Samuɛli I 8

1Saa ye Samuɛli u tɔkɔ kua, u dera win biba kua Isireliban kparobu. 2Win bii gbiikoon yĩsira Yoɛli, yirusegira maa Abia. Bera ba kua kparobu Beri Sebaɔ. 3Adama win bii be, ba ǹ win yira swĩi. Ba ye gɛrariwa gobin binɛn sɔ̃. Ba nɔm biran kɛ̃nu mwaamɔ. Ba ku ra tɔmbu sirie dee dee. 4Ma Isireliban guro gurobu kpuro ba mɛnna ba da Samuɛlin mi Ramaɔ. 5Ba nùn sɔ̃ɔwa ba nɛɛ, wee, a tɔkɔ kua, wunɛn biba kun maa wunɛn yira swĩi. Ǹ n mɛn na, a sun goo kasuo u ko bɛsɛn sina boko u n sun kpare nge mɛ bwesenu kpuro nu mɔ. 6Adama gari yi, yi ǹ Samuɛli dore, ye ba nɛɛ, u bu sina boko kasuo wi u ko n bu kpare. Ma u kanaru kua. 7Yera Yinni Gusunɔ u nùn sɔ̃ɔwa u nɛɛ, ye tɔn be, ba nun sɔ̃ɔwa kpuro, a wuro. A ku yina. Domi n ǹ wunɛ ba yinamɔ, nɛna ba yina na n sãa ben sunɔ. 8Saa mìn di na bu yarama Egibitin di sere ka gisɔ ba man yinawa ba bũnu sãamɔ. Nge mɛya ba maa nun kuammɛ. 9Yen sɔ̃, a ben gere wuro, adama a bu sɔ̃ɔwɔ ye sina boko wi, u koo ra bu kua, kpa ba n yɛ̃. 10Ma Samuɛli u Yinni Gusunɔn gari yi kpuro tɔn be tusia. 11U nɛɛ, sina boko wi u koo bandu di mi, amɛniwa u koo ko. U koo bɛɛn bii tɔn durɔbu mwɛɛri ba n sãa win tabu kowobu, gabu bu win tabu kɛkɛban sɔmburu ko, kpa gabu ba n sãa maasɔbu, kpa gabu ba n sãa win kirukuba ba n duku dukubu mɔ̀ win tabu kɛkɛn wuswaaɔ. 12U koo gabu gɔsi ba n sãa tabu kowo wuunun wirugibu, kpa u gabu wuna ba n win gbee sɔma mɔ̀ kpa gabu ba n tabu yãnu ka tabu kɛkɛban yãnu sekumɔ. 13U koo maa bɛɛn bii wɔndiaba mwɛɛri ba n da nùn turare kue kpa ba n sãa dĩa kowobu ka pɛ̃ɛ kowobu. 14U koo bɛɛn gbee geenu mwɛɛri ka maa bɛɛn gbaa geenu mi i dãa binu duura ni ba sokumɔ resɛm ka olifi, kpa u win bwãabu wɛ̃. 15Ì n bɛɛn gberun dĩanu ka bɛɛn resɛm marum kpuro suba suba wɔkuru, sube teera ko n sãawa wigiru, kpa u tu sua u win sɔm kowobu ka ben wirugibu wɛ̃. 16U koo bɛɛn sɔm kowo tɔn durɔbu ka tɔn kurɔbu be ba dam mɔ mwɛɛri, ka bɛɛn kɛtɛkunu ka bɛɛn naa kinɛ geenu kpa u ka win tii tiin sɔmburu ko. 17U koo bɛɛn yaa sabenu mɛnna kpa nin wɔkuru baateren wɔllɔ u teeru sua, kpa bɛɛn tii i n sãa win yobu. 18Dɔma te ye kpuro ya koora, i ko weeweenu ko sina boko wi i gɔsan sɔ̃, adama Yinni Gusunɔ u ǹ bɛɛ wurarimɔ dɔma te. 19Ka mɛ, tɔn be, ba ǹ Samuɛlin gere wure. Ba nɛɛ, sina bokowa sa kĩ. 20Kpa bɛsɛn tii sa n sãa nge bwesenu kpuro. Sina boko wi, u ko n da bɛsɛn siribu ko kpa u n da sun kpare tabu sɔɔ. 21Ye Samuɛli u tɔn ben gari yi kpuro nua u kpa, yera u yi Yinni Gusunɔ saaria. 22Yinni Gusunɔ u Samuɛli sɔ̃ɔwa u nɛɛ, a tɔn ben gere wuro, kpa a bu sina boko wi kua. Yen biru Samuɛli u Isireliba sɔ̃ɔwa u nɛɛ, ben baawure u gina doo win wuuɔ.

will be added

X\