Samuɛli I 31

1Filisitiba ba Isireliba tabu wɔri. Ma Isireliban tabu kowobu ba duki sua. Filisiti be, ba bu naa gira ba go go Giliboan guurɔ. 2Ba maa Sɔɔlun tii ka win bibu ita Yonatam ka Abinadabu ka Maakisua naamwɛ. Ma ba bii be go. 3Sannɔ ge, ga Sɔɔlu swĩiyɛ. Tɛn towobu ba nùn sɛ̃ɛnu twee ba mɛɛra kua gem gem. 4Yera u win tabu yãa sɔɔwo sɔ̃ɔwa u nɛɛ, a wunɛn takobi womɔ a man ye sɔku kpa bango sarirugii be, bu ku raa man sɔku bu yaa kasiki. Adama durɔ wi, u yina u ko mɛ, domi bɛrum nùn mwa gem gem. Ma Sɔɔlu u takobi ye mwa u ka tii sɔka u kibarisi u taare. 5Ye win tabu yãa sɔɔwo wi, u wa ma u gu, yera u maa win takobi sua u tii sɔka nge mɛ Sɔɔlu u kua. Ma ba gu yãatem mi. 6Nge mɛya Sɔɔlu u ka gu ka win bibu ita be, ka win tabu yãa sɔɔwo ka sere maa win tabu kowobu kpuro sannu sɔ̃ɔ tee te. 7Ye Isireli be ba wãa wɔwan guruɔ ka be ba wãa Yuudɛnin daarun guruɔ ba nua ma ben tabu kowoba duki sua, Sɔɔlu ka win bii tɔn durɔbu ba maa gu, yera ba ben wusu deri ba duki sua. Ma Filisitiba ba na ba sina wuu si sɔɔ. 8Ye n kua sisiru Filisitiba ba na ba goo nin yãnu potirimɔ. Yera ba Sɔɔlu ka win bibu itan gonu wa Giliboan guurɔ. 9Ma ba Sɔɔlun wiru bura ba win tabu yãnu kpuro potira. Yera ba sɔmɔbu gɔra bu yen labaari kpara ben bũu diaɔ ka ben tɔmbun mi, ben tem sɔɔ kpuro gesi. 10Yera ba win tabu yãnu sua ba doke ben bũu wi ba mɔ̀ Asitaaten dirɔ, ma ba win goru sua ba bwɛ̃ Bɛti Sanin gbãraru wɔllɔ. 11Sanam mɛ Galadin wuu ge ba mɔ̀ Yabɛsin tɔmba nua ye Filisitiba ba Sɔɔlu kua, 12yera be ba sãa tabu durɔbu ba seewa ba sanum so wɔ̃ku giriru. Ye ba tura Bɛti Sani mi, yera ba Sɔɔlu ka win bibun gonu bwɛ̃ɛya gbãra ten min di, ba ka na Yabɛsiɔ, ba nu dɔ̃ɔ kpakura. 13Ma ba ben kukunu gura ba sikua dãru garun nuurɔ Yabɛsiɔ. Ma ba gɔɔ wooru sina, ba nɔɔ bɔkua sɔ̃ɔ nɔɔba yiru.

will be added

X\