Samuɛli I 19

1Sɔɔlu u win bii Yonatam ka win bwãabu kpuro sɔ̃ɔwa u nɛɛ, bu Dafidi goowo. Adama Yonatam u Dafidi kĩ n banda. 2Ma u nùn sɔ̃ɔwa u nɛɛ, nɛn baa Sɔɔlu u swaa kasu u ka nun go. A de a n tii yɛ̃ sia bururu, kpa a kuku yeru kasu a n wãa mi. 3Nɛ ka nɛn baa sa ko na su yɔ̃ra deedeeru mi a kukua kpa n ka nùn wunɛn gari ko. Kpa n nun sɔ̃ ye na nua win min di. 4Ye ba na mi, Yonatam u win baa Dafidin gea saaria u nɛɛ, wunɛ sunɔ a ku wunɛn bɔ̃ɔ Dafidi torari. U ǹ nun kɔ̃sa gaa kue. Ye u kua kpuro, gãa geena. 5U tii kari bɔrie ye u ka Filisiti wi go. Ma Yinni Gusunɔ u Isireliba kpuro nasara baka wɛ̃. Wunɛn tii a ye wa, ma wunɛn nukura dora. Ǹ n mɛn na, mban sɔ̃na a kĩ a tora a ka Dafidi wi u dɛɛre mi go kam. 6Ma Sɔɔlu u Yonatam gari yi wura ma u bɔ̃rua u nɛɛ, sere ka Yinni Gusunɔn wãaru, na ǹ maa Dafidi goomɔ. 7Ma Yonatam u Dafidi soka u nùn gari yi kpuro saaria. U ka nùn da Sɔɔlun mi, ma Dafidi u nùn sãwa nge yellu. 8Tabu kpam tunuma ma Dafidi u yara u ka Filisitiba sanna. U bu kamia mam mam, ma ba duki sua. 9Sɔ̃ɔ teeru Yinni Gusunɔ u dera hunde kɔ̃sa ya kpam Sɔɔlu seeri. Saa ye, u sɔ̃ win dirɔ u win yaasa nɛni, ma Dafidi u nùn mɔrɔku soowammɛ. 10Sɔɔlu u kĩ u Dafidi yaasa kara u ka gana mɛnna, adama Dafidi u fuka ma Sɔɔlun yaasa ya da ya gira ganaɔ. Yera Dafidi u kura u duka sua wɔ̃ku te. 11Ma Sɔɔlu u sɔmɔbu gɔra Dafidin dirɔ bu tu kɔ̃su bu wa bu ka nùn go yam sãreru. Adama Mikali, Dafidin kurɔ, u nùn gari yi nɔɔsia u nɛɛ, ù kun duka sua wɔ̃ku te, sisiru ba koo nùn go. 12Yera Mikali u Dafidi yara fɛnɛntin di ma u kura u kpikiru sua. Nge mɛya u ka bu kisirari. 13Ma Mikali u bwãaroku gagu sua u gu kpĩ kpin yerɔ. U gen wiru boo gɔna wukiri. Ma u gu bekuru bubusi. 14Saa ye Sɔɔlu u tɔmbu gɔra bu Dafidi mwaama, yera Mikali u nɛɛ, sii barɔ u kpĩ. 15Ye ba wura ba Sɔɔlu sɔ̃ɔwa mɛ, yera u nɛɛ, bu doo bu Dafidi wa, kpa bu ka nùn na ka win kpin yee te sannu, u nùn go. 16Ye ba dua Dafidin dirɔ, ba deema bwãarokuwa ga kpĩ kpin yeru wɔllɔ. Gen wira boo gɔna wukiri. 17Yen biru Sɔɔlu u Mikali sokusia u nùn bikia u nɛɛ, mban sɔ̃na a man nɔni wɔ̃kua mɛ, a dera nɛn yibɛrɛ u man kisirari u doona. Mikali u nùn wisa u nɛɛ, u nɛɛwa n de u doona. Ǹ kun mɛ, u koo man go. 18Ye Dafidi u kpikiru sua u Sɔɔlu kisirari, yera u da Samuɛlin mi Ramaɔ u nùn saaria kpuro ye Sɔɔlu u nùn kua. Ma wi ka Samuɛli ba sina sannu Raman wɔɔ bera ye ba mɔ̀ Nayɔtuɔ. 19Yera ba Sɔɔlu sɔ̃ɔwa ba nɛɛ, wɔɔ Dafidi u wãa Ramaɔ ka Samuɛli sannu wɔɔ bera ye ba mɔ̀ Nayɔtuɔ. 20Ma Sɔɔlu u sɔmɔbu gɔra mi, bu Dafidi mwaama. Adama ye ba tura mi, ba ka Gusunɔn sɔmɔ wuuru yinna, Samuɛli u bu gbiiye ba sãaru mɔ̀. Ma Gusunɔn Hunde u sɔmɔ be yɔɔwa ma ben tii ba Gusunɔ sãaru wɔri nge sɔmɔ be. 21Yera gaba da ba Sɔɔlu sɔ̃ɔwa. Ma u maa sɔmɔbu gabu gɔra. Ma ben tii ba maa Gusunɔ sãaru wɔri nge sɔmɔ be. 22Ye Sɔɔlu nua mɛ, yera win tii u den swaa wɔri u dɔɔ Ramaɔ. Ye u tura dɔkɔ baka ye ya wãa Sekuɔ, yera u bikia u nɛɛ, mana Samuɛli ka Dafidi ba wãa. Ma ba nùn sɔ̃ɔwa ba nɛɛ, ba wãa Raman wɔɔ bera ye ba mɔ̀ Nayɔtuɔ. 23Ye u dɔɔ mi, yera Gusunɔn Hunde u maa win tii yɔɔwa ma u Gusunɔ sãaru wɔri nge win sɔmɔ, u ka tura sere Nayɔtuɔ. 24U win yaberu pota ma u Gusunɔ sãamɔ Samuɛlin wuswaaɔ. Dɔma te, u kpĩwa basi sɔ̃ɔ sɔɔ ka wɔ̃kuru kpuro. Yen sɔ̃na ba ra nɛɛ, Sɔɔlun tii u maa kua Gusunɔn sɔmɔ?

will be added

X\