Bandun Gari II 30

1Esekiasi u sɔmɔbu gɔra Isireliɔ ka Yudaɔ. N deema u raa Efaraimuba ka Manaseba tireru yorua bu ka na bu Gɔɔ sararibun tɔ̃ɔ bakaru di Gusunɔ, be Isireliban Yinnin sãa yerɔ, Yerusalɛmuɔ. 2Sina boko Esekiasi ka win sina asakpɔbu ka Yudaba ba nɔɔsina ma ba koo Gɔɔ sararibun tɔ̃ɔ baka te di wɔ̃ɔn suru yiruse sɔɔ. 3Domi ba ǹ kpɛ̃ bu tu di ten saa sɔɔ yèn sɔ̃ yãku kowo dabiru ta ǹ tii dɛɛrasie. Mɛya tɔn dabira kun maa mɛnnɛ Yerusalɛmuɔ. 4Sina boko ka tɔn be kpuro ba tɔ̃ɔ te wura. 5Ma ba dera ba kpara Isirelin tem kpuro sɔɔ saa Beri Seban di n ka da sere Danuɔ, tɔmbu bu ka na Yerusalɛmuɔ bu Gusunɔ Isireliban Yinni Gɔɔ sararibun tɔ̃ɔ baka te diiya. Domi tɔn dabiru ta ku ra raa maa tu di nge mɛ ba yorua bu ko. 6Ma gɔro be, ba sina boko ka win sina asakpɔbun tire ni sua ba ka da Isireliɔ ka Yudaɔ. Ma ba bu sɔ̃ɔwa ka sina bokon yĩsiru ba nɛɛ, bɛɛ Isireliba, i wurama Gusunɔ Aburahamu ka Isaki ka Yakɔbun Yinnin mi, kpa win tii u maa wurama bɛɛn mi. I de i wurama bɛɛ be i kisira Asirin sina bokon nɔman di. 7I ku bɛɛn baababa ka bɛɛn maabu saari be ba ǹ Gusunɔ ben baababan Yinni mɛm nɔɔwɛ, ma u bu kam koosia nge mɛ i waamɔ gisɔ. 8I ku swaa taaya nge bɛɛn baababa. I wurama Yinni Gusunɔn mi. I na i nùn sã win sãa yerɔ te u tii yiiye sere ka baadomma. I na i Gusunɔ bɛɛn Yinni sã kpa win mɔru baka ye, yu bɛɛ doonari. 9Ì n wurama Yinni Gusunɔn mi, bɛɛn tɔmbu ka bɛɛn bii be ba mwɛɛra ba ka yoru da, ba koo bu wɔnwɔndu kua kpa bu den de bu wurama tem mɛ sɔɔ. Domi Gusunɔ bɛɛn Yinni u ra suuru ko. Win wɔnwɔnda kpã. U ǹ maa bɛɛ biru kisimɔ ì n wurama win mi. 10Nge mɛya gɔro be, ba gerumɔ ba ka wusu gasirimɔ saa Efaraimun tem di ka Manasen temɔ n ka girari Sabulonin temɔ. Ma ba bu yɛ̃ɛmɔ ba yaakoru koosimɔ. 11Adama gaba tii kawa Asɛɛn temɔ ka Manasen temɔ ka Sabulonin temɔ, ma ba seema ba na Yerusalɛmuɔ. 12Mɛya maa Yinni Gusunɔ u ka Yudaba wãa. Ma u dera ben gɔ̃ru ga kua tia bu ka sina boko ka win sina asakpɔbun gari mɛm nɔɔwa nge mɛ wi, Yinni Gusunɔ u gerua. 13Tɔn dabiru ta mɛnna wɔ̃ɔn suru yiruse sɔɔ Yerusalɛmuɔ bu ka pɛ̃ɛ ye ba kun seeyatia doken tɔ̃ɔ bakaru ko. Dɔma te, tɔn be, ba dabia. 14Yera ba seewa ba bũu yãku yee ni nu wãa Yerusalɛmuɔ kɔsuka ka sere mi ba ra nu turare dɔ̃ɔ dokeye. Ma ba ye kpuro gura ba sure wɔwaɔ ye ba mɔ̀ Sedoroni. 15Yen biru, ba Gɔɔ sararibun tɔ̃ɔ bakarun yãku yaa sakira wɔ̃ɔn suru yirusen sɔ̃ɔ wɔkura nnɛse sɔɔ. Sekura yãku kowobu ka Lefiba mwa, ma ba tii dɛɛrasia. Ba yãku dɔ̃ɔ mwaararuginu kua Yinni Gusunɔn sãa yerɔ. 16Ben baawure u da u wãa win ayerɔ nge mɛ Mɔwisi Yinni Gusunɔn tɔnu u yorua woodan tireru sɔɔ. Ma yãku kowobu ba yɛm yɛ̃kamɔ mɛ Lefiba ba bu wɛ̃ɛmɔ. 17Nge mɛ tɔn dabira wãa be ba ǹ tii dɛɛrasie dɔma te, yera n dera Lefiba ba bu yãku yɛɛ yi sakiriammɛ, kpa bu ka yi dɛɛrasia bu yi nɛnɛm Yinni Gusunɔn sɔ̃. 18- 19Tɔn dabiru ta wãa te ta ǹ tii dɛɛrasie, n mam nɛɛre Efaraimuba sɔɔ ka Manaseba sɔɔ ka Isakariba sɔɔ ka sere Sabuloniba sɔɔ. Ba Gɔɔ sararibun tɔ̃ɔ bakaru di. Adama ba ǹ ten wooda swĩi. Yen sɔ̃na Esekiasi u bu kanaru kua u nɛɛ, Yinni Gusunɔ, wunɛ tɔn geowa. Be ba tii wɛ̃ ka ben gɔ̃ru kpuro ba ka wunɛ Gusunɔ ben baababan Yinni kasu, baa mɛ ba ǹ tii dɛɛrasie, a bu suuru kuo. 20Yinni Gusunɔ u Esekiasin kana te mwa ma u tɔn be suuru kua. 21Nge mɛya Isireli be ba mɛnna Yerusalɛmuɔ, ba ka pɛ̃ɛ ye ba kun seeyatia doken tɔ̃ɔ bakaru di sɔ̃ɔ nɔɔba yiru ka nuku dobu. Tɔ̃ɔ baatere yãku kowobu ka Lefiba ba ra n Yinni Gusunɔ siaramɔwa ka dwee yãnu. 22Esekiasi u Lefi baawure siara sɔmbu te u kuan sɔ̃ Yinni Gusunɔn sɔ̃. Ba yãku yaa ye tema sɔ̃ɔ nɔɔba yiru. Ma ba siarabun yãkunu kua ba ka Gusunɔ ben baababan Yinni siara. 23Yen biru, tɔn be, ba maa wura bu tɔ̃ɔ bakaru di sɔ̃ɔ nɔɔba yiru. Ma ba maa sina sɔ̃ɔ nɔɔba yiru ba tɔ̃ɔ bakaru di ka nuku dobu. 24Domi Esekiasi u kɛtɛ kinɛnu nɔrɔbu (1.000) gɔsa ka yãanu nɔrɔbun suba nɔɔba yiru (7.000). Ma win sina asakpɔbu ba maa kɛtɛ kinɛnu nɔrɔbu gɔsa ka yãanu nɔrɔbun suba wɔkuru (10.000). Ma yãku kowobu dabinu ba tii dɛɛrasia. 25Yudaba kpuro ka yãku kowobu ka Lefiba ka sere be ba na Isirelin di ka sɔbu be ba wãa Isireliɔ ka Yudaɔ, be kpurowa ba nuku dobu kua dɔma te. 26Nuku doo bakabu bu wãa Yerusalɛmuɔ. Saa Salomɔɔ Dafidi Isireliban sina bokon biin waatin di, ba ǹ tɔ̃ɔ baka ten bweseru koore Yerusalɛmuɔ. 27Yera yãku kowobu ka Lefiba ba seewa ba tɔn be domaru kua. Yinni Gusunɔ u ben nɔɔ nua domi ben kana te, ta nùn girari sere win wãa yee dɛɛrarɔ wɔllɔ.

will be added

X\