1 Yera Dafidi u seewa min di, u n doonɔ. Ma Yonatam maa gɔsira u da wuuɔ. 2 Dafidi u da Nɔbuɔ Akimɛlɛkin mi, wi u sãa yãku kowo. Ye Akimɛlɛki u nùn wa, yera u nùn sennɔ na ka bɛrum, u nùn bikia u nɛɛ, mba n kua a ka sĩimɔ wunɛ turo, baa tɔn turo u ǹ ka nun swĩi. 3 Ma Dafidi u yãku kowo wi wisa u nɛɛ, sunɔwa u man sɔmburu garu yiire. U maa nɛɛ, n ku de goo u n yɛ̃ yèn sɔ̃ u man gɔra. Yen sɔ̃na na nɛn bwãabu sɔ̃ɔwa na nɛɛ, su yinna yam kasa. 4 Tɛ̃ dĩa nirà a mɔ yɛnuɔ. Ǹ n pɛ̃ɛn na, a man wasi nɔɔbu kɛ̃ɛma, ǹ kun mɛ, ye a gesi mɔ kpuro. 5 Ma yãku kowo wi, u Dafidi wisa u nɛɛ, pɛ̃ɛ gaa sari ma n kun mɔ pɛ̃ɛ ye ba Yinni Gusunɔ wɛ̃, ye à n kaa di, kaa gina tɔn kurɔ dɛsirari. 6 Ma Dafidi u yãku kowo wi wisa u nɛɛ, ba sun kurɔ dendibu yinari kɔ nge mɛ ba ra sun kue sà n tabu dɔɔ. Kaa ra sere gere gɔra ye ba sun kooma mini? Yen sɔ̃, nɛn bwãaba dɛɛre kɔ. 7 Yera yãku kowo wi, u pɛ̃ɛ ye suama u Dafidi wɛ̃, domi pɛ̃ɛ gaa sari mi, ma n kun mɔ ye ba raa gura Yinni Gusunɔn sãa yerun di, ma ba swĩa kɔsire kua. 8 N deema yen tɔ̃ɔ te, Sɔɔlun yãa kparobun wirugii u na Yinni Gusunɔn sãa yerɔ u ka sãarun wororu garu ko. Durɔ win yĩsira Dɔɛgu. U sãawa Edɔmu. 9 Ma Dafidi u Akimɛlɛki bikia u nɛɛ, a ǹ yaasa ǹ kun mɛ takobi mɔ mi? Domi na ǹ sannɔ yãnu ganu suamɛ yɛnun di yèn sɔ̃ sunɔ u man baasi n win gɔra ye da fuuku. 10 Yera Akimɛlɛki wi, u nùn wisa u nɛɛ, takobi gaa sari ma n kun mɔ Goliatigia wi a go Elan wɔwaɔ. Ye wee, ba ka bekuru bɔkua ba yii yãku kowon yabe tarakpen biruɔ. À n ye kĩ, a suo. Ma Dafidi nɛɛ, a man ye wɛ̃ɛma domi gaa raa ru maa sari ye ya ye tura. 11 Yen biru Dafidi u seewa u duka yakura Sɔɔlun sɔ̃ ma u da u wãa Akisin mi, wi u sãa Gatin sunɔ. 12 Adama Akisin sina bwãabu ba nɛɛ, n ǹ Dafidi Isireliban sunɔ, wiya mi? Wi ba ra n tɔmamɔ ba n mɔ̀, Sɔɔlu u ra nɔrɔm nɔrɔm go. Adama Dafidi u ra nɔrɔbun suba wɔku wɔkubu (10.000) go. 13 Ma gari yi, yi Dafidi sãwana sere u Akisin bɛrum kua. 14 Yera u tii gɔsia wiiro u dweebu mɔ̀ nge gari bɔkɔ, u seewa u yorumɔ wuun kɔnnɔn gamboba sɔɔ. Ma u yãatam wĩimɔ mu kokumɔ win toburɔ. 15 Ma Akisi u win bwãa be sɔ̃ɔwa u nɛɛ, bɛɛn tii i wa ma durɔ wini kun bwãa do. Mban sɔ̃na i ka man nùn naawa. 16 I tamaa na ǹ wiiro waarewa i ka sere man durɔ wini naawa u man win wiira kookoosu sɔ̃ɔsi? Durɔ winin bwesera i ko i duusia nɛn dirɔ?
