1 Filisitiba ba Gusunɔn woodan kpakoro te sua saa Ebɛni Esɛɛn di ba ka da Asidɔduɔ, 2 ba tu duusia ben bũu Dagonin dirɔ ba yi temɔ win bɔkuɔ. 3 Ye n kua sisiru Asidɔdugibu ba seewa buru buru yellu ba deema wee, ben bũu wi, u wɔrumɛ u kibari Yinni Gusunɔn woodan kpakororun wuswaaɔ. Ma ba nùn seeya ba kpam wesia win ayerɔ. 4 Sisiru ba maa seewa buru buru yellu ba deema wee, bũu wi, u wɔrumɛ u kibari Yinni Gusunɔn woodan kpakoro ten wuswaaɔ, ma win wiru ka nɔma kpuro ya bɔtikire ya yii dii kɔnnɔwɔ. Win kuseru tɔnawa ta tie. 5 Yen sɔ̃na Dagonin yãku kowobu ka be ba ra du win dirɔ bu ka nùn sã kpuro Asidɔduɔ, ba ku ra maa dii kɔnnɔ gen deedeeru taare sere ka gisɔn gisɔ. 6 Ma Yinni Gusunɔ u Asidɔdugibu ka ben baru kpaanugibu kpuro nɔmu doke u bu bwisinu wisi u dera ba nɔni swãaru wa. 7 Saa ye Asidɔdugibu ba deema mɛya n sãa, ma ba nɛɛ, sa ǹ maa Isireliban Yinnin woodan kpakororu yiimɔ bɛsɛn mini domi u sun nɔmu doke ka mam bɛsɛn bũu Dagonin tiiɔ. 8 Ma ba gɔra baama kpuro mi Filisitiban sinamba wãa. Ba na ba mɛnna ba wesiana ba nɛɛ, amɔna sa ko ko ka Isireliban Yinnin woodan kpakoro te. Yera ba nɛɛ, i de su ka tu da Gatiɔ. Ma ba tu sua ba ka da mi. 9 Ye ba ka tu tura wuu gen mi, Yinni Gusunɔ u maa wuu gegibu nɔmu doke sere wuu ge, ga burisina. Gen tɔn durɔbu saa bukurobun min di, sere ka bibɔ, ba bwisinu barawa. 10 Yen sɔ̃na ba ka maa kpakoro te da Ekoroniɔ. Ye ba ka tu wuu dua, yera Ekoronigiba wuri wura ba nɛɛ, wee, ba ka sun Isireliban Yinnin woodan kpakoro te naawa bu ka sun go bɛsɛ kpuro. 11 Ma ba gɔra Filisitiban sinambu kpuron mi, ba bu mɛnna ba nɛɛ, i de bu ka Isireliban Yinnin kpakoro te wura ten ayerɔ kpa tu ku sun go tu kpe. Domi wuu ge kpuro ga burisina gɔɔn bɛrum sɔ̃, yèn sɔ̃ Gusunɔ u bu nɔmu doke gem gem. 12 Wuu gen tɔn durɔ be ba ǹ gu, bwisinu bu wisiwa kpuro sere ben wuri yi wɔllu girari.
