Samuɛli I 10

1Ma Samuɛli u gum kparaba piibu sua u gen gum tãre Sɔɔlun wirɔ u nùn bɔkasi u nɛɛ, na yeni kuawa a n ka yɛ̃ ma Yinni Gusunɔwa u nun gɔsa a ka ko win tɔmbun sunɔ. 2Sà n yarina minin di tɛ̃, kaa ka durɔbu yiru gabu yinna Sɛɛtakiɔ, Bɛnyamɛɛn temɔ Rasɛlin sikirun bɔkuɔ. Ba koo nun sɔ̃ bu nɛɛ, kɛtɛku ni a kaso da mi, ba nu wa kɔ. Wunɛn baa u ǹ maa nin bwisikunu mɔ̀, wunɛn tiin bwisikuna u mɔ̀. U tii bikiamɔ, amɔna u koo ko win biin sɔ̃. 3Kpa a sara a da sere Taborin dãa baka ten mi. Kaa ka durɔbu ita gabu yinna be ba dɔɔ Betɛliɔ bu ka Yinni Gusunɔ sã. Ben turo u ko n boo binu ita sɔɔwa, turo ko n pɛ̃ɛ ita nɛni, kpa turo u n maa tam kparaba nɛni. 4Ba koo nun tɔbiri kpa bu nun pɛ̃ɛ yiru wɛ̃ kpa a ye mwa. 5Yen biru kaa da sere gunguru mi ba ra Gusunɔ sã te ba mɔ̀ Gibea. Miya Filisitiban tabu kowo wuuru gara wãa. Saa ye a duɔ wuu ge sɔɔ, kaa ka Gusunɔn sɔmɔbun wuuru garu yinna be ba saram wee gunguu ten min di, ba girigbo ka bwãaru ka guuru ka mɔrɔku soomɔ, ba Yinni Gusunɔ sãamɔ. 6Saa ye, Yinni Gusunɔn Hunde u koo nun yɔ kpa a ko tɔn kpao kpa a n Yinni Gusunɔ sãamɔ ka win sɔmɔ be sannu. 7Saa ye yĩrenu ita ye, ya nun koora ya kpa, a koowo kpuro ye wunɛn nɔma ya baba domi Yinni Gusunɔ u wãa ka wunɛ. 8Kpa a man gbiiya a da Giligaliɔ a man ma mi sɔ̃ɔ nɔɔba yiru. Miya kon nun deema kpa n yãku dɔ̃ɔ mwaararuginu ko ka maa siarabun yãkunu kpa n nun sɔ̃ɔsi ye n weenɛ a ko. 9Sanam mɛ Sɔɔlu u Samuɛli biru kisi u doonɔ, Gusunɔ u win gɔ̃ru gɔsia kpɔɔ, ma yĩre ni kpuro nu koora tɔ̃ɔ te sɔɔ. 10Sanam mɛ Sɔɔlu ka win sɔm kowo ba tura Gibeaɔ, Gusunɔn sɔmɔbun wuuru gara ka bu yinna. Yera Gusunɔn Hunde u Sɔɔlu yɔɔwa, ma u Gusunɔ sãaru wɔri ben suunu sɔɔ. 11Be ba raa nùn yɛ̃ kpuro, ye ba nùn wa u Gusunɔ sãamɔ sɔmɔ ben suunu sɔɔ mɛ, yera ba bikiamɔ ba mɔ̀, mba n Kisin bii Sɔɔlu deema. U tɛ̃ sãawa Gusunɔn sɔmɔ? 12Wuu gen tɔnu goo u wisa u nɛɛ, wara sɔmɔ ben tiin baaba. Yen sɔ̃na ba ra mɔndu ko bu nɛɛ, Sɔɔlu tɛ̃ sãawa Gusunɔn sɔmɔ? 13Saa ye Sɔɔlu u sãa te kua u kpa, ma u da gunguu ten mi. 14Yera win baa yãkabu u nùn bikia u nɛɛ, mana i da ka wunɛn sɔm kowo. Sɔɔlu u nùn wisa u nɛɛ, sa kɛtɛkunu kaso dawa, adama sa ǹ nu wa. Ma sa da Samuɛlin mi. 15Yera baa yãkabu wi, u nɛɛ, a man sɔ̃ɔwɔ ye Samuɛli u nun sɔ̃ɔwa. 16Ma Sɔɔlu u nɛɛ, u sun sɔ̃ɔwa dim dim ma ba kɛtɛku ni wa. Adama u ǹ nùn bandun gari sɔ̃ɔwa yi Samuɛli u gerua. 17Yen biru Samuɛli u Isireliba kpuro sokusia ba mɛnna Yinni Gusunɔn sãa yerɔ Misipaɔ. 18Ma u bu sɔ̃ɔwa u nɛɛ, amɛniwa Gusunɔ bɛɛ Isireliban Yinni u gerua. U nɛɛ, u bɛɛ yarama Egibitin di ma u bɛɛ wɔra Egibitigibun nɔman di, ka bwesenu kpuro ni nu raa bɛɛ dam dɔremɔn nɔman di. 19Adama wee, i nùn yina gisɔ, wi u bɛɛ faaba kua bɛɛn wahala ka bɛɛn nɔni swãarun di. Ma i nɛɛ, u bɛɛ sunɔ kuo, u bɛɛ kpara. Ǹ n mɛn na, i yarima bweseru ka bweseru, kpa i tii tusia yɛnu ka yɛnu win wuswaaɔ. 20Ma Samuɛli u dera Isireliban bwesenu kpuro nu susi nu tii tusia. Yera Gusunɔ u sɔ̃ɔsi ka yĩreru ma u Bɛnyamɛɛn bweseru gɔsa. 21Yen biru Samuɛli u dera Bɛnyamɛɛn tɔmbu ba susi ba tii tusia yɛnu ka yɛnu ma Gusunɔ u Matirin yɛnu gɔsa. Matirin yɛnu ge sɔɔ, Kisin bii Sɔɔluwa u gɔsa. Adama ye ba nùn soka soka ba ǹ nùn wa. 22Yen sɔ̃na ba kpam Yinni Gusunɔ bikia ba nɛɛ, durɔ wi, u tunuma kɔ mini? Ma Yinni Gusunɔ u nɛɛ, oo, wee, u kukua tɔmbun yãnu sɔɔ. 23Ba duki da mi, ma ba ka nùn na. Ye u yɔ̃ra tɔmbun suunu sɔɔ, be kpuron gunum mu yɔ̃rawa win serɔ. 24Ma Samuɛli u tɔn be kpuro sɔ̃ɔwa u nɛɛ, durɔ wi wee, wi Yinni Gusunɔ u gɔsa. Goo maa sari bɛɛ kpuro sɔɔ wi u ka nùn nɛ. Ma tɔn be kpuro ba kuuki kua ma ba nɛɛ, sunɔn hunde yu dakaa da. 25Ma Samuɛli u bu sinandun wooda tusia, ma u ye yorua tireru sɔɔ u yi Gusunɔn sãa yerɔ. Yen biru u tɔn be kpuro kara, ben baawure u da win yɛnuɔ. 26Sɔɔlun tii u maa da win yɛnuɔ Gibeaɔ. N deema Gusunɔ u tabu durɔ damgibu gabun gɔ̃ruɔ doke bu nùn swĩi. 27Adama aluwaasi garu ko sariba gabu ba gerumɔ ba mɔ̀, durɔ winiwa u koo kpĩ u sun faaba ko? Ma ba nùn gɛma ba ǹ ka nùn kɛ̃ru naawɛ. Adama Sɔɔlu kun gɛɛ gerua.

will be added

X\