Samuɛli I 16

1Yinni Gusunɔ u Samuɛli sɔ̃ɔwa u nɛɛ, sere saa yerà kaa n wãa a n Sɔɔlu swĩiyammɛ. Domi na nùn bandu yara. U ǹ maa kpɛ̃ u bandu di Isireliba sɔɔ. Yen sɔ̃, a gum yibio wunɛn kɔba ye sɔɔ kpa n nun gɔri a da Isai, Bɛtelehɛmugiin mi. Domi na win bii turo gɔsa u ka ko sunɔ wi na kĩ. 2Adama Samuɛli nɛɛ, amɔna kon ko n ka da mi, domi Sɔɔlu ù n ye nua, u koo man go. Ma Yinni Gusunɔ u nɛɛ, a naa gbiiba suo kpa a nɛɛ, a nawa a ka man yãkuru kua. 3Kpa a Isai soku yãku yeru mi. Miya kon nun sɔ̃ ye kaa ko. Yera a gum tãre wi kon nun sɔ̃ɔsin wirɔ. 4Samuɛli u kua nge mɛ Yinni Gusunɔ u nùn sɔ̃ɔwa. Ye u na Bɛtelehɛmuɔ, yera wuu gen guro gurobu ba na win mi ka bɛrum ba nɛɛ, n ka sere do mɛ? 5Ma Samuɛli u bu wisa u nɛɛ, n do gbãa gbãa. Na nawa n ka Yinni Gusunɔ yãkuru kua. I bɛɛn tii disi wunario kpa i na yãku yerɔ. Ma Samuɛli u maa Isai ka win bii tɔn durɔbu soka. Ba tii disi wunari ba na yãku yeru mi. 6Saa ye be kpuro ba tunuma, yera Samuɛli u Eliabu wa. Ma u bwisika u nɛɛ, à n da wiya mi, wi Yinni Gusunɔ u gɔsa. 7Adama Yinni Gusunɔ u Samuɛli sɔ̃ɔwa u nɛɛ, a ku win wasin buram mɛɛri, ǹ kun mɛ win gunum, n ǹ wi, na gɔsa. Domi nɛ, Yinni Gusunɔ, na ku ra wasin buram mɛɛri nge tɔnu. Gɔ̃ruwa na ra mɛɛri. 8Ma Isai u Abinadabu soka, u dera u susi Samuɛlin wuswaaɔ. Ma Samuɛli u nɛɛ, Yinni Gusunɔ kun maa wini gɔsa. 9Ma Isai u dera Sama u susi Samuɛlin wuswaaɔ. Adama Samuɛli u nɛɛ, Yinni Gusunɔ kun winin tii gɔsa. 10Isai u dera win bibu nɔɔba yiru ba susi Samuɛlin wuswaaɔ. Adama Samuɛli u nùn sɔ̃ɔwa u nɛɛ, Yinni kun ben goo gɔsa. 11Ma u Isai bikia u nɛɛ, wunɛn bii tɔn durɔbu kpurowa mini? Isai u nùn wisa u nɛɛ, ben dãako wi ba mɔ̀ Dafidi, wiya u woo, u yãanu kparamɔ. Yera Samuɛli u nɛɛ, a de bu nùn kasuma. Domi sa ǹ kpɛ̃ su yãkuru ko ma n kun mɔ u na. 12Ma Isai u dera ba nùn kaso da ba ka na. Dafidi wi, u sãawa tɔn swãɔ, u wasi bwãa do, u maa waabu wã. Ma Yinni Gusunɔ u nɛɛ, a seewo a nùn gum mɛ tãre domi wiya na gɔsa. 13Yera Samuɛli u win kɔba ye sua u nùn gum mɛ tãre win maabun wuswaaɔ. Ma Gusunɔn Hunde u Dafidi yɔɔwa saa dɔma ten di. Yen biru Samuɛli u gɔsira u wura Ramaɔ. 14Yen biru Gusunɔn Hunde u Sɔɔlu deri ma Yinni Gusunɔ u dera hunde kɔ̃sa ya nùn tɔ̃ya mɔ̀. 15Ma Sɔɔlun bwãabu ba nùn sɔ̃ɔwa ba nɛɛ, wee Yinni Gusunɔ u dera hunde kɔ̃sa ya nun tɔ̃ya mɔ̀. 16Ǹ n mɛn na, bɛsɛn yinni, a de su goo kasu wi u mɔrɔku soberu yɛ̃. Yinni Gusunɔ ù n dera hunde kɔ̃sa ya nun seeri, kpa u mɔrɔku ge so kpa yu sara. 17Ma Sɔɔlu u win bwãa be wisa u nɛɛ, i doo i goo kasu wi u mɔrɔku soberu yɛ̃ sãa sãa kpa i ka nùn na nɛn mi. 18Ma win bɔ̃ɔ turo u nɛɛ, na Isai Bɛtelehɛmugiin bii turo waare wi u mɔrɔku soberu yɛ̃. U maa wɔrugɔru mɔ gem gem, u sãawa tabu durɔ, u ra maa gari gere ka laakari. Durɔ burɔn tiiwa. Yinni Gusunɔ maa wãa ka wi. 19Yera Sɔɔlu u gɔra Isain mi, u nɛɛ, a man wunɛn bii Dafidi yãa kparo wi kɛ̃ɛma u na nɛn mi. 20Ma Isai u pɛ̃ɛ sua ka tam mɛ ba doke yaa gɔnan bɔɔru sɔɔ, ka boo kpɛmu, u ye kpuro kɛtɛku sɔbi. Ma u Dafidi swaa sure ka yãa ni kpuro u da Sɔɔlun mi. 21Ye u tura mi, u kua win bɔ̃ɔ. Sɔɔlu u nùn kĩa gem gem ma u nùn kua win tabu yãa sɔwo. 22Ma Sɔɔlu u maa gɔra Isain mi, u nɛɛ, a man Dafidi derio u n sãa nɛn sɔm kowo, domi win daa ya man dore. 23Saa dɔma ten di, Yinni Gusunɔ ù n dera hunde kɔ̃sa ya Sɔɔlu seeri, Dafidi u ra win mɔrɔku suewa u so, kpa hunde kɔ̃sa ye, yu sara. Kpa win laakari yu wurama mam mam.

will be added

X\