Samuɛli I 27

1Yeniban biru, Dafidi u tii sɔ̃ɔwa u nɛɛ, sɔ̃ɔ teeru Sɔɔlu u koo man nɔma turi u go. Yen sɔ̃, n buram bo n duka yakura minin di n kpikiru da Filisitiban temɔ kpa Sɔɔlu u ku maa man kasu Isireliban tem kpuro sɔɔ. Nge mɛya kon ka wa n kisira win nɔman di. 2Yera Dafidi u seewa wi ka win tabu durɔbu nata (600) ba da Akisi, Maɔkin biin mi. Akisi wi, u sãawa Gatin sunɔ. 3Durɔ win miya u wãa ka win tɔmbu nata ye, ben baawure ka win kurɔ ka bibu. Dafidin kurɔbu yiru Akinɔamu, Yisirɛɛligii, ka Abigali, Kaamɛligii, Nabalin gɔmini, ba maa wãa ka wi. 4Saa yera ba da ba Sɔɔlu sɔ̃ɔwa ma Dafidi u kpikiru sua u wãa Gatiɔ. Ma Sɔɔlu u nùn deri sɛ̃ɛ, u ǹ maa kasu u nùn go. 5Sɔ̃ɔ teeru Dafidi u Akisi sɔ̃ɔwa u nɛɛ, a man durom kuo, a de n da n sina baru kpaaru garun mi. Domi na ǹ kĩ na n wãa ka wunɛ sannu wunɛn tiin wuu mini. 6Yen tɔ̃ɔ tera Akisi u nùn wuu ge ba mɔ̀ Sikilagi wɛ̃. Yen sɔ̃na ga kua Yudaban sina boko wi u bandu diiguu sere ka gisɔ. 7Ma Dafidi u wãa baru kpaaru mi sere n ka kua wɔ̃ɔ tia ka suru nnɛ. 8Min diya wi ka win tɔmbu ba ra yari bu Gesuriba ka Girisigibu ka Amalɛkiba wɔraa de. Domi tɔn beya ba wãa Suriɔ n ka girari Egibitin temɔ saa yellun di. 9Dafidi ka win tabu kowobu bà n dua tɔn ben wuu gagu sɔɔ, ba ra gen tɔmbu gowa mam mam, kurɔbu ka durɔbu, kpa bu ben yãnu gura ka ben yaa sabenu, niya yãanu ka kɛtɛba ka kɛtɛkunu ka yooyoosu. Yen biru kpa bu gɔsira Akisin mi. 10Yera Akisi u ra bu bikie u nɛɛ, mana i gisɔ wɔraa da. Kpa Dafidi u nùn wisi u nɛɛ, sa dawa Yudan tem sɔ̃ɔ yɛ̃san nɔm dwaru gia. Gasɔ kpa u maa nɛɛ, sa dawa Yeramɛɛliban tem sɔ̃ɔ yɛ̃san nɔm dwaru gia. Gasɔ kpa u maa nɛɛ, Keniban tem sɔ̃ɔ yɛ̃san nɔm dwaru gia. 11Dafidi ka win tɔmbu bà n wɔra ye da, wuu ge ba wɔri ba ra gen tɔmbu gowa mam mam. Baa tɔn turo ba ku ra deri wasiru, u sere na Gatiɔ u Akisi sɔ̃ u nɛɛ, amɛni ka amɛniwa Dafidi ka win tɔmbu ba ra ko. Nge mɛya Dafidi u kua saa ye u wãa Filisitiban tem mi. 12Ma Akisi u nùn naanɛ kua u nɛɛ, Isirelibara Dafidi u mɔru seeyamɔ. Yen sɔ̃, u ko n sãawa nɛgii sere ka baadommaɔ.

will be added

X\