Samuɛli I 17

1Yen biru Filisitiba ba ben tabu kowobu mɛnna ba tabun sɔɔru kua Sokoɔ Yudan temɔ. Ba ben sansani gira Efɛsi Damimuɔ, ye ya wãa Soko ka Asekan baa sɔɔ. 2Sɔɔlu ka Isireliba ben tii ba mɛnna ba ben sansani gira Elan wɔwa sɔɔ. Miya ba tabu kpĩ bu ka Filisitiba wɔri. 3Filisitiba ba yɔ̃ wɔwa yen bera gee, ma Isireliba ba maa yɔ̃ yen bera giɔ. 4Tabu durɔ goo u yarima Filisitiban sansanin di, u da u yɔ̃ra sansani yiru yen baa sɔɔ. Win yĩsira Goliati. Gatin diya u na. Ma win gunum tura gɔm soonu nɔɔba tia ka bɔnu. 5U sii gandun furɔ doke, ka sii gandun tarakpe ye ba kua nge swãa kokosu. Yen bunum mu kua kilo wata. 6U maa sii gandun kɔrɔm doke, ma u sii gandun yaasa bɛki. 7Yaasa yen buru ta sãawa nge weson dɛka ye u ra beku yasa tɛ̃ke. Yen bɛm bunum tura kilo nɔɔba yirun saka. Ma tabu kowo goo u nùn gbiiye u win tɛrɛru nɛni. 8Goliati wi, u yɔ̃ra u gbãra u Isireliban tabu kowobu sɔ̃ɔwa u nɛɛ, mban sɔ̃na i yarima i tabu sĩa kpĩ. I ǹ yɛ̃ ma nɛ Filisitiwa, bɛɛ maa Sɔɔlun yobu? I goo gɔsio bɛɛn suunu sɔɔ u na u ka man sanna. 9Ù n kpĩa u man kamia u go, nɛn tɔmbu bu ko bɛɛn yobu. Adama nà n nùn kamia na go, bɛɛya ko i ko bɛsɛn yobu, kpa i sun sã. 10Sannɔwa na kĩ gisɔ. I goo wunama wi u koo ka man sanna. 11Ye Sɔɔlu ka Isireliba kpuro ba Filisiti win gari yi nua, ma bɛrum bu mwa gem gem. 12Dafidi wee, u sãawa Isain bii. Isai wi, Efaratigiiwa wi u wãa Bɛtelehɛmuɔ Yudan temɔ. Bii tɔn durɔbu nɔɔba itawa u mara. Sɔɔlun waati ye sɔɔ, u sãawa durɔ tɔkɔru gem gem. 13Win bii bukurobu ita ba Sɔɔlu swĩi ba ka tabu da. Ben yĩsa wee, Eliabu ka Abinadabu ka Sama. 14Sanam mɛ ba wãa Sɔɔlun sansaniɔ, win bii dãako Dafidi 15u ra dewa Bɛtelehɛmuɔ u ka win tundon yãanu kpara kpa u gɔsirama Sɔɔlun mi. 16Saa ye sɔɔ, Goliati wi, u ra nɛwa Isireliban wuswaaɔ bururu ka yoka u ka tii bu sɔ̃ɔsi. Mɛya u kua sere sɔ̃ɔ weeru. 17Sɔ̃ɔ teeru Isai u win bii Dafidi sɔ̃ɔwa u nɛɛ, a gbere sɔndanu saaki tia suo ka pɛ̃ɛ wɔku te, kpa a ka wunɛn maabu daawa fuuku tabu gberɔ. 18A maa gasanu wɔku te suo a ben wuurun wirugii wɛ̃ kpa a wa nge bà n bwãa do, kpa a ka gãanu wurama ben min di ni nu koo man sɔ̃ɔsi ma a tura mi. 19Ba wãa ka Sɔɔlu ka Isireliban tabu kowobu Elan wɔwaɔ. Miya ba tabu mɔ̀ ka Filisitiba. 20Sisiru buru buru, Dafidi u seewa u yãa ni goo nɔmu sɔndia. Ma u win sɔmunu sua u doona nge mɛ Isai u nùn yiire. Ye u tura mi, u deema wee, tabu kowoba yarimamɔ ba tabun sɔɔru mɔ̀. Ba gbamgba soomɔ ba kuuki mɔ̀. 21Isireliba ka Filisitiba ba tabu tɛriamɔ. 22Dafidi u win sɔmunu sɔbia u yãnun kɔ̃so nɔmu bɛria, ma u duka da tabu gberɔ u win maabu deema u bu tɔbura. 23Sanam mɛ u ka bu gari mɔ̀, wee Filisitiban tabu durɔ Gatigii wi ba mɔ̀ Goliati u kurama saa Filisitiban tabu sĩan di. U win gari yi saarim seewa, ma Dafidi u yi nua. 24Ye Isireliba ba durɔ wi wa, be kpuro ba bɛrum soora gem gem ba duki yakikira. 25Ma ba mɔ̀, durɔ wi wee, u maa yarima u ka sun nɔɔ kasu. Wi u kpĩa u nùn go, sunɔ u koo yɛ̃ro dukia baka wɛ̃, kpa u nùn win bii wɔndia kɛ̃ kurɔ. Mɛya yɛ̃ron yɛnugiba ko n tii mɔ. Sunɔ kun maa bu gãanu bikiamɔ. 26Ma Dafidi u be ba wãa win bɔkuɔ bikia u nɛɛ, wara ra n Filisiti, bango sarirugii wi, u sere ka bɛsɛ Gusunɔn tabu kowobu nɔɔ kasu. Mba ba koo yɛ̃ro wɛ̃ wi u nùn go, ma u Isireliba sekuru yara. 27Ba nùn sɔ̃ɔwa ye ba raa gerunamɔ. Ba nɛɛ, yeni ka yeniwa ba koo yɛ̃ro wɛ̃ wi u nùn go. 28Ye Eliabu Dafidin mɔɔ tɔnwero u nua Dafidi u gari mɔ̀ ka tɔn be, u ka nùn mɔru kua u nùn bikia u nɛɛ, wara a sere yãa gɔ̃ɔ piibu ge deria gbaburɔ. Na wunɛn anayisiru yɛ̃ ka wunɛn woo bɔbunu. Na yɛ̃ ma a na a ka tabu mɛɛriwa. 29Dafidi u wisa u nɛɛ, mba n kua. Baa gari na ǹ kpɛ̃ n bikia? 30Ma u nùn biru kisi u da u goo gari bikia. Yera ba nùn wisa nge mɛ gbiikoba raa gerua. 31Be ba nua ye Dafidi u gerua, yera ba da ba Sɔɔlu saaria. Ma Sɔɔlu u Dafidi sokusia. 32Dafidi u Sɔɔlu sɔ̃ɔwa u nɛɛ, a ku de goon tororu tu kara Filisiti win sɔ̃, yinni, kon da n ka nùn sanna. 33Sɔɔlu u nɛɛ, a ǹ kpɛ̃ a susi Filisiti win mi, a sere ka nùn sanna. Domi wunɛ bii piibuwa gina. Durɔ wi, u maa sãawa tabu durɔ saa win aluwaasirun di. 34Ma Dafidi u Sɔɔlu sɔ̃ɔwa u nɛɛ, na raa sãawa nɛn tundon yãa kparo. Gbee sunɔ, ǹ kun mɛ yaa kɔ̃sa gaa yà n na ya yãa teeru mwa yãa gɔ̃ɔ sɔɔ, 35na ra ye naa girewa kpa n ye so n yãa te wɔra yen nɔɔn di. Yà n man sĩirema yen nɔɔ gbiniya na ra nɛnɛ n ka ye so n go. 36Yinni na yaa kɔ̃si goore. Nge mɛya kon maa Filisiti bango sarirugii wini go nge yen tia, domi u Gusunɔn tabu kowobu nɔɔ kasu. 37Yinni Gusunɔ wi u man wɔra saa gbee sunɔ ka yaa kɔ̃sa yen min di u koo maa man wɔra Filisiti win nɔman di. Ma Sɔɔlu u nɛɛ, a doo kpa Yinni Gusunɔ u nun yɔ̃re. 38Ma Sɔɔlu u win tiin tabu yãnu kpuro sua u Dafidi sebusia. Niya tarakpe ka sii gandun furɔ, 39ka takobi. Yen biruwa Dafidi u kookari kua u ka sĩ, domi u ǹ yen dɔɔnɛ mɔ. Adama u Sɔɔlu sɔ̃ɔwa u nɛɛ, na ǹ kpɛ̃ n ka yeniba kpuro sĩ, domi na ǹ yen dɔɔnɛ mɔ. Ma u ye pota u yi. 40Yera u win dɛka sua u da u kpee gori nɔɔbu dɔbura daarɔ u yi doke win kpara bɔɔrɔ ma u win kpurantɛɛru sua u susi Filisiti win mi. 41Saa ye sɔɔ, Filisiti wi, u win tɛrɛ nɛnɔ gbiisie ba ka susimɔ ba dɔɔ Dafidin mi. 42Ye Filisiti wi, u Dafidi mɛɛra tii, u wa ma aluwaasi kpɛmbuwa, tɔn swãa durɔ burɔ, yera u nùn gɛma. 43Ma u nùn sɔ̃ɔwa u nɛɛ, nɛ bɔ̃ɔwa a ka sere dɛki suama a man kasu? Yera u Dafidi bɔ̃rusi ka win bũnun yĩsiru. 44Ma u nɛɛ, a susima, kon de gunɔsu ka gbeeku yɛɛ yu wunɛn yaa di. 45Dafidi wi, u Filisiti wi sɔ̃ɔwa u nɛɛ, wunɛ wee a ka man sannɔ wee ka takobi ka yaasa ka saka. Adama nɛ, na ka nun sannɔ weewa ka Gusunɔ wɔllu ka tem Yinnin yĩsiru, wi u maa sãa Isireliban tabu kowobun Yinni wi a nɔɔ kasu. 46Gisɔ Yinni Gusunɔ u koo man nun nɔmu bɛria. Kon nun so n sura kpa n wunɛn wiru bura. Gisɔ kon Filisitiban tabu kowobun gonu gunɔsu ka gbeeku yɛɛ wɛ̃ yi di. Kpa handuniagibu kpuro bu gia ma Gusunɔ Isireliban Yinni u dam mɔ. 47Be ba wãa mini kpuro ba koo wa ma Yinni Gusunɔ kun takobi ka yaasan bukata mɔ u ka tɔnu faaba ko. Domi wiya u ra tabu di. U koo sun bɛɛ nɔmu bɛria. 48Saa ye Filisiti wi, u susimɔ u ka Dafidi wɔri, saa yera Dafidin tii u maa duka dɔɔ Filisitiban tabu sĩaɔ u ka nùn yinna. 49Ma u win nɔmu kpɛ̃ɛ kpara bɔɔ te sɔɔ u kperu wuna u bɛri win kpurantɛɛru sɔɔ. Ma u Filisiti wi kpee te kara ta da ta numa win sirikanaɔ ma u wɔruma u kibari. 50Kpurantɛɛrun kpee teera Dafidi u ka Filisiti wi kamia. Ye u nùn sura baa takobi u ǹ nɛni. 51Ma u duka da u durɔ win takobi woma yen kararun di u ka nùn go u wiru bura. Ye Filisitiba ba wa ma ben tabu durɔ wi, u gu, yera ba duki yarina. 52Yera Isireliban tabu durɔbu ka Yudaba ba seewa ba Filisitiba fɛɛrisi ka tabun wurenu ba bu gira sere Gati ka Ekoronin kɔnnɔwɔ, ma Filisitiban gonu wɔruka Saaraimun swaaɔ sere ka Gatiɔ n ka girari Ekoroniɔ. 53Ma Isireliba ba gɔsirama ba Filisitiban sansani wɔri ba ben yãnu gura. 54Yen biru Dafidi u Goliatin wiru sua u ka da Yerusalɛmuɔ. Adama ye ya sãa Goliatin tabu yãnu kpuro u ni yiwa win tiin kurɔ. 55Saa ye Sɔɔlu u Dafidi wa u dɔɔ u ka Filisiti wi sanna, yera u win tabu sunɔ Abinɛɛ bikia u nɛɛ, Abinɛɛ, weren biiwa bii durɔbu geni. Abinɛɛ u wisa u nɛɛ, sere ka wunɛn wãaru, na ǹ yɛ̃. 56Ma sunɔ u nɛɛ, a bikio kpa a nɔ ǹ n weren biin na. 57Ye Dafidi u Filisiti wi go u kpa u win wiru bura u nɛni u ka wee, yera Abinɛɛ u ka nùn da Sɔɔlun mi. 58Sɔɔlu u nùn bikia u nɛɛ, bii wunɛ, weren biiwa wunɛ. Dafidi u nɛɛ, Isai, wunɛn bɔ̃ɔ wi u wãa Bɛtelehɛmuɔ, wiya u man mara.

will be added

X\