Bandun Gari II 13

1Yeroboamun bandun wɔ̃ɔ wɔkura nɔɔbu ka itase sɔɔra Abia u bandu di Yudaɔ. 2U bandu diwa wɔ̃ɔ ita Yerusalɛmuɔ. Win mɛron yĩsira Maaka, Uriɛli, Gibeagiin bii. Abia ka Yeroboamu ba tabu kuawa ben wãaru kpuro sɔɔ. 3Abia u tabu kowo damgibu sua nɔrɔbun suba nɛɛru (400.000) u ka Yeroboamu wɔri. Ma Yeroboamu u maa tabu durɔ damgibu sua nɔrɔbun suba nɛnɛ (800.000) u bu sure. 4Yera Abia u seewa u nɔɔgiru sua saa guu te ba mɔ̀ Semaraimun di. Guu te, ta sãawa Efaraimun guurun bee tia. U nɛɛ, Yeroboamu, wunɛ ka Isireliba, i man swaa dakio i nɔ. 5I ǹ yɛ̃ ma Dafidi ka win bibun bwesera Gusunɔ Isireliban Yinni u bandu wɛ̃ Isireliba kpuro sɔɔ? U maa nɛɛ, u ǹ arukawani ye kusiamɔ. 6Adama Yeroboamu, Nɛbatin bii, Salomɔɔ, Dafidin biin sɔm kowo u win yinni seesi. 7N deema garu koo saribara ba mɛnna ba na wi Yeroboamun mi. Ma ba Roboamu kamia. Roboamu u sãawa aluwaasi. U ku ra gãanu ko ka toro sindu. Ma u kpana u yɔ̃ra dim dim ben wuswaaɔ. 8Tɛ̃, i tamaa i ko i ka ban te yina te Yinni Gusunɔ u Dafidin bibun bweseru nɔɔ mwɛɛru kua. Geema i dabi too. Ma i kɛtɛn bwãarokunu mɔ ni Yeroboamu u bɛɛ kua ka wura nu n sãa bɛɛn yinnibu. 9Ma i Yinni Gusunɔn yãku kowobu Aronin bibu ka sere Lefiba yina. Ma i tii yãku kowo kpaobu kua nge bwese tukunu. Wi u gesi seewa u ka naa kpɛma ka yãa kinɛnu nɔɔba yiru na, wiya ba ra ko bwãaroku nin yãku kowo, ni, ni nu ǹ sãa Gusunɔ. 10Adama bɛsɛ Yudaba, Gusunɔwa u sãa bɛsɛn Yinni. Sa ǹ maa nùn deri. Yãku kowobu Aronin bweseru ka Lefiba, bera ba win sɔma mɔ̀. 11Sa ra Yinni Gusunɔ tɔ̃ɔ baateren yãku dɔ̃ɔ mwaararuginu kue bururu ka yoka. Sa ra nùn turare dɔ̃ɔ dokeye kpa su nùn pɛ̃ɛ yiiya tabulu dɛɛra yen wɔllɔ. Mɛya sa ra maa fitilanu sɔ̃re yoka baayere dabu wuraguu gen wɔllɔ. Bɛsɛ, sa nùn mɛm nɔɔwammɛ. Adama bɛɛ i nùn deri. 12Mɛya Gusunɔ ka win yãku kowobu ba wãa ka bɛsɛ. Ba sun swaa gbiiye. Mɛya sa kɔbi mɔ yìn swĩi yi dam mɔ. Sa ko bɛɛ yi swee. Bɛɛ Isireliba, i ku ka Gusunɔ bɛɛn baababan Yinni tabu ko. Domi i ǹ kamiamɔ. 13Yera Yeroboamu u dera win tɔn be ba kukua Yudaban biruɔ ba yarima ba Yuda be wɔri. N deema Yeroboamun tabu kowobu gabu ba wãa Yudaban wuswaaɔ. Nge mɛya n kua ba ka bu suunu doke. 14Ye Yudaba ba sĩira, yera ba wa ma ba koo tabu kowa biruɔ ka wuswaaɔ. Ma ba nɔɔgiru sua ba Yinni Gusunɔ somiru kana. Sanam mɛ, yãku kowobu ba kɔbi soomɔ, 15yera Yudaba kpuro ba tabun kuuki wura. Ma Yinni Gusunɔ u Yeroboamu ka wigibu wɔri Abia ka Yudaban wuswaaɔ. 16Isireliba ba duki yakikira adama Gusunɔ u bu bɛri Yudaban nɔmaɔ. 17Ma Abia ka win tɔmbu ba Isireliba kamia. Isireli be sɔɔ, tɔmbu nɔrɔbun suba nɛɛra wunɔbuwa (500.000) ba wɔruka ba gu. 18Isireliba ba sekuru wa dɔma te. Ma Yudaba ba nasara sua. Domi Gusunɔ ben baababan Yinniwa ba tãsa. 19Abia u Yeroboamu naa gira, ma u nùn wuu sini mwaari, Betɛli ka yen baru kpaanu ka Yesana ka yen baru kpaanu ka Eforoni ka yen baru kpaanu. 20Yeroboamun dam kpuro mu kpa Abian waati ye sɔɔ. Ma Yinni Gusunɔ u dera u gu. 21Yen biru, Abia u win bandun dam sire. U kurɔbu sua wɔkura nnɛ. Ma u bii tɔn durɔbu yɛnda yiru mara ka bii tɔn kurɔbu wɔkura nɔɔbu ka tia. 22Ye Abia u kuan sukum ka ye u gerua, ya yorua Gusunɔn sɔmɔ Idon tireru sɔɔ. 23Abia u kpuna u gu, ma ba nùn sikua win baababan sikaɔ, Dafidin wuuɔ. Ma win bii Asa u bandu kɔsire kua. Ma bɔri yɛnda dua tem mɛ sɔɔ sere wɔ̃ɔ wɔkuru.

will be added

X\