Samuɛli I 20

1Dafidi u yakura u doona saa Raman wɔɔ bera ye ba mɔ̀ Nayɔtun di, u da u Yonatam deema. U nɛɛ, mba na kua. Mba nɛn toraru. Nge taarɛ mba na wunɛn tundo kua u ka kĩ u man go. 2Yonatam u nùn wisa u nɛɛ, su ku wa mɛ! A ǹ gbimɔ. Nɛn tundo u ku ra gãanu ganu ko u kun man sɔ̃ɔwa, baa ǹ n gãa piiminun na. Ǹ n mɛn na, u ǹ yenin bweseru mɔ̀ u kun man sɔ̃ɔwa. Gari yi, yi ǹ sãa mɛ. 3Dafidi u nɛɛ, kam kam mɛya n sãawa. Adama wunɛn tundo u ǹ dere a yi nɔ, domi u yɛ̃ ma a man kĩ too. U ǹ maa kĩ wunɛn nukuru tu sankira. Sere ka wunɛn wãaru ka maa Yinni Gusunɔn wãaru, naa dabusa teera ta man karanɛ ka gɔɔ. 4Ma Yonatam u Dafidi sɔ̃ɔwa u nɛɛ, ǹ n mɛn na, ye a kĩ kpuro, a geruo. Kon nun ye kua. 5Dafidi u nɛɛ, wee siara suru kpao u koo yari. Na ǹ kon maa ko na kun de sunɔn mi su di sannu. Adama a de n da n kuke yakasɔ sere n ka ko sin teerun yoka. 6Wunɛn tundo ù n bikia mana na wã, a nùn sɔ̃ɔwɔ ma na nun kana n ka da nɛn wuu Bɛtelehɛmuɔ. Domi nɛn yɛnugibu kpuro ba ben wɔ̃ɔ ka wɔ̃ɔn yãkuru mɔ̀ mi. 7Ù n nɛɛ, n wã, nɛ wunɛn bɔ̃ɔ, na alafia wawa. Adama ù n mɔru bara, a n yɛ̃ ma kɔ̃sa u bwisikumɔ nɛn sɔ̃. 8Adama wunɛ, a man kĩru sɔ̃ɔsio, domi a nɔɔ mwɛɛru kua Yinni Gusunɔn wuswaaɔ ma kaa n sãa nɛn bɔrɔ sere ka baadommaɔ. Nà n taarɛ gaa mɔ, a man goowo wunɛn tii. Mban sɔ̃na kaa ka man da wunɛn tundon mi u ka man go. 9Yonatam u nɛɛ, a ku yenin bweseru bwisiku. Nà n gia ma nɛn tundo u kĩ u nun kɔ̃sa kua, kon nun sɔ̃. 10Dafidi u bikia u nɛɛ, wunɛn tundo ù n ka nun mɔru wisa, wara koo man sɔ̃. 11Yonatam u nɛɛ, a na su da yakasɔ. Ma be yiru ba yara ba da yakasɔ. 12Ma Yonatam u Dafidi sɔ̃ɔwa u nɛɛ, sere ka Gusunɔ Isireliban Yinnin wãaru, sia amadaare, ǹ kun mɛ sin teeru, kon nɛn tundon laakari mɛɛri. Ù n gea bwisikumɔn na wunɛn sɔ̃, kon nun goo gɔriama u nun sɔ̃. 13Adama ù n kĩ u nun kɔ̃sa kua, kon nun nɔɔsia kpa n de a doona ka bwɛ̃ɛ dora. Nà kun kue mɛ, Yinni Gusunɔ u man yen dibu kɔsia. Kpa u nun yɔ̃re nge mɛ u nɛn tundo yɔ̃re. 14Adama saa ye na wãa wãaru sɔɔ kpuro, a man kĩru sɔ̃ɔsio tèn bweseru Yinni Gusunɔ u ra win tɔmbu sɔ̃ɔsi, kpa bu ku raa man go. Nà n maa gu, 15kpa a nɛn yɛnugibu kĩru sɔ̃ɔsi, baa sanam mɛ Yinni Gusunɔ u dera wunɛn yibɛrɛba kpuro ba gbisuka ba kpa. 16Ma u ka Dafidi arukawani bɔkua win yɛnugibun sɔ̃ u nɛɛ, Yinni Gusunɔ u Dafidin yibɛrɛba ben dibu kɔsie. 17Yen biru Yonatam u dera Dafidi u win nɔɔ mwɛɛru sire kĩrun sɔ̃ domi u nùn kĩa nge win tiin hunde. 18Ma u Dafidi sɔ̃ɔwa u nɛɛ, siara suru kpao koo yari. Ba koo bikia, mana a wãa. Domi bà n dimɔ, ba koo wa ma a ǹ wãa wunɛn sin yerɔ. 19Sin teerun yoka, a doo mi a raa kukua sanam mɛ wahala ye, ya torua. Kpa a n wãa kpee te ba mɔ̀ Esɛlin gãarɔ. 20Kon sɛ̃ɛnu ita to kpee ten bera gia kpa n sãa nge yĩreru gara na toosimɔ. 21Yen biru kon bii gɔri u da u sɛ̃ɛ ni kasuma. Nà n nùn sɔ̃ɔwa na nɛɛ, u mɛɛrio, wee sɛ̃ɛ ni, nu wãa win biruɔ, u nu tama, a n yɛ̃ ma kaa kpĩ a yarima ka bɔri yɛndu. Domi sere ka Yinni Gusunɔn wãaru, kari maa sari. 22Adama nà n bii wi sɔ̃ɔwa na nɛɛ, wee sɛ̃ɛ ni, nu wãa win wuswaaɔ, a n yɛ̃ ma Yinni Gusunɔwa u kĩ a doona. Ǹ n mɛn na, a doonɔ. 23Gari yi sa maa bɔkua nɛ ka wunɛ, Yinni Gusunɔwa u sãa bɛsɛn seeda sere ka baadommaɔ. 24Ma Dafidi u da u kukua yakasɔ. Ye suru kpao u yara, sunɔ u na u ka yen tɔ̃ɔ bakaru di. 25Ma u sina win ayerɔ ganan bɔkuɔ, Abinɛɛ maa wãa win bɔkuɔ, ma Yonatam u sina ben wuswaaɔ, adama Dafidin sin yerɔ goo sari. 26Tɔ̃ɔ te sɔɔ, Sɔɔlu kun gãanu gerua, domi u tamaa, u disi mɔwa. Yiya yi ko n nùn yinari. 27Adama yen sisiru, surun sɔ̃ɔ yiruse, goo sari kpam Dafidin sin yerɔ. Ma Sɔɔlu u win bii Yonatam bikia u nɛɛ, mban sɔ̃na Isain bii u ǹ tɔ̃ɔ bakaru nɛ saa gĩan di. 28Ma Yonatam u nùn wisa u nɛɛ, Dafidi u man suuru kana u nɛɛ, n de u da Bɛtelehɛmuɔ, 29domi miya ba yãkuru garu mɔ, ma win mɔɔ u nùn sokusia. Yen sɔ̃na u nɛɛ, ù n nɛn kĩi geeru wa, n nùn yɔlla kuo u da u win maabu wa. Yera n dera u ǹ nɛ u ka nun di. 30Ma Sɔɔlu ka Yonatam mɔru kua u nùn sɔ̃ɔwa u nɛɛ, bii seege wunɛ! Na yɛ̃ ma wunɛ ka wunɛn mɛron sekura nɔɔ tia ye a ka Isain bii sãa mi. 31Domi ù n wãa wãaru sɔɔ, a ǹ maa bandu dimɔ tem mɛ sɔɔ. A ǹ kaa n maa bɔri yɛndu mɔ. Ǹ n mɛn na, a gɔrio bu nùn mwaama, domi n weenɛwa bu nùn go. 32Ma Yonatam u win tundo bikia u nɛɛ, mban sɔ̃na u koo gbi. Mba u kua. 33Yera Sɔɔlu u win yaasa fĩa u ka Yonatam sɔku, ma Yonatam u gia ma win tundo u sɔɔru kpa u ka Dafidi go. 34Yera u seewa dii yerun min di ka mɔru. U ǹ maa sɔ̃ɔ yirusen tɔ̃ɔ baka te di. Win nukura sankira gem gem Dafidin sɔ̃. Domi win tundo u nùn bɛɛrɛ sari kom kua. 35Ye n kua sisiru bururu, Yonatam u da yam mi ba raa yinna yeru kuana, wi ka Dafidi. Ma bii tɔn durɔbu gagu ga nùn swĩi. 36Ma u bii wi sɔ̃ɔwa u nɛɛ, a duka doo a sɛ̃ɛ ni kon to mi kasuma. Ye bii wi, u duka dɔɔ, yera Yonatam u sɛ̃u toba ga nùn sarari. 37Saa ye bii wi, u tura deedeeru mi sɛ̃u ge, ga da, yera Yonatam u kpam gbãra u nɛɛ, ga wãa wunɛn wuswaaɔ, 38a duka doo, a ku yɔ̃ra, a wasi suo. Ma bii wi, u da u sɛ̃u ge dɔbama u ka na win yinnin mi. 39Adama u ǹ yɛ̃ asiri ye ya wãa mi. Yonatam ka Dafidi tɔnawa ba ye yɛ̃ɛsinɛ. 40Ma Yonatam u win tabu yãnu sua u bii wi wɛ̃ u nɛɛ, a ka wuro yɛnuɔ. 41Saa ye bii wi, u doona ma Dafidi u yarima saa kpee ten gãarun di sɔ̃ɔ yɛ̃san nɔm dwaru gia. Yera u Yonatam kpuna nɔn ita u wiru tem girari. Ma u seewa ba bɔkasina ba swĩsi be kpuro. Adama Dafidigiiya yi kera. 42Ma Yonatam u Dafidi sɔ̃ɔwa u nɛɛ, a doo ka alafia, kpa a n yaaye nge mɛ nɛ ka wunɛ sa nɔɔ tia kua sa bɔ̃rua ka Yinni Gusunɔn yĩsiru sa nɛɛ, u n wãa bɛsɛn suunu sɔɔ ka maa bɛsɛn bibu sɔɔ sere ka baadommaɔ.

will be added

X\