Samuɛli I 12

1Samuɛli u Isireliba kpuro sɔ̃ɔwa u nɛɛ, wee na bɛɛn gere wura gãanu kpuro sɔɔ ma na bɛɛ sunɔ kua. 2Tɛ̃ wiya u koo bɛɛ kpara, domi na tɔkɔ kua, nɛn seri burura, nɛn biba maa bukura nge bɛɛ. Wee na bɛɛ kpara saa nɛn aluwaasirun di sere n ka girari gisɔ. 3I man seeda diiyo Yinni Gusunɔ ka sunɔ wi u gɔsan wuswaaɔ. Waran kɛtɛwa na mwaare. Ǹ kun mɛ, weren kɛtɛkuwa na mwa. Wara na taki diire. Ǹ kun mɛ, wara na dam dɔrere. Nge weren kɛ̃ra na mwaare n ka nùn gem wɛ̃. Wi na yen gaa kuare, kon yɛ̃ro yen dibu kɔsia. 4Ba nɛɛ, a ǹ sun taki diire, a ǹ maa sun dam dɔrere. Mɛya a ǹ maa bɛsɛn goon kɛ̃ru mwaare a ka nùn gem wɛ̃. 5Samuɛli u bu sɔ̃ɔwa u nɛɛ, Yinni Gusunɔ ka sunɔ wi u gɔsa ba sãa seeda gisɔ ma i ǹ kɔ̃sa gaa wa nɛ sɔɔ. Ba nɛɛ, mɛya. 6Yera Samuɛli u kpam bu sɔ̃ɔwa u nɛɛ, Yinni Gusunɔwa u sãa nɛn seeda, wi, wi u Mɔwisi ka Aroni gɔsa ma u bɛɛn baababa yarama saa Egibitin tem di. 7Ǹ n mɛn na, i yɔ̃ro sɛ̃ɛ tɛ̃, kpa i bɛɛn taarɛ nɔ Yinni Gusunɔn wuswaaɔ. Kon bɛɛ win sɔm geenu yaayasia ni u kua bɛɛ ka bɛɛn baababan sɔ̃. 8Yakɔbu ka wigibu ba da Egibitiɔ. Ma Egibitigibu ba ben bibun bweseru nɔni sɔ̃ɔwa, ma ba Yinni Gusunɔ nɔɔgiru sue u ka bu somi. Ma u bu Mɔwisi ka Aroni gɔria. Beya ba bu yara Egibitin di, ma ba dera ba sina tem mini. 9Adama ba Gusunɔ ben Yinni wi duari. Ma u bu Hasorin tabu sunɔ Sisera nɔmu sɔndia ka Filisitiba ka Mɔabun sunɔ. Be kpurowa ba ka bu tabu kua ba bu kamia. 10Yera ba Yinni Gusunɔ soka ba nùn sɔ̃ɔwa ba nɛɛ, ba durum kua domi ba nùn deri ba bũu tɔn durɔ be ba mɔ̀ Baaliba ka bũu tɔn kurɔ wi ba mɔ̀ Asitaate sãamɔ. Adama ù n bu wɔra ben yibɛrɛban nɔman di, ba koo nu deri bu nùn sã. 11Ma Yinni Gusunɔ u bu Gedeoni gɔriama ka Baraki ka Yɛfite ka sere maa nɛ Samuɛli. Ma u bɛɛ wɔra saa bɛɛn yibɛrɛban nɔman di be ba bɛɛ sikerenɛ, ma i sina ka alafia. 12Adama sanam mɛ i wa ma Amɔniban sunɔ Nakasi u bɛɛ tabu wɔrim wee, yera i man sɔ̃ɔwa i nɛɛ, sunɔwa i kĩ u bɛɛ kpara, baa mɛ Yinni Gusunɔ u bandu dii bɛɛn suunu sɔɔ. 13I nùn sunɔ bikia, ma u bɛɛ nùn wɛ̃. Sunɔ wi i kĩ mi, wi wee mi tɛ̃. 14Ì n Yinni Gusunɔ nasie, ì n nùn sãamɔ, ì n win gari mɛm nɔɔwammɛ, ma i ǹ win gere yinɛ, ma i nùn swĩi dee dee, bɛɛ ka bɛɛn sunɔ wi u bɛɛ kpare, i ko i gea wa. 15Adama ì kun win gari mɛm nɔɔwɛ, ma i win gere yina, u koo bɛɛ nɔma doke nge mɛ u bɛɛn baababa kua. 16Tɛ̃, i yɔ̃ro i wa gãa baka ni Yinni Gusunɔ u koo ko bɛɛn wuswaaɔ. 17N ǹ doo gɛ̃ɛrun saawa sa wãa mi tɛ̃? Kon Yinni Gusunɔ kana u de gura yu nɛ ka gbãsukunu. Sanam mɛya i ko gia ma durum baka i kua win mi, ye i ka tii sunɔ bikia. 18Ma Samuɛli u Yinni Gusunɔ kana. Gura na tɔ̃ɔ te sɔɔ, ka gbãsukunu. Yera tɔn be kpuro ba Yinni Gusunɔ ka Samuɛli nasia. 19Ma be kpuro ba Samuɛli sɔ̃ɔwa ba nɛɛ, a Gusunɔ wunɛn Yinni kanɔ bɛsɛ wunɛn bwãabun sɔ̃ kpa su ku ra gbi yèn sɔ̃ sa kpam durum sosi bɛsɛn durum gura sɔɔ domi sa tii sunɔ bikia. 20Ma Samuɛli u bu wisa u nɛɛ, i ku nanda. Geema, i kɔ̃sa ye kpuro kua, adama i ku maa gɛra Yinni Gusunɔn swaan di. I nùn sãawɔ ka bɛɛn gɔ̃ru kpuro. 21I ku gɛra i bũnu swĩi. Nu ǹ arufaani gaa mɔ, nu ǹ maa kpɛ̃ nu bɛɛ faaba ko, domi kama nu sãa. 22Yinni Gusunɔ u gɔ̃ru doke u bɛɛ ko win tɔmbu, u ǹ maa bɛɛ yinamɔ win yĩsi bakarun bɛɛrɛn sɔ̃. 23Nɛn tii maa Gusunɔ u man gbara bu nɛɛ, na ǹ maa bɛɛ kanaru kuammɛ. Domi yeya n ko n sãa nɛn durum win mi. Ko na n bɛɛ swaa gea sɔ̃ɔsimɔwa ye ya dɛnde. 24I n gesi Yinni Gusunɔ nasie kpa i n nùn sãamɔ ka nuku tia ka bɛɛn gɔ̃rusu kpuro, kpa i n yaaye gãa baka ni u bɛɛ kua. 25Adama ì n daa kɔ̃sa mɔ̀, i ko i kam kowa bɛɛ ka bɛɛn sunɔ wi.

will be added

X\