Bandun Gari II 36

1Tɔmba Yoakasi, Yosiasin bii sua ma ba nùn kua sunɔ win tundon ayerɔ Yerusalɛmuɔ. 2Yoakasi u mɔwa wɔ̃ɔ yɛnda ita sanam mɛ u bandu di Yudaɔ. Ma u kua suru ita ban te sɔɔ Yerusalɛmuɔ. 3Egibitin sunɔwa u nùn bandu yara. Ma u win tɔmbu sii geesun tɔnnu ita ka wuran kilo tɛna bure bu kɔsia wɔ̃ɔ ka wɔ̃ɔ. 4Yen biruwa u Yoakasi win wɔnɔ, Eliakimu sua u kɔsire kua bandu sɔɔ. Ma u nùn yĩsi kpaaru kã Yoyakimu. Ma u Yoakasi sua u ka da Egibitiɔ. 5Yoyakimu u mɔwa wɔ̃ɔ yɛnda nɔɔbu sanam mɛ u bandu di Yudaɔ, ma u kua wɔ̃ɔ wɔkura tia bandu sɔɔ. Kɔ̃sa u kua Gusunɔ win Yinnin nɔni sɔɔ. 6Yera sɔ̃ɔ teeru Babilonin sina boko, Nɛbukanɛsaa u na u Yoyakimu tabu wɔri. Ma u nùn mwa u bɔkua ka sii gandun yɔni u ka da Babiloniɔ. 7Nɛbukanɛsaa u Yinni Gusunɔn sãa yerun dendi yãnu gura u ka da u yi win sina kpaarɔ. 8Ye Yoyakimu u kuan sukum ka kɔ̃sa ye u kua, ye kpuron gari yi yorua Isireliba ka Yudaban sinambun faagin tireru sɔɔ. Yen biru, win bii Yoyakiniwa u bandu kɔsire kua. 9Wɔ̃ɔ nɔɔba itawa Yoyakini u mɔ saa ye u bandu di. Ma u kua suru ita ka sɔ̃ɔ wɔkuru ban te sɔɔ Yerusalɛmuɔ. Kɔ̃sa u kua Yinni Gusunɔn nɔni sɔɔ. 10Ye n kua wɔ̃ɔ kpɔɔ, yera Nɛbukanɛsaa Babilonin sina boko u na u Yoyakini mwa u ka da Babiloniɔ. Ma u Yinni Gusunɔn sãa yerun dendi yãnu ganu gura. Ma u Yoyakinin baa yãkabu Sedesiasi kua sunɔ Yudaban suunu sɔɔ Yerusalɛmuɔ. 11Sedesiasi u mɔwa wɔ̃ɔ yɛnda tia sanam mɛ u bandu di Yudaɔ. Ma u kua wɔ̃ɔ wɔkura tia ban te sɔɔ Yerusalɛmuɔ. 12Kɔ̃sa u kua Gusunɔ win Yinnin wuswaaɔ. U ǹ tii kawe Gusunɔn sɔmɔ Yeremin wuswaaɔ wi u ra nùn Yinni Gusunɔn gari sɔ̃. 13U swaa taaya, ma u gɔ̃ru bɔbia. U ǹ win gɔ̃ru wesie Gusunɔ Isireliban Yinnin mi gia. U mam Nɛbukanɛsaa seesiwa wi u nùn bɔ̃rusia ka Yinni Gusunɔn yĩsiru sanam mɛ ba arukawani bɔkumɔ. 14Yãku kowobun wirugibu ka Yuda be ba tie kpuro ba kɔ̃sa kua ya kpã. Domi ba tɔn tukobun komanu swĩi. Ma ba Yinni Gusunɔn sãa yeru disi doke te u gɔsa Yerusalɛmuɔ. 15N deema Gusunɔ ben baababan Yinni wi, u bu kirɔ kua yee yellun di saa win sɔmɔbun min di. Domi u kĩ u win tɔmbu ka win sãa yee te faaba ko. 16Adama ba Yinni Gusunɔn sɔmɔ be yɛ̃ɛ ba yaakoru koosi. Ba ben gari atafiiru kua sere Yinni Gusunɔn tii u ka bu mɔru kua ye ba ǹ kpɛ̃ bu suresia. 17Yera Yinni Gusunɔ u dera Nɛbukanɛsaa, Babilonin sina boko u bu tabu wɔri, ma u ben aluwaasiba takobinu sɔkura u go ben sãa yerɔ. U ǹ goo deri, aluwaasiba ka wɔndiaba ka durɔ tɔkɔnu. Be kpurowa Yinni Gusunɔ u bɛri win nɔmaɔ. 18Nɛbukanɛsaa u Yinni Gusunɔn sãa yerun arumani gura baka ka piibu ka ben sina kpaarun arumani ka sina bokon tiigia ka sere maa win sina bwãabugia. 19Ma ba Yinni Gusunɔn sãa yeru ka Yerusalɛmun dii geenu dɔ̃ɔ sɔka. Ma ba yen gãa geenu kɔsuka. Ma ba yen gbãraru sura. 20Nɛbukanɛsaa u be ba ǹ go tabu sɔɔ gura u ka da Babiloniɔ. Ma ba kua wi ka win bibun yobu sere Pɛɛsiba ba ka bandu di. 21Nge mɛya Yinni Gusunɔn gari yi ka koora yi win sɔmɔ Yeremi u raa gerua u nɛɛ, ba koo Yudaba yoru mwa kpa tem mɛ, mu wa mu sanam wɛ̃ragim di kpa mu wɛ̃ra sere wɔ̃ɔ wata ka wɔkuru, wahala ye mu raa wan sɔ̃. 22Sirusi, Pɛɛsin sina bokon bandun wɔ̃ɔ gbiikuu sɔɔ, yera Yinni Gusunɔ u gɔ̃ru doke u win gari yibia yi u raa gerua saa win gɔro Yeremin nɔɔn di. Ma u doke Sirusin gɔ̃ruɔ bu ka gari yini yore. Ma ba yi kpara win tem kpuro sɔɔ. 23Yi nɛɛ, amɛniwa Sirusi, Pɛɛsin sina boko u gerua. U nɛɛ, Gusunɔ Wɔrukoo u man handunian bannu kpuro wɛ̃. Ma u man yiire n nùn sãa yeru bania Yerusalɛmuɔ Yudaban temɔ. Yen sɔ̃, be ba sãa Isireliba kpuro bu wuro Yerusalɛmuɔ kpa Gusunɔ ben Yinni u n ka bu wãa.

will be added

X\