Bandun Gari II 14

1Asa u sĩa dee dee Gusunɔ win Yinnin wuswaaɔ. 2U bũu yãku yenu ka gungunu ka bwãarokunu kɔsuka. 3U Yudaba sɔ̃ɔwa u nɛɛ, bu Gusunɔ ben baababan Yinni kasuo, kpa bu win yiirebu ka win woodaba mɛm nɔɔwa. 4U bwãaroku ka gungunu mi ba ra bũnu sã kpuro kɔsuka. Ma win banda wãa bɔri yɛndu sɔɔ. 5U dera ba wuu gbãranugisu seeya. Win bandu sɔɔ, tabu sari. Bɔri yɛnda ta wãa, domi Yinni Gusunɔ u dera u wɛ̃ra. 6Asa u maa Yudaba sɔ̃ɔwa u nɛɛ, su wuu si sɔmɛ su si gbãranu ka kɔ̃su yenu toosi kpa su sin kɔnnɔsun gamboba kɔkɔrɔba doke, domi tem mɛ, mu sãawa bɛsɛgim. Mɛya sa Gusunɔ bɛsɛn Yinni kasu ma u sun wɛ̃rabu wɛ̃ beri berika kpuro. Ma ba kpĩa ba wuu si sɔnwa. 7Asa u tabu kowobu nɔrɔbun suba gooba wunɔbu (300.000) mɔ Yudaba sɔɔ be ba tɛrɛnu ka yaasi mɔ. Bɛnyamɛɛba sɔɔ maa, tɔmbu nɔrɔbun suba goobu ka wɛnɛ (280.000) be ba tɛrɛnu nɛni ma ba tɛn toobu yɛ̃. Be kpuro ba sãawa tabu durɔ damgibu. 8Yera Seraki, Etiopigii u Yudaba wɔrim wee. Ma u tunuma Maresaɔ ka win tabu kowobu nɔrɔbun suba nɔrɔbu (1.000.000), ka tabu kɛkɛ yi dumi gawe gooba wunɔbu (300). 9Ma Asa u seema u ka nùn yinna wɔwa ye ba mɔ̀ Sefataɔ, Maresan bɔkuɔ. 10Ma Asa u Gusunɔ win Yinni kana u nɛɛ, Yinni Gusunɔ, wunɛ turowa kaa kpĩ a damgii ǹ kun mɛ dam sarirugii somiru na. Yen sɔ̃, a na a sun somi. Domi wunɛ sɔɔra sa tãsa. Mɛya ka wunɛn yĩsira sa ka tɔn dabi teni wɔrim na. Gusunɔ bɛsɛn Yinni, a ku de tɔnu u nasara wa wunɛn wɔllɔ. 11Ma Yinni Gusunɔ u dera Asa ka Yudaba ba Etiopigibu kamia, ba duki yarina Yudaban wuswaan di. 12Ma Asa ka wigibu ba bu naa gira sere Geraɔ. Ma Etiopigii be, ba wɔruka ba gu. Domi Yinni Gusunɔ ka win tabu kowoba ba Etiopigii be kam koosia. Yen dɔma te, Yudaba ba yãnu gurawa too. 13Asa ka win tɔmbu ba wuu si su wãa Geraɔ wɔri ba kɔsuka. Ma ba dukia baka gura. Domi sin tɔmba Yinni Gusunɔn bɛrum kua ba nanda. 14Ba be ba yaa sabenu kɔ̃sun kuu bekunuginu kasuka. Ma ba yãanu ka yooyoosu mwɛɛra dabi dabinu. Yen biru, ba gɔsira ba wura Yerusalɛmuɔ.

will be added

X\