Bandun Gari II 28

1Akasi u mɔwa wɔ̃ɔ yɛndu sanam mɛ u bandu di. U kuawa wɔ̃ɔ wɔkura nɔɔbu ka tia bandu sɔɔ Yerusalɛmuɔ. U ǹ sĩa dee dee Yinni Gusunɔn wuswaaɔ. U ǹ win sikado Dafidin yira swĩi. 2Isireliban sinambun yira u swĩi. U mam bũu wi ba mɔ̀ Baalin bwãaroku sii ganduguu kua. 3U turare dɔ̃ɔ doke Hinɔmun bibun bweserun wɔwaɔ. Ma u ka win tiin bibu yãku dɔ̃ɔ mwaararuginu kua nge mɛ bwese tukunu nu ra ko ni Yinni Gusunɔ u gira Isireliban wuswaan di. 4U ra bũu yãkunu ko kpa u nu turare dɔ̃ɔ dokea gungunɔ ka guunɔ ka sere dãa kubenɔ. 5Gusunɔ wi, Akasin Yinni u nùn Sirin sina boko nɔmu bɛria. Ma ba nùn kamia ba win tɔn dabinu mwɛɛra ba ka da Damasiɔ. Yen biru, Gusunɔ u maa nùn bɛri Isireliban nɔmaɔ. Ma Isireli be, ba nùn kamia. 6Peka, Remalian bii, u tɔmbu nɔrɔbun suba wunaa teeru (120.000) go sɔ̃ɔ teerun sɔ̃ɔ, yèn sɔ̃ ba Gusunɔ ben baababan Yinni deri. Tɔn be ba go mi, be kpuro ba sãawa tabu durɔ wɔrugɔba. 7Sikiri, Efaraimuban tabu durɔ u Maaseya, sina bokon bii go ka Asirikamu wi u sãa sina bokon yɛnun sɔm kowobun wirugii ka sere Ɛlikana sina bokon sina asakpɔ gbiikoo. 8Isireliba ba ben mɛro bisibu Yudaba yoru mwa tɔmbu nɔrɔbun suba goobu (200.000), kurɔbu ka bibu. Ma ba ben yãa dabinu gura ba ka da Samariɔ. 9N deema Yinni Gusunɔn sɔmɔ goo u wãa mi. Win yĩsira Odɛdi. Yera u tabu kowo be sennɔ da. U nɛɛ, wee Gusunɔ bɛɛn baababan Yinni u ka Yudaba mɔru kua, ma u bɛɛ bu nɔmu bɛria, ma i bu go ka wɔnwɔndu sariru sere ben wuri yi nùn girari. 10Yera i kĩ tɛ̃, Yuda be, ka Yerusalɛmugii be, bu ko bɛɛn yobu? I ǹ tamaa i Gusunɔ bɛɛn Yinni torari? 11I swaa dakio i nɔ. I yoo be i mwɛɛra bɛɛn mɛro bisibu sɔɔ mi yɔ̃suo bu wura ben yɛnusɔ. Domi Yinni Gusunɔ u ka bɛɛ mɔru baka mɔ̀. 12Efaraimuban wirugibu gabu, Asaria, Yokananin bii ka Berekia, Mɛsilemɔtun bii ka Esekiasi, Salumun bii ka Amasa, Adilain bii, bera ba tabu kowobu seesi be ba wee tabu gberun di. 13Ba bu sɔ̃ɔwa ba nɛɛ, i ǹ ka yoo be duɔ mini. I kĩ i bɛsɛn taarɛ sosiwa Yinni Gusunɔn mi. Domi sa tore kɔ. Ma Yinni Gusunɔ u ka sun mɔru sãa. 14Yera tabu kowo be, ba yoo be yɔ̃su, ba bu ben yãnu wesia Isireliba ka ben wirugibun wuswaaɔ. 15Wirugii be ba soka ka ben yĩsa ba yoo be sua, ba ben be ba wãa tereru yãnu dokea ni tabu kowoba mwɛɛrima. Ba bu yãnu ka baranu wɛ̃. Ba dera ba di ma ba nɔra. Ma ba ben mɛɛran bosu bɔkua. Ma ba yoo be sɔɔ be ba kun kpɛ̃ bu sĩ kɛtɛkunu sɔndi ba ka da Yerikoɔ mi kpakpa bɛ̃ɛ wãa. Yen biru, Isireli be ba ka bu da ba wurama Samariɔ. 16Saa ye sɔɔra sina boko Akasi u gɔra Asirin sinambun mi, u bu somiru kana. 17Edɔmuba ba na ba kpam Yudaba wɔri ba kamia, ma ba Yuda be, yoru mwɛɛra ba ka doona. 18Filisitiba ba wɔraa na wuu si su wãa Sefalan wɔwaɔ ka si su wãa Yudan tem sɔ̃ɔ yɛ̃san nɔm dwaru gia. Ma ba Bɛti Semɛsi ka Ayaloni mwa ka Gederɔtu ka Soko ka yen baru kpaanu ka Tinna ka yen baru kpaanu ka Gimuso ka yen baru kpaanu. Ma ba sina wuu si sɔɔ. 19Domi Yinni Gusunɔ u Yudaba sekuru doke ben sina boko Akasin sɔ̃. Akasi wi, u kom bɛrɛtɛkɛ kuawa Yudaɔ, u Yinni Gusunɔ mɛm nɔɔbu sariru koosiwa mam mam. 20Ma Asirin sina boko Tigilati Pilesɛɛ u na u nùn wɔri nge yibɛrɛ. U ǹ nùn somi. 21Domi Akasi u Yinni Gusunɔn sãa yeru ka sina kpaaru ka win tem wirugibun arumani gura u Asirin sina boko wɛ̃. Adama ka mɛ, yen gaa kun nùn yare. 22Sanam mɛ u wãa nuku sankiranu sɔɔ, ka mɛ, u Yinni Gusunɔ mɛm nɔɔbu sariru koosimɔwa u dɔɔ. 23U Damasin bũnu yãkuru kua ni nu nùn kamia mi. Domi u nɛɛ, wee Sirin sina bokon bũnu nu ra bu somi. Tɛ̃, win tii u koo maa nu yãkuru kua kpa nu wa nu nùn somi. Adama nu ǹ nùn somi. Nu nùn kam kuawa wi ka Isireliba kpuro. 24Akasi u Yinni Gusunɔn sãa yerun dendi yãnu kpaasina u kɔsuka. Ma u dera ba tu kɛnua. Ma u bũu yãku yenu kua beri berika kpuro Yerusalɛmuɔ. 25Yera u gungunu kua Yudan wusu kpuro sɔɔ bu ka bũnu yãkuru kua kpa bu maa nu turare dɔ̃ɔ dokea mi. Nge mɛya u kua u ka Gusunɔ win baababan Yinnin mɔru seeya. 26Akasin kookoosun sukum gbiikisu ka dãakisu si kpuro su yorua Yudaba ka Isireliban sinambun faagin tireru sɔɔ. 27Yen biru, Akasi u kpuna u gu, ma ba nùn sikua Yerusalɛmuɔ. Adama ba ǹ nùn sikua Isireliban sinambun sikaɔ. Yen biru, win bii Esekiasi u bandu kɔsire kua.

will be added

X\