1 Durɔ goo u wãa Efaraimun bweseru sɔɔ, win yĩsira Ɛlikana. Win wuuwa Ramataimu Sofimu, Efaraimun guunun bera gia. U sãawa Yerohamun bii. N deema Sufuwa u Tohu mara. Tohu u Elihu mara. Ma Elihu u Yerohamu wi mara. 2 Ɛlikana wi, u kurɔbu yiru mɔ. Gbiikoon yĩsira Hana, yirusen yĩsira Penina. Ma Penina u bibu mara adama Hana u ǹ bii marure. 3 Wɔ̃ɔ baagere durɔ wi, u ra win wuu deriwa u da Siloɔ u Gusunɔ wɔllu ka tem Yinni sã, kpa u yãkuru ko mi, mi Elin bibu yiru Hofini ka Finɛɛsi ba wãa be ba sãa Yinni Gusunɔn yãku kowobu. 4 Ɛlikana ù n yãkuru kua, u ra Penina ka maa win bii tɔn durɔbu ka tɔn kurɔbu ben yãku yaa wɛ̃wa. 5 Adama Hanagia u ra de ya n kpãaru bo. Domi u nùn kĩ baa mɛ Yinni Gusunɔ u nùn kua wĩro. 6 Adama win nisi u ra n nùn nɔɔ kuurimɔwa win wĩro ten saabu. 7 Mɛya u ra nùn kue wɔ̃ɔ baagere. Hana ù n tura Yinni Gusunɔn sãa yeru mi, win nisi u ra nùn nɔɔ kuuriwa sere u swĩ, kpa u kun di. 8 Kpa win durɔ Ɛlikana u nùn bikia u nɛɛ, Hana, mba n kua a ka sumɔ. Mban sɔ̃na a ǹ dimɔ. Mba n kua wunɛn nuki ra n ka sankire. Nɛ ka wunɛn wãasinaa ya ǹ kere bii tɔn durɔbu wɔkuru? 9 Sɔ̃ɔ teeru ye ba di ba kpa, yera Hana u seewa ka nuku sankira bakanu u da u Yinni Gusunɔ kanamɔ ka swĩi. U nɔɔ mwɛɛru kua ka bɔ̃ri u nɛɛ, Gusunɔ, wɔllu ka tem Yinni, a de a nɛ wunɛn yoon nɔni swãaru wa, kpa a man yaaya, a ku man duari. À n man bii tɔn durɔ kã, kon de u n sãa wunɛgii win wãaru kpuro sɔɔ. Mɛya kɔ̃ɔ ga ǹ win wiru babamɔ baa nɔn teeru. N deema Eli wi u sãa yãku kowo tɔnwero u sɔ̃ kitarɔ Yinni Gusunɔn sãa yerun kɔnnɔwɔ. 12 Nge mɛ Hana u kana te mɔ̀ kpeetim sari, yera Eli u win nɔɔ mɛɛra tii. 13 Hana u gari mɔ̀wa gɔ̃ruɔ, win nɔɔ ga mɔ̀ sumi sumi, adama u ǹ gari gerua u yare goo u nɔ. Yen sɔ̃na Eli u tamaa tama u nɔra too. 14 Ma u nùn sɔ̃ɔwa u nɛɛ, sere domma kaa de tam mu n nun goomɔ. A wunɛn tam nɔru bi derio. 15 Hana u nùn wisa u nɛɛ, n ǹ mɛ, yinni. Na ǹ tam gam nɔra. Nɛ tɔn kurɔ nuku sankiranugiiwa. Nɛn gɔ̃run gariya na Yinni Gusunɔ sɔ̃ɔmɔ. 16 A ku nɛ wunɛn bii garisi nge bii kam. Nɛn nuku sankira bakanun saabuwa na kanaru mɔ̀ sere ka tɛ̃. 17 Saa yera Eli u nùn wurari u nɛɛ, a doo ka alafia kpa Isireliban Yinni u nun wɛ̃ ye a nùn bikia. 18 Ma Hana u nùn nɔɔ kana u nɛɛ, a ka man wunɛn nɔnu geu mɛɛrio. Ma u doona. U da u di. U ǹ maa mɔrua. 19 Ma ba seewa buru buru yellu ba Yinni Gusunɔ sãwa ba sere swaa wɔri ba sĩa ben wuuɔ Ramaɔ. Ɛlikana u ka Hana mɛnna, ma Gusunɔ u Hanan kanaru mwa. 20 Sanam dɔɔ sanam wee, Hana u gura sua u bii tɔn durɔ mara. U nùn yĩsiru kã Samuɛli u nɛɛ, domi na nùn nɔna kuawa Yinni Gusunɔn mi. 21 Ye wɔ̃ɔ ga kpam wurama, Ɛlikana u seewa ka win yɛnugibu kpuro, ba dɔɔ bu ka wɔ̃ɔ ka wɔ̃ɔn yãkuru ko Yinni Gusunɔn sãa yerɔ kpa u ka win nɔɔ mwɛɛru yibia. 22 Adama Hana u ǹ de. U win durɔ sɔ̃ɔwawa u nɛɛ, n kua ù n bii wi bɔm kara, yera u koo ka nùn da kpa bu nùn Yinni Gusunɔ tusia kpa u nùn deri mi, sere ka baadommaɔ. 23 Win durɔ Ɛlikana u nùn wisa u nɛɛ, a koowo nge mɛ n wã wunɛn nɔni sɔɔ. A sinɔ sere à n bii wi bɔm kara kpa Yinni Gusunɔ u de wunɛn gari yi koora. Ma kurɔ wi, u sina u win bii bɔm kɛ̃mɔ sere u ra ka nùn bɔm kara. 24 Ye u nùn bɔm mɛ kara u kpa, ye ba maa wɔ̃ɔ ka wɔ̃ɔn yãkuru dɔɔ, ma u ka nùn da ka naa kinɛru wɔ̃ɔ itagiru ka som saaki kpiriru ka tam bwãa teeru. Yera u ka da Silo mi, Yinni Gusunɔn sãa yerɔ. Sanam mɛ, bii wi, u ǹ kpã. 25 Ba naa kinɛ te saka, ma ba ka bii wi da Elin mi. 26 Ma Hana u gerua u nɛɛ, nɛn yinni, a man gafara kuo. Sere ka wunɛn wãaru, nɛna kurɔ wi u dɔma te yɔ̃ra wunɛn bɔkuɔ mini, u kanaru kua Yinni Gusunɔn mi. 27 Bii winiwa na kana, ma Yinni Gusunɔ u nɛn kanaru mwa u man nùn kã. 28 Yen sɔ̃na na kĩ n nùn Yinni Gusunɔ wɛ̃ kpa u n sãa wigii win wãaru kpuro sɔɔ ma ba yiira ba Yinni Gusunɔ sãwa.
