Samuɛli I 18

1Saa ye Dafidi u ka Sɔɔlu gari kua u kpa, Yonatam u nùn kĩa nge win tiin hunde ma u ka nùn bɔrɔnu kua gem gem. 2Saa maa dɔma ten diya Sɔɔlu u nùn mwa u yi u ǹ maa wure u da win tundon mi. 3Yonatam u bɔ̃rua ma u ko n sãa Dafidin bɔrɔ sere ka baadommaɔ yèn sɔ̃ u nùn kĩ nge win tiin hunde. 4Yera u win tiin yaberu pota u Dafidi kã ka maa win tabu yaberu ka mam win takobi ka win tɛndu ka win kpaka. 5Mi Sɔɔlu u Dafidi tabu gɔra kpuro, u ra nasara suewa. Yen sɔ̃na u nùn kua win tabu kowobun tɔnwero. Ma n tɔmbu kpuro dore ka mam Sɔɔlun tabu durɔbun tii. 6Saa yè sɔɔ tabu kowoba wee tabu gberun di, mi Dafidi u Filisiti wi go, yera tɔn kurɔba yarima Isireliban wusu kpuron di bu ka Sɔɔlu senna. Ba yaamɔ ba baranu ka mɔrɔkunu soomɔ, ba kuuki mɔ̀ ka nuku dobu. 7Ba womusu mɔ̀ ba mɔ̀, Sɔɔlu u ra nɔrɔm nɔrɔm (1.000) go. Adama Dafidi u ra nɔrɔbun suba wɔku wɔkubu (10.000) go. 8Gari yi, yi ǹ ka Sɔɔlu naawɛ, ma u mɔru bara gem gem. U nɛɛ, ba Dafidi siara nɔrɔbun suba wɔku wɔkubun sɔ̃, adama nɛgibu nɔrɔm nɔrɔm tɔna. Mba na maa ka Dafidi kere sina gɔna baasi. 9Saa dɔma ten diya Sɔɔlu u ka Dafidi nɔnu kɔ̃su mɛɛrim torua. 10Yen sisiru Gusunɔ u dera hunde kɔ̃sa ya Sɔɔlu seeri ma u bindimɔ win yɛnun suunu sɔɔ u gari gerumɔ nge bũnugii. Ma Dafidi u mɔrɔku sua u nùn soowammɛ nge mɛ win dɔɔnɛ. N deema Sɔɔlu u win yaasa nɛni. 11Ma u ye fĩa u ka Dafidi sɔku u nɛɛ, kon ka nùn gana mɛnnawa. Nge mɛya u kua sere nɔn yiru, adama Dafidi u ye kpuro fuka ma Sɔɔlu u nùn kɔmia. 12Yen biru Sɔɔlu u Dafidi nasia, domi u gia ma Yinni Gusunɔ u nùn deri, ma u ka Dafidi wãa. 13Yera n dera u nùn dɛsirasia win bɔkun di u nùn kua tabu kowobu nɔrɔbun (1.000) tɔnwero. Ma Dafidi u Isireliba kpara tabu sɔɔ. 14Ye u gɔ̃ru doke u ko kpuro, ya ra koorewa, domi Yinni Gusunɔ u wãa ka wi. 15Ye Sɔɔlu u wa ye Dafidi u mɔ̀ kpuro ya ra koorewa, yera u nùn nasiam sosi. 16Adama Isireliba ka Yudaba kpuro ba Dafidi kĩa yèn sɔ̃ u bu kparamɔ ben tabu sɔɔ. 17Ma Sɔɔlu u Dafidi sɔ̃ɔwa u nɛɛ, nɛn bii wɔndia gbiikoo Mɛrabuwa kon nun kɛ̃ kurɔ. Adama a de a n sãa damgii kpa a Yinni Gusunɔ sanna. Domi Sɔɔlu u bwisika u nɛɛ, u ǹ kĩ u nùn go win tii, Filisitibara u koo nùn bɔrie. 18Adama Dafidi u Sɔɔlu wisa u nɛɛ, yinni, wara ra n nɛ. Mba nɛn yɛnugibu ka nɛn tundon bweseru n ka sere ko wunɛn dokiri. 19Adama saa ye Sɔɔlu u koo Dafidi Mɛrabu wi wɛ̃ kurɔ, saa yera u nùn sua u Adiriɛli, Mɛholagii wɛ̃ u sua kurɔ. 20N deema Sɔɔlun bii wɔndia goo, wi ba mɔ̀ Mikali, u Dafidi kĩ. Ye ba Sɔɔlu gari yi sɔ̃ɔwa, n nùn dore. 21Ma u nɛɛ, kon nùn wi kɛ̃, kpa u ko yina Filisitiba bu ka Dafidi nɔma turi. Ma u Dafidi sɔ̃ɔwa nɔn yiruse u nɛɛ, saa gisɔn di kaa ko nɛn dokiri. 22Ma Sɔɔlu u win bwãabu yiire bu ka Dafidi gari yi ko nɛkɛ nɛkɛ bu nɛɛ, wee, sunɔn nukura do wunɛn sɔ̃. Win bwãabu kpuro ba maa nun kĩ. Yen sɔ̃, a de a n sãa win dokiri. 23Ma ba da ba Dafidi gari yi nɔɔsia. Ma Dafidi u nɛɛ, bɛɛn nɔni sɔɔ gãa piimina mi? Bu nɛɛ, na sãa sunɔn dokiri? Nɛ bwɛ̃ɛbwɛ̃ɛwa wi ba kun garisi gãanu. 24Ma Sɔɔlun gɔro be, ba wura ba nùn Dafidin gari yi sɔ̃ɔwa. 25Sɔɔlu u nɛɛ, amɛniwa i ko i Dafidi sɔ̃ i nɛɛ, na ǹ dokirirun gãanu ganu kĩ, ma n kun mɔ Filisitiban sen sarusu wunɔbu (100). Yera ya ko n sãa mɔru kɔsiaru nɛn yibɛrɛban mi. Sɔɔlu u yeni gerumɔwa kpa Filisitiba bu ka Dafidi go. 26Ye ba da ba Dafidi gari yi sɔ̃ɔwa ya nùn dore u n ka sãa sunɔn dokiri. Tɔ̃ɔ te ba koo nùn kurɔ wɛ̃ tu sere turi, 27u seewa ka win tabu kowobu ba da ba Filisitiba go tɔnu goobu (200). Ma Dafidi u ka ben sen sarusu na u su gara tia tia u sunɔ wɛ̃. Saa yera Sɔɔlu u nùn win bii Mikali wɛ̃ kurɔ. 28Ye Sɔɔlu u gia ma Yinni Gusunɔ u ka Dafidi wãa, win bii Mikali u maa nùn kĩ gem gem, 29yera u nùn nasiam sosi. Ma u kua win yibɛrɛ win wãaru kpuro sɔɔ. 30Yen biru Filisitiban tabu sinambu ba ra n wɔraa naamɔ Isireliban mi. Dafidi ù n ka bu sanna, u ra nasara suewa n kere Sɔɔlun tabu tɔnwero be ba tie. Yen sɔ̃na u yĩsiru yara.

will be added

X\