Samuɛli I 2

1Hana u Gusunɔ siara u nɛɛ, nɛn gɔ̃ru ga dora ye Yinni Gusunɔ u man kuan sɔ̃. Nɛn nukura do win faaban sɔ̃. Wee na dam kua. Na nùn siaramɔ nɛn yibɛrɛban wuswaaɔ. 2Yinni Gusunɔ turowa u dɛɛre. U sãawa nge kpee baa mi na ra kuke. Wi turowa u sãa Gusunɔ. 3I kun da n maa tii siaramɔ. I ku de tii sua gari yi yari bɛɛn nɔsun di. Domi Gusunɔ u sãawa Yinni wi u kpuro yɛ̃. Wiya u ra tɔnun daa wɛ̃ɛri. 4Wiya u dera tabu kowo damgibun tɛma bɔɔkira. Ma dam sarirugiba dam kua. 5Be ba raa deburu mɔ, bera ba tɛ̃ sɔmburu kasu bu ka dĩanu wa. Be gɔ̃ɔra raa mɔ̀, beya ba tɛ̃ wɛ̃re. Wĩro u mara bibu nɔɔba yiru. Adama wi u raa bii dabinu mara u tia wi turo. 6Yinni Gusunɔwa u ra de tɔnu u gbi. Wiya u ra maa de u n wãa. Wiya u ra de u da gɔriɔ. Wi turo wiya u ra maa nùn yare min di. 7Yinni Gusunɔn min diya yãaru ka arumani ya ra nɛ. U ra goo taare temɔ, kpa u goo wɔlle sua. 8U ra wɔnwɔndo seeye tem di. Kpa u wi ba gɛma wɔlle sua. U ra bu sinasie ka sina bibu sannu kpa bu ko bɛɛrɛgibu. Wiya u handunian kpɛɛkpɛɛku swĩi. Gen wɔllɔwa u ye sɔndi. 9U koo win bɔrɔkiniban sanu sanusu kɔ̃su. Adama u koo de tɔn kɔ̃sobu bu kam ko yam wɔ̃kurɔ. Domi goo sari wi u koo nasara wa ka win tiin dam. 10Yinni Gusunɔ u koo win yibɛrɛba kɔsuku muku muku ka guru kpenu. U koo handunia kpuro siri. U koo wi u gɔsa ko sunɔ, kpa u nùn dam wɛ̃. 11Yen biru Ɛlikana u wura win wuuɔ Ramaɔ. Adama Samuɛli u sina yãku kowo Elin mi, u ka Yinni Gusunɔn sɔmburu mɔ̀. 12Elin bii tɔn durɔbu ba sãawa bii kamba. Ba ǹ Yinni Gusunɔ nasie. 13Baa mɛ ba sãa yãku kowobu, wee ye ba ra ko. Goo ù n yãkuru na, ma ba ten yaa yikumɔ, yãku kowon sɔm kowo u ra ka win sii kaato donnu itaguu nɛwa, 14kpa u gu kpɛ̃ɛ wekerɔ. Ye ga sɔka kpuro, yera ya ra ko yãku kowogia. Mɛsuma ba ra Isireliba kpuro kue be ba yãkuru na Siloɔ. 15Gasɔ, bu sere yaa gum dɔ̃ɔ doke Yinni Gusunɔn sɔ̃, yãku kowon sɔm kowo u ra nɛwa u durɔ wi u ka yãku te na sɔ̃ u nɛɛ, a man yãku kowon yaa wɛ̃ɛma u winyam wɔ̃. Domi u ǹ yaa yikura mwaamɔ wunɛn nɔman di. Yaa gɔma u kĩ. 16Durɔ wi, ù n nùn sɔ̃ɔwa u nɛɛ, a de bu yaa gum dɔ̃ɔ doke gina nge mɛ wooda ya gerua, bà n kpa, kpa a sua mɛ̀n nɔɔ a kĩ, sanam mɛya yãku kowon sɔm kowo wi, u ra nɛɛ, aawo, a man ye wɛ̃ɛyɔ tɛ̃n tɛ̃, ǹ kun mɛ, kon mwa ka dam. 17Nge mɛya ba yãku ni ba ra Yinni Gusunɔ kuen bɛɛrɛ kawa. Ma ya kua durum baka win wuswaaɔ. 18Samuɛli u sɔmburu mɔ̀ Yinni Gusunɔn sãa yerɔ. U sãawa bii piibu ma ba nùn yãku kowon yaberu kua ka wɛ̃ɛ damgii u sebua. 19Mɛya maa wɔ̃ɔ baagere Samuɛlin mɛro u ra n nùn yabe piibu kuammɛ u ka na bà n yãkuru sisi ka win durɔ. 20Kpa Eli u Ɛlikana ka win kurɔ Hana domaru kua u nɛɛ, Yinni Gusunɔ u de kurɔ wi, u ka nun bii dabinu ma, kpa bu ko Samuɛli wi i Yinni Gusunɔ wɛ̃n kɔsire. Yen biru kpa Ɛlikana ka Hana bu gɔsira ben wuuɔ. 21Ma Yinni Gusunɔ u Hana domaru kua. U maa bibu mara tɔn durɔbu ita, tɔn kurɔbu yiru. Samuɛli u maa kpɛ̃amɔ Yinni Gusunɔn wuswaaɔ. 22Eli u tɔkɔ kua gem gem ma u nua ye win bii tɔn durɔbu ba Isireliba kuammɛ kpuro ka nge mɛ ba ra ka kurɔbu kpunɛ be ba sɔmburu mɔ̀ Yinni Gusunɔn sãa yerun kɔnnɔwɔ. 23Ma u bu bikia u nɛɛ, amɔna i ka daa yenin bweseru mɔ̀, domi tɔmbu kpurowa ba man bɛɛn daa kɔ̃san gari sɔ̃ɔmɔ. 24I ku maa ko mɛ, bɛɛ nɛn bibu. Bɛɛn labaari ye na nɔɔmɔ ya ǹ wã. Domi i dera Yinni Gusunɔn tɔmba durum mɔ̀. 25Goo ù n win winsim torari, Gusunɔwa u koo nùn yen suuru kana, adama goo ù n Yinni Gusunɔ torari, wara u koo nùn suuru kana. Ka mɛ, ba ǹ ben tundon gere ye nua, domi Yinni Gusunɔ u sɔɔru kpa kɔ u ka bu go. 26Adama Samuɛli u kpɛ̃amɔ ma Yinni Gusunɔ u ka nùn nɔnu geu mɛɛra. Mɛya maa tɔmbun tii. 27Gusunɔn sɔmɔ goo u na Elin mi, u nɛɛ, amɛniwa Yinni Gusunɔ u gerua u nɛɛ, saa ye wunɛn baababa ba wãa Egibitiɔ ba yoru dimɔ Egibiti sunɔn mi, u bu win tii sɔ̃ɔsi kpasasa. 28Ma u wunɛn baaba Aroni gɔsa Isireliban bweseru kpuro sɔɔ u ka ko win yãku kowo kpa u n da nùn yãkunu kue, u turare dɔ̃ɔ doke, kpa u n da Isireliba bikiaru kue wi Yinni Gusunɔn mi. U mam wi ka win yɛnugibu Isireliban yãku yaan sukum yɔlla kua bu di. 29Mba n kua i ka win yãkunu kam mɛɛra mɛ, ka kɛ̃ɛ ni u yiire bu ka na win sãa yerɔ. Mban sɔ̃na i win tɔmbu Isireliban yãkunun yaa gumgia dimɔ i bɔriamɔ. Amɔna a ka wunɛn bibu bɛɛrɛ wɛ̃ɛmɔ n kere wi. 30Yen sɔ̃, u nɛɛ, wiya u raa gerua ma wunɛn yɛnu ka wunɛn baaban yɛnugibu ba koo ko win yãku kowobu sere ka baadommaɔ. Adama tɛ̃ u gerua u nɛɛ, ya ǹ maa koorɔ mɛ, domi be ba nùn bɛɛrɛ wɛ̃ɛmɔ, beya u koo bɛɛrɛ wɛ̃. Be ba kun nùn gara, beya u ǹ garisimɔ. 31Wee, sanam sisi mɛ̀ sɔɔ u koo wunɛn dam sura ka maa wunɛn baaban yɛnun dam, kpa goo u ku maa tɔkɔ ko wunɛn bweserɔ. 32Goo koo ko wunɛn kɔsire win sãa yerɔ. Isireli be ba tie ba koo durom wa adama wunɛn bweseru sɔɔ goo kun maa tɔkɔ mɔ̀. 33Ba koo gbiwa tabu sɔɔ. Baa ù n goo deri u waamɔ ye ba mɔ̀ win sãa yerɔ, u ko n nisinu mɔwa kpa u n nuki sankire. 34Yeniwa ya koo ko nɛn garin yĩreru wunɛ sɔɔ. Wunɛn bibu yiru ye, Hofini ka Finɛɛsi, ba koo gbi sannu sɔ̃ɔ teerun sɔ̃ɔ. 35Na kon yãku kowo naanɛgii goo seeya wi u koo nɛn kĩru ko nge mɛ na gɔ̃ru doke, kpa win bweseru tu ko yãku kowobu sere ka baadommaɔ sunɔ wi na gɔsan wuswaaɔ. 36Goo ù n tiara wunɛn bweserɔ u koo da u yɛ̃ro wiru kpĩiyawa gobi fiikon sɔ̃, ǹ kun mɛ dĩanun sɔ̃, kpa u gere u nɛɛ, a suuru koowo, a de n ko yãku kowo goon sɔm kowo kpa na n da dĩanu fiiko wa n di.

will be added

X\