Samuɛli I 24

1Dafidi u seewa bera min di ma u da u kukua Engɛdiɔ. 2Saa yè sɔɔ Sɔɔlu u Filisitiba naa swĩi u gɔsirama, yera ba nùn sɔ̃ɔwa ba nɛɛ, Dafidi u wãa Engɛdin gbaburɔ. 3Ma Sɔɔlu u tɔmbu nɔrɔbun suba ita (3.000) sua be ba sãa tabu durɔbu Isireliba sɔɔ, bu da sere kpee bakanun bera gia mi kpee bɛri yi ra n wãa bu Dafidi ka win tɔmbu kasuma. 4Ye ba tura yãanun wãa yeru garun mi, swaa ye sɔɔ, kpee wɔru gaga maa wãa mi, ma Sɔɔlu u dua wɔru ge sɔɔ u ka swaa swĩibu ko. N deema Dafidi ka win bwãabu ba wãa wɔru gen sɔɔwɔ. 5Ma Dafidin bwãaba nùn sɔ̃ɔwa ba nɛɛ, a ǹ wa ma tɔ̃ɔ te, ta tura? Te Yinni Gusunɔ u nun bura u nɛɛ, u koo nun wunɛn yibɛrɛ nɔmu bɛria kpa a nùn kua nge mɛ a kĩ. Yera Dafidi u seewa sɛ̃ɛ u Sɔɔlun yaberun soo bura. 6Yen biruwa u nanda ye u ka Sɔɔlun yaberun soo ge bura. 7Saa ye sɔɔra Dafidi u win bwãabu sɔ̃ɔwa u nɛɛ, Gusunɔ u man yenin bweseru gbara bu nɛɛ, nɛna na nɛn yinni nɔma doke wi Yinni Gusunɔ u gɔsa u kua sunɔ. 8Ka gari yiya Dafidi u win bwãabun laakari kpunasia u ǹ ka dere bu Sɔɔlu wɔri. Ma Sɔɔlu u seewa u yara u doona min di. 9Yen biruwa Dafidi u yarima wɔru gen min di u Sɔɔlu soka u nɛɛ, nɛn yinni, sunɔ. Ma Sɔɔlu u sĩira u mɛɛrima biruɔ. Yera Dafidi u yiira u wuswaa tem girari u nùn bɛɛrɛ wɛ̃. 10Ma u Sɔɔlu sɔ̃ɔwa u nɛɛ, mban sɔ̃na a ka tɔmbun gari nɔɔmɔ be ba mɔ̀, wunɛn kɔ̃sa na kasu. 11Wee, wunɛn tiin nɔni wa gisɔ ma Yinni Gusunɔ u man nun nɔmu bɛria kpee wɔru ge sɔɔ. Ba nɛɛ, n nun goowo, adama na nun deri. Na nɛɛ, na ǹ nɛn yinni, wi Yinni Gusunɔ u gɔsa u kua sunɔ nɔmu dokemɔ. 12Ka yen de kpuro a mɛɛrio. Wee, na wunɛn yaberun sukum nɛni. Nge mɛ na ka yabe ten soo bura mi, na ǹ ka nun go, n weenɛ a gia ma na ǹ sãa mɛm nɔɔ sari. Nɛn kookoosu sɔɔ, kɔ̃sa gaa maa sari, ǹ kun mɛ toraru garu wunɛn sɔ̃. Adama wunɛ wee, a man naa swĩi a go. 13Yen sɔ̃, Yinni Gusunɔwa u koo sun siria nɛ ka wunɛ. Kpa u nun ye a man kuan dibu kɔsia. Adama nɛn nɔma kun nun babamɔ. 14Nge mɛ ba ra gere bu nɛɛ, daa kɔ̃sa ya ra nɛwa tɔn kɔ̃son min di. Yen sɔ̃na nɛn nɔmu ga ǹ nun babamɔ. 15Weren sɔ̃na wunɛ Isireliban sunɔ a yarima. Wara a naa gire. Nɛ wi na sãa nge bɔ̃ɔ goru? Ǹ kun mɛ nge goo dɛ̃ɛ? 16Yinni Gusunɔwa u sãa siri kowo. Ù n bɛsɛn gari wɛ̃ɛra, u koo sun siria, nɛ ka wunɛ. Kpa u ka man yina u man wɔra wunɛn nɔman di. 17Ye Dafidi u Sɔɔlu gari yi sɔ̃ɔwa u kpa, yera Sɔɔlu u nɛɛ, ǹ n mɛn na, wunɛn nɔɔwa mi, Dafidi nɛn bii? Ma Sɔɔlu u nɔɔgiru sua u wura kua. 18U Dafidi sɔ̃ɔwa u nɛɛ, a man gem kere. Domi a man gea kua, ma na nun kɔ̃sa dibu kɔsia. 19Wee, a man sɔ̃ɔsi gisɔ gea ye a man kua. Yinni Gusunɔ u raa man doke wunɛn nɔmuɔ. A ǹ maa man go. 20Domi tɔnu u ku ra win yibɛrɛ nɔma turi kpa u nun yɔ̃su u doona ka alafia. Yen sɔ̃na Yinni Gusunɔ u koo nun gea dibu kɔsia ye a man kua minin sɔ̃. 21Tɛ̃ na yɛ̃ kam kam ma kaa ko sunɔ kpa Isireliban bandu ta n dam mɔ wunɛn nɔmaɔ. 22Yen sɔ̃, a bɔ̃ruo tɛ̃ ka Yinni Gusunɔn yĩsiru ma a ǹ nɛn bibun bweseru kpuro goomɔ nɛn biru, kpa bu nɛn yĩsiru duari nɛn baaban bweseru sɔɔ. 23Ma Dafidi u Sɔɔlun gari yi wura ka bɔ̃ri u nɛɛ, u ǹ bu goomɔ. Yen biru Sɔɔlu u da yɛnuɔ. Adama Dafidi ka win bwãabu ba gɔsira ba wura ben kuku yerɔ.

will be added

X\