛnɛnti wukio ye ya wãa sɔ̃ɔ yari yeru gia. Ma sina boko Yoasi wi, u ye wukia. Ma Elisee u maa nɛɛ, a wunɛn tɛn te suo a bɛri. Ma sina boko u tu sua u bɛri. Yera Elisee u win nɔma sɔndi sina bokogian wɔllɔ. Ma u nùn sɔ̃ɔwa u nɛɛ, a toowo. Ma u toba. Yen biru u maa sina boko Yoasi sɔ̃ɔwa u nɛɛ, nasaran sɛ̃uwa mi. Geya ga sɔ̃ɔsi ma Yinni Gusunɔ u koo bɛɛ nasara wɛ̃ Sirigibun wɔllɔ. I ko i bu gowa mam mam Afɛkiɔ. 18Elisee u kpam Yoasi sɔ̃ɔwa u nɛɛ, a sɛ̃ɛ ni suo. Ma u nu sua. Yera u nɛɛ, a ka nu tem soowo. Ma u so nɔn ita u yɔ̃ra. 19Ma Elisee u ka sina boko mɔru kua u nùn sɔ̃ɔwa u nɛɛ, kaa raa sowa nɔn nɔɔbu ǹ kun mɛ nɔn nɔɔba tia. Saa yera kaa raa Sirigii be go mam mam. Adama wee tɛ̃ nɔn ita tɔnawa kaa bu kamia. 20Yen biruwa Elisee u gu, ba nùn sikua. Yen wɔ̃ɔ ge ga swĩi sɔɔra Mɔabun tabu kowobun wuunu ganu nu ra Isireliba wɔraa nɛ. 21Yera sɔ̃ɔ teeru durɔ goo u gu Isireliban suunu sɔɔ. Ye ba nùn sikumɔ, yera ba wa wee, Mɔabuban tabu kowo wuuru gara kurama. Ma ba goo te kare Eliseen siki wɔruɔ. Ye durɔ win goo te, ta da ta Eliseen kukunu wɔri, yera durɔ wi, u kua waso. Ma u seewa u yɔ̃ra. 22Hasaɛli, Sirin sina boko u raa Isireliba dam dɔre Yoakasin wãarun tɔ̃ru kpuro sɔɔ. 23Adama Yinni Gusunɔ u bu mɛɛrima, ma u ben wɔnwɔndu wa, arukawani ye u ka Aburahamu ka Isaki ka Yakɔbu bɔkuan sɔ̃. U ǹ wure u bu biru kisi, bu kam ko. 24Hasaɛli wi, u gu. Ma win bii Bɛni Hadadi u bandu kɔsire kua. 25Saa ye sɔɔra Yoasi Yoakasin bii, u Isireliban wuu si mwɛɛra si Bɛni Hadadin tundo Hasaɛli u raa mwɛɛra tabu sɔɔ. Nɔn itawa u Bɛni Hadadi wi tabu di u ka wuu si kpuro mwɛɛra.

will be added

X\