Samuɛli I 28

1Sanam mɛ sɔɔ, Filisitiba ba ben tabu kowobu mɛnna bu wa bu ka Isireliba sanna. Ma Akisi u Dafidi sɔ̃ɔwa u nɛɛ, a n yɛ̃ kam kam ma kaa ka man taa bini da, wunɛ ka wunɛn bwãabu. 2Dafidi u nɛɛ, geema, yinni. Kaa maa wa ye kon kpĩ n ko. Akisi u nɛɛ, ǹ n mɛn na, kaa kowa nɛn tii tiin kɔ̃so sere ka baadommaɔ. 3N deema Samuɛli u gu kɔ. Ma Isireliba kpuro ba win gɔɔ swĩ, ba nùn sikua win wuu Ramaɔ. Sɔɔlu u maa sɔrobu ka gɔri sokobu kpuro gira tem mɛn di. 4Yera sɔ̃ɔ teeru Filisitiba ba mɛnna ba ben sansani gira Sunɛmuɔ. Ma Sɔɔlu u Isireliba kpuro mɛnna ba maa ben sansani gira Giliboaɔ. 5Saa ye Sɔɔlu u Filisitiban tabu kowo be wa u nanda, win torora kara u diirumɔ gem gem. 6Ma u Yinni Gusunɔ kana u nùn sɔ̃ɔsi ye u koo ko. Adama u ǹ nùn wisa dosu sɔɔ, ǹ kun mɛ yãku kowon min di, ǹ kun mɛ win sɔmɔ goon min di. 7Ma Sɔɔlu u win bwãabu sɔ̃ɔwa u nɛɛ, i man kurɔ goo kasuo wi u ra gɔribu soku, kpa n da win mi n bikiaru ko. Ba nùn wisa ba nɛɛ, kurɔ goo wãa Ɛndoriɔ wi u ra gɔribu soku. 8Ma Sɔɔlu u tii gɔsia u yãnu kɔsa u da kurɔ win mi wɔ̃kuru, ka win bwãabu yiru gabu sannu. Ye ba tura mi, ma u nɛɛ, na kĩ a man gɔri goo sokua wìn yĩsiru kon nun sɔ̃. 9Adama kurɔ wi, u nùn wisa u nɛɛ, a yɛ̃ sãa sãa ye Sɔɔlu u kua, nge mɛ u gɔri sokobu ka sɔrobu kpuro gira tem mɛn di. Ǹ n mɛn na, mban sɔ̃na a man yina bɛriammɛ bu ka man go. 10Ma Sɔɔlu u bɔ̃rua ka Yinni Gusunɔn yĩsiru u nɛɛ, sere ka Yinni Gusunɔn wãaru, a ǹ wahala gaa wasi gari yini sɔɔ. 11Ma kurɔ wi, u Sɔɔlu bikia u nɛɛ, ben weren yarowa kon nun sokua. Ma u nɛɛ, Samuɛli. 12Ye kurɔ wi, u Samuɛli wa, yera u nɔɔgiru sua u nɛɛ, ase wuna mi, Sɔɔlu? Mban sɔ̃na a man nɔni wɔ̃kua. 13Ma sina boko Sɔɔlu u nɛɛ, a ku bɛrum ko, a man sɔ̃ɔwɔ ye a wa. Kurɔ wi, u nɛɛ, siiniwa na wa. Ya yarimam wee tem di. 14Sɔɔlu u nɛɛ, mba ya ka weenɛ. U nɛɛ, durɔ tɔkɔra ya ka weenɛ, ta kumbooro sebua ta yarim wee. Ma Sɔɔlu u gia ma Samuɛliwa. Ma u yiira u wuswaa tem girari u nùn bɛɛrɛ wɛ̃. 15Samuɛli u Sɔɔlu sɔ̃ɔwa u nɛɛ, mban sɔ̃na a man baasi ka wunɛn soku te. Sɔɔlu u nɛɛ, nɔni swãa bakara ta man deema domi Filisitiba ba ka man tabu mɔ̀. Gusunɔ u maa man deri. U ku ra maa man wisi saa win sɔmɔbun min di, ǹ kun mɛ dosu sɔɔ. Yen sɔ̃na na na n nun soku kpa a man sɔ̃ɔsi ye kon ko. 16Samuɛli u nɛɛ, ma a yɛ̃ Yinni Gusunɔ u nun deri u kua wunɛn yibɛrɛ, mban sɔ̃na a man bikiamɔ ye kaa ko. 17U kua ye u raa gerua saa nɛn min di. U wunɛn bandu wɔra u Dafidi wɛ̃, 18yèn sɔ̃ a ǹ win gari mɛm nɔɔwɛ, ma a yina a Amalɛkiba win mɔru kpuro kɔsia. 19U koo wunɛ ka Isireliba Filisitiba nɔmu bɛria. Sia wunɛ ka wunɛn bii tɔn durɔbu i ko man deema mini. Kpa Yinni Gusunɔ u Isireliban tabu kowobu Filisitiba nɔmu bɛria. 20Mii mii Sɔɔlu u wɔruma birem nge wi u gu. Bɛrum nùn mwa gem gem Samuɛlin gari yin sɔ̃. U ǹ maa dam mɔ tɔ̃ɔ te sɔɔ, domi u ǹ di sɔ̃ɔ sɔɔn di sere n ka kua wɔ̃kuru. 21Ye kurɔ wi, u na Sɔɔlun mi, u wa ma u bɛrum soore ma u nɛɛ, wee, yinni, na wunɛn gari mɛm nɔɔwa. Na nɛn wãaru saraa kua, na kua ye a man yiire. 22Yen sɔ̃, na nun kanamɔ, a nɛn gari nɔɔwɔ. Wee kon nun dĩanu fiiko yiiya. A de a nu di kpa a dam wa a ka swaa wɔri. 23Adama Sɔɔlu u yina u nɛɛ, na ǹ dimɔ. Yera win bwãabu ka kurɔ wi, ba nùn suuru kana. Ma u ben gere wura u seewa tem di u sina kpin yerɔ. 24N deema kurɔ wi, u naa kpɛma gaa mɔ ye ya gea sãa ma u kua bara bara u ye go u sawa. U maa som sua u bura u ka pɛ̃ɛ kua, u ǹ seeyatia doke. 25U ka ye Sɔɔlu ka win bwãabu naawa ba di. Ye ba di ba kpa, ma ba seewa ba doona wɔ̃ku te.


Copyright
Learn More

will be added

X\