1 Yeniban biru, Yosafati u kpuna u gu. Ma ba nùn sika win baababan sikaɔ, Dafidin wuuɔ. Ma win bii Yoramu u bandu kɔsire kua. 2 Yoramu u wɔnɔbu mɔwa nɔɔba tia. Be kpuro ba sãawa Yosafatin bibu. Bera Asaria ka Yeyɛli ka Sakari ka Asaria ka Mikaɛli ka Sefatia. 3 Ben tundo u ben baawure kɛ̃ru wɛ̃ ta kpã. Tera sii geesu ka wura ka gãa gobiginu ka wuu si su gbãranu mɔ Yudan temɔ. Adama Yoramuwa u bandu wɛ̃ domi wiya u sãa win bii gbiikoo. 4 Sanam mɛ Yoramu u ban te di u kpa, ma u tu tãsisia, yera u win wɔnɔ be kpuro ka Isireliban bukurobu gabu go. 5 Sanam mɛ Yoramu u ban te di, u mɔwa wɔ̃ɔ tɛna ka yiru. Ma u kua wɔ̃ɔ nɔɔba ita bandu sɔɔ Yerusalɛmuɔ. 6 Isireliban sinambun yira u swĩi nge mɛ Akabun yɛnugibu ba kua. Domi Akabun bii tɔn kurɔwa u sua kurɔ. Kɔ̃sa u kua Yinni Gusunɔn wuswaaɔ. 7 Adama Yinni Gusunɔ u ǹ wure u nùn go, arukawani ye u ka Dafidi bɔkuan sɔ̃ ye u nɛɛ, Dafidi kun kɔsire biamɔ bandu sɔɔ win bweserɔ. 8 Yoramun waati ye sɔɔ, Edɔmuba ba ka tii yina, ma ba ben sunɔ kua. 9 Yera Yoramu u seewa ka win tabu sinambu ka tabu kɛkɛ yi dumi gawe, ma ba bu tarusi. Adama, ye n kua wɔ̃kuru, ma ba duki yakura. 10 Saa yen dɔma ten diya Edɔmuba ba ka tii yinɛ sere ka gisɔn gisɔ. Ma Libinagibu ba maa Yudaba seesi yèn sɔ̃ ba Gusunɔ ben baababan Yinni deri. 11 Yoramu u mam bũu yãku yenu kua Yudaban guunu wɔllɔ. Ma u dera ba bũu gasirinu wɔri. U bu bɔriewa ni sɔɔ mam mam. 12 Yera Gusunɔn sɔmɔ Eli u nùn yorua u nɛɛ, amɛniwa Gusunɔ wunɛn baaba Dafidin Yinni u gerua. U nɛɛ, wee, a ǹ sĩa wunɛn baababa Yosafati ka Asa, Yudaban sinambun yira sɔɔ. 13 Isireliban sinambun yira sɔɔra a sĩa. Ma a dera Yudaba ka Yerusalɛmugibu kpuro ba bũu gasirinu wɔri nge mɛ Akabun yɛnugibu ba dera Isireliba ba kua. Yen biru, a maa wunɛn wɔnɔbu mwɛɛra a go, be, be ba nun sanɔ kere wunɛn tundon yɛnuɔ. 14 Yen sɔ̃, Yinni Gusunɔ u koo wunɛn tɔmbu wahala baka doke, ka wunɛn kurɔbu ka wunɛn bibu ka sere maa bɛɛn arumani ye i mɔ. 15 Kpa u wunɛn tii bara bakaru kpɛ̃ɛ nuki sɔɔ. Kpa ta n kpɛ̃amɔ tɔ̃ɔ baatere sere tu ka wunɛn nuki yarama tɔɔwɔ. 16 Yera Yinni Gusunɔ u Filisitiba seeya ka Daarububa be ba wãa Kusigibun bɔkuɔ. Ma ba Yoramu wɔri. 17 Yera ba Yudaba wɔri ba ben dukiaba mwɛɛra ye ya wãa sina bokon yɛnuɔ ka maa win bibu ka win kurɔbu ba ka doona. Win bii dãako Akasiawa ba deri, wi ba maa mɔ̀ Yoakasi. 18 Yeniban biru, Yinni Gusunɔ u sina bokon tii bararu kpɛ̃ɛ nukurɔ te u ǹ bɛkuramɔ. 19 Ma win bara te, ta sosimɔ tɔ̃ɔ baatere. Bara ten wɔ̃ɔ yiruse sɔɔra win nuki yarima ten wahalan sɔ̃. Ma u gu nɔni swãa bakaru sɔɔ. Win tɔmbu ba ǹ nùn turare dɔ̃ɔ dokeye nge mɛ u win baababa kua. 20 Yoramu u mɔwa wɔ̃ɔ tɛna ka yiru sanam mɛ u bandu di. Ma u kua wɔ̃ɔ nɔɔba ita bandu sɔɔ Yerusalɛmuɔ. Ye u gu, goo kun nùn wɔnwɔndu kue. Ma ba nùn sikua Dafidin wuuɔ. Adama n ǹ mɔ sinambun sikaɔ.
