Sinambu II 12

1- 2Yehun bandun wɔ̃ɔ nɔɔba yiruse sɔɔra Yoasi u bandu di Yerusalɛmuɔ. U mɔwa wɔ̃ɔ nɔɔba yiru saa ye sɔɔ. Ma u kua wɔ̃ɔ weeru ban te sɔɔ. Win mɛron yĩsira Sibia Beri Sebagii. 3Yoasi wi, u kuawa ye ya Yinni Gusunɔ wɛ̃re win wãaru sɔɔ. Yera u yãku kowo Yehoyadan sɔ̃ɔsiru wura. 4Adama u ǹ gunguu ni kɔsuke nìn mi ba ra bũnu sã. Domi tɔmba ra n daamɔ mi ba n bũu ni sãamɔ kpa ba n turare dɔ̃ɔ dokemɔ. 5Yoasi u dera ba Yinni Gusunɔn sãa yeru sɔnwa ma u yãku kowobu mɛnna u bu sɔ̃ɔwa u nɛɛ, bu gobi mɔɔ yi ba ka na sãa yerun sɔ̃. Yiya yi ba raa baawure bure win wãarun sɔ̃, ka sere maa yi gaba gɔ̃ru doke ba wɛ̃ ka nuku tia. 6U nɛɛ, bu yi kpuro mɔɔ begibun min di. Kpa bu yi dendi bu ka sãa yee te sɔmɛ mi ta sankira. 7Adama yãku kowo be, ba ǹ sãa yee te sɔnwa sere n ka kua sina boko Yoasin bandun wɔ̃ɔ yɛnda itase. 8Yera sina boko u yãku kowo Yehoyada ka yãku kowo be ba tie soka. Ma u bu bikia u nɛɛ, mban sɔ̃na i ǹ sãa yee te sɔnwa. Ǹ n mɛn na, i ku ra maa gobi gɛɛ mwa tɔmbun min di, bɛɛn tiin sɔ̃. Adama i ko yi deriwa i ka sãa yee te sɔmɛ. 9Ma yãku kowo be, ba gɔ̃ru doke bu ku maa tɔn ben gobi mwa, kpa bu ku maa bu sãa yee ten sɔmbun sɔmburu nɔmu sɔndia. 10Yera yãku kowo Yehoyada u kpakoro piibu gagu kua, u gu yaba wɔllɔ. Ma u da u yi yãku yerun bɔkuɔ, nɔm geu gia, Yinni Gusunɔn sãa yerun kɔnnɔwɔ. Gobi yi tɔmba ka na sãa yee ten sɔ̃, mi sɔɔra yãku kowo be ba sãa yee te kɔ̃su ba ra yi kpɛ̃ɛ. 11Bà n wa gobi yi, yi dabia kpakoro te sɔɔ, yera ba ra sunɔn tire yoro ka yãku kowo tɔnwero sokusie bu yi gura bu gari. 12Kpa bu yi be ba koo sãa yee ten sɔmburu ko nɔma bɛria. Yiya ba ka dãa dãkobu kɔsia, ka nɔman sɔm kowobu, 13ka banɔbu, ka be ba kpenu dãkumɔ. Yi sɔɔra ba ka maa dãa dwa ka kpenu ka gãa ni ba koo ka sãa yee te sɔmɛ kpuro gesi. 14Adama baa yin gɛɛ, ba ǹ ka sãa yee ten dendi yãnu dwa nge gbɛ̃a ye ba kua ka sii geesu ǹ kun mɛ wobunu, ǹ kun mɛ nɔri, ǹ kun mɛ kɔbi, ǹ kun mɛ dendi yãa ni ba kua ka wura, ǹ kun mɛ ka sii geesu. 15Be ba sɔmbu te mɔ̀, beya ba yi wɛ̃ ba ka sãa yee te sɔnwa. 16Ba ku ra bu bikie nge mɛ ba ka gobi yi dendisinamɔ. Domi ba ye kpuro mɔ̀wa dee dee. 17Gobi yi ba ra wɛ̃ yaa saberun ayerɔ, torarun yãkurun sɔ̃ ba ku ra yi yi Yinni Gusunɔn sãa yerun sɔ̃. Yiya yi ra ko yãku kowogii. 18Saa ye sɔɔra Sirin sina boko Hasaɛli u Gati wɔri. Ma u ye mwa. Yen biru u gɔ̃ru doke u da u Yerusalɛmu mwa. 19Yera Yoasi Yudan sina boko u yãa geenu gura ni win tii u yi Yinni Gusunɔn sɔ̃, ka sere ni win baababa Yosafati ka Yoramu ka Akasia ba yi, ka maa wura ye ya wãa Yinni Gusunɔn arumanin beru yerɔ, ka sere ye ya wãa sina kpaarɔ. Ye kpurowa u sua u Hasaɛli Sirin sina boko mɔrisia. Ma Hasaɛli wi, u ǹ maa Yerusalɛmu wɔri. 20Ye Yoasi u kuan sukum mu yorua Yudan sinambun faagin tireru sɔɔ. 21- 22N deema win bwãabu Yosakaa Simɛatin bii, ka Yosabadi Somɛɛn bii, beya ba nùn seesi ba go Milon dirɔ Silan wɔwaɔ. Ma ba nùn sikua win baababan sikaɔ Dafidin wuuɔ. Ma win bii Amasia u bandu kɔsire kua.

will be added

X\