Bandun Gari II 27

1Wɔ̃ɔ yɛnda nɔɔbuwa Yotamu u mɔ sanam mɛ u bandu di. Ma u kua wɔ̃ɔ wɔkura nɔɔbu ka tia bandu sɔɔ Yerusalɛmuɔ. Win mɛron yĩsira Yerusa, Sadɔkun bii. 2U sĩawa dee dee Yinni Gusunɔn wuswaaɔ. Win tundo Osiasin yira u swĩi mam mam. Adama u ǹ due Yinni Gusunɔn sãa yerɔ. Yen biru, u dera tɔmba sankiramɔ win tem mɛ sɔɔ. 3Wiya u Yinni Gusunɔn sãa yerun kɔnnɔ ge ga wãa gunguru gia bana. Ma u maa bani dabinu kua Ofɛlin gbãrarɔ. 4U wusu bana Yudan guunɔ. Ma u maa kɔ̃su maru yenu kua ka dii baka damginu yakasɔ. 5U maa ka Amɔniba tabu kua, ma u bu kamia. Wɔ̃ɔ ge sɔɔ, Amɔniba ba nùn sii geesun gobi wunɔbu (100) wɛ̃ ka dĩa bimi yi ba mɔ̀ ɔɔsun tɔnnu nɔrɔbun suba ita (3.000) ka alikaman tɔnnu nɔrɔbun suba ita. Nge mɛya ba mɔ̀ sere n ka girari wɔ̃ɔ ita. 6Yotamu u dam kua. Domi u win naanɛ doke Yinni Gusunɔ sɔɔ. 7Ye Yotamu u kuan sukum, win tabu ka win sɔma ye u kua, ye kpuron gari yorua Isireliba ka Yudaban sinambun faagin tireru sɔɔ. 8Yotamu u mɔwa wɔ̃ɔ yɛnda nɔɔbu sanam mɛ u kua sina boko. Ma u kua wɔ̃ɔ wɔkura nɔɔbu ka tia ban te sɔɔ Yerusalɛmuɔ. 9Yen biru, u kpuna u gu. Ma ba nùn sikua Dafidin wuuɔ. Ma win bii Akasi u bandu kɔsire kua.

will be added

X\