Sinambu I 22

1Isireliba ka Sirigibu ba kua wɔ̃ɔ yiru ben goo kun goo tabu wɔri. 2Wɔ̃ɔ itase sɔɔ, ye Yosafati Yudaban sina boko u na Isireliban sina bokon mi, 3yera Isireliban sina boko u win bwãabu sɔ̃ɔwa u nɛɛ, i yɛ̃ ma Ramɔti ye ya wãa Galadin temɔ ya sãawa bɛsɛgia? Mban sɔ̃na sa ǹ ko ye mwa Sirin sunɔn nɔman di. 4Ma u Yosafati bikia u nɛɛ, kaa ka man taa bi da Ramɔtiɔ Galadin temɔ? Yosafati u nùn wisa u nɛɛ, à n sɔɔru kpa na kpawa mi. Wunɛn tɔmbu bà n seewa, nɛgiba maa seewawa mi. Mɛya maa nɛn maasɔbu. 5Ma Yosafati u maa nɛɛ, na nun kanamɔ, a gina Yinni Gusunɔ bikio a nɔ mɛ u koo nun sɔ̃. 6Saa yera Isireliban sina boko u sɔmɔbu mɛnna nge tɔnu nɛɛrun (400) saka. Ma u bu bikia u nɛɛ, n doo Ramɔtiɔ Galadin temɔ n ka Sirigibu tabu ko? Nge n ku da. Yera sɔmɔ be, ba nùn wisa ba nɛɛ, a doo. Yinni Gusunɔ u koo nun ye nɔmu bɛria. 7Adama Yosafati u bikia u nɛɛ, Yinni Gusunɔn sɔmɔ goo sari mini wìn min di sa ko kpĩ su Yinni Gusunɔn gere nɔ? 8Isireliban sina boko u nɛɛ, Gusunɔn sɔmɔ turowa u wãa mini, wìn min di sa ko kpĩ su Yinni Gusunɔn gere nɔ. Adama na nùn tusa. Domi u ku ra man gãa geenu sɔ̃. Sɔmɔ win yĩsira Misee Yimilan bii. Ma Yosafati u nùn sɔ̃ɔwa u nɛɛ, sina boko, a ku gere mɛ. 9Yera Isireliban sina boko wi, u win sɔm kowo gɔra u nɛɛ, u doo u Misee Yimilan bii wi sokuma fuuku. 10Ma Isireliban sina boko wi, ka Yosafati Yudaban sina boko ba ben sina yãnu doke, ben baawure u sɔ̃ win sina kitarɔ, Samarin gbãra kɔnnɔwɔ. Ma sɔmɔ be, ba wãa ben wuswaaɔ ba gari mɔ̀. 11Yera Sedesiasi Kenaanan bii u sisun kɔbunu seka. Ma u nɛɛ, amɛniwa Yinni Gusunɔ u gerua, kɔbi yini, yi sãawa yĩreru te ta wunɛn dam sɔ̃ɔsimɔ mɛ kaa ka Sirigibu go. 12Nge mɛya sɔmɔ be kpuro, ba gerumɔ ba mɔ̀, a doo Ramɔtiɔ Galadin temɔ. Kaa nasara wa. Yinni Gusunɔ u koo nun tɔn be nɔma bɛria. 13Sɔmɔ wi ba gɔra u bu Misee sokua u nùn sɔ̃ɔwa u nɛɛ, wee sɔmɔ be ba wãa mi kpuro, ba sina boko gari gea gerua. Yen sɔ̃, a de wunɛ ka ben gari yi ko tia. 14Ma Misee u nɛɛ, sere ka Yinni Gusunɔn wãaru, ye wi, Yinni Gusunɔ u man sɔ̃ɔwa, yera kon gere. 15Ye Misee u tura sina bokon wuswaaɔ, sina boko u nùn bikia u nɛɛ, sa ko kpĩ su tabu da Ramɔti Galadin temɔ? Nge su ku da. Ma u nɛɛ, i doo mɛ, i ko i nasara wa. Yinni Gusunɔ u koo nun bu nɔmu bɛria. 16Adama sina boko u nùn wisa u nɛɛ, nɔn nyewa kon nun bɔ̃rusia a sere man gem sɔ̃ mɛ Yinni Gusunɔ u nun sɔ̃ɔwa a gere. 17Misee u nùn wisa u nɛɛ, na Isireliba wa ba yarinɛ guunu wɔllɔ ba sãa nge yãa ni nu kun kparo mɔ. Ma Yinni Gusunɔ u nɛɛ, tɔn beni ba ǹ kparo mɔ. Ben baawure u gɔsiro u wura yɛnuɔ ka alafia. 18Yera Isireliban sina boko u Yosafati sɔ̃ɔwa u nɛɛ, na ǹ daa nun sɔ̃ɔwa ma u ku ra man gãa geenu sɔ̃, sere gãa kɔ̃sunu? 19Yera Misee u Akabu sɔ̃ɔwa u nɛɛ, a Yinni Gusunɔn gari swaa dakio, na nùn wa u sɔ̃ win sina kitaru wɔllɔ. Ma win tabu kowobu ba yɔ̃ win nɔm geu ka win nɔm dwarɔ. 20Ma u nɛɛ, wara u koo Akabu nɔni wɔ̃ke u ka taa bi da Ramɔtiɔ Galadin temɔ, kpa u gbi mi. Ma ba yen wesianɔ mɔ̀. Wini ù n gerua mɛni, wi, u gere mɛ. 21Yera hunde gaa ya yarima ya yɔ̃ra Yinni Gusunɔn wuswaaɔ ya nɛɛ, kon Akabu wi nɔni wɔ̃ke. Yinni Gusunɔ u ye bikia u nɛɛ, amɔna kaa koosina. 22Hunde ye, ya nɛɛ, kon yari kpa n du sɔmɔ be sɔɔ, kpa n de bu weesu ko bu ka sina boko nɔni wɔ̃ke. Ma Yinni Gusunɔ u ye wisa u nɛɛ, ya wã, swaa gea. Kaa maa kpĩ a nùn nɔni wɔ̃ke. Ǹ n mɛn na, a yario a da a ko mɛ. 23Wee tɛ̃, Yinni Gusunɔ u dera hunde ye, ya dua sɔmɔ be sɔɔ, bu ka nun weesu kua. Yen sɔ̃, a n yɛ̃ ma kɔ̃sa Yinni Gusunɔ u koo de yu nun deema. 24Yera Sedesiasi Kenaanan bii u susi Miseen bɔkuɔ u nùn baara so. Ma u nɛɛ, domma Yinni Gusunɔn hunde u yara nɛn min di u ka sere nun gari kua. 25Misee u nùn wisa u nɛɛ, kaa gia dɔma te kaa duku dukubu ko, a n kuku yeru kasu dirɔ. 26Yera Isireliban sina boko u nɛɛ, i Misee mɔɔ i ka da Amɔɔ wi u sãa wuun wirugii ka maa Yoasi, sina bokon biin mi. 27Kpa i bu sɔ̃ i nɛɛ, amɛniwa nɛ sina boko na gerua. Na nɛɛ, bu durɔ wi mɔɔ bu doke pirisɔmwɔ kpa ba n nùn dĩanu ka nim wɛ̃ɛmɔ saka sɔɔ sere n ka wurama tabu gberun di ka alafia. 28Misee u nùn sɔ̃ɔwa u nɛɛ, à n wurama ka alafia, n ǹ Yinni Gusunɔ u ka man gari kua. Bɛɛ be i wãa mini, bɛɛn baawure u gari yi swaa suo. 29Yeniban biru, Isireliban sina boko ka Yosafati, Yudaban sina boko ba seewa ba taa bi da Ramɔtiɔ Galadin temɔ. 30Yera Isireliban sina boko u Yosafati sɔ̃ɔwa u nɛɛ, na kon nɛn yãnu kɔsi kpa n ganu doke nì sɔɔ ba ǹ man tubu. Adama wunɛ, a n wunɛn sina yãnu doke. Mɛsuma Isireliban sina boko u kua bu ku ka nùn tubu taa bi sɔɔ. 31N deema tabu kɛkɛ tɛna ka yiruwa Sirin sina boko u mɔ ye dumi gawe. Ma u yen wirugibu sɔ̃ɔwa u nɛɛ, bu ku raa goo go ma n kun mɔ Isireliban sina boko tɔna. 32Saa ye Sirin tabu wirugii be, ba Yosafati wɛndɛ kua, yera ba nɛɛ, Isireliban sina bokowa mi kam kam. Ma ba sĩirema win mi, bu nùn wɔri. Adama u nɔɔgiru sua u faaba kana. 33Ye Sirin tabu kowo be, ba deema n ǹ Isireliban sina boko mi, yera ba nùn deri ba doona. 34Saa ye sɔɔra durɔ goo u sɛ̃u tooma Isireliban mi gia u ǹ goo yĩisi. Adama ga na ga Akabu wɔri deedeeru mi wi tarakpe ga yɔ̃ra. Yera u win tabu kɛkɛ swaa sɔ̃ɔsio sɔ̃ɔwa u nɛɛ, a kɛkɛ sĩiyɔ biruɔ kpa a man yara tabu sĩan di, domi ba man mɛɛra kuawa mi. 35Yen dɔma te, taa bi, bu swĩa gem gem. Ma ba sina boko nɛnusi u ka yɔ̃ win tabu kɛkɛ sɔɔ u wuswaa tĩi Sirigibun tabu sansanin bera gia. Ma win yɛm mu wĩa kɛkɛ ye sɔɔ. Yen yoka ma u gu. 36Ye sɔ̃ɔ u duɔ, yera goo u gbãra Isireliban sansaniɔ u nɛɛ, baawure u wuro win yɛnuɔ. 37Nge mɛya sina boko Akabu u ka gu. Ma ba ka win goru na Samariɔ ba sikua. 38Ye ba win tabu kɛkɛ ye woburumɔ Samarin yɛruɔ, yera bɔ̃nu na, nu win yɛm dabura. Ma kurɔ tanɔba na ba wobura mi, nge mɛ Yinni Gusunɔ u raa gerua. 39Ye Akabu u kuan sukum ka dii te u bana ka suunu donnu, ka wuu si u bana kpuron gari yi wãa Isireliban sinambun faagin tireru sɔɔ. 40Ba Akabu sikua win baababan sikaɔ. Ma win bii Akasia u bandu di. 41Akabu Isireliban sina bokon bandun wɔ̃ɔ nnɛse sɔɔra Yosafati u bandu di Yudaɔ. 42Yosafati wi, u mɔwa wɔ̃ɔ tɛna ka nɔɔbu sanam mɛ u ban te di. Ma u kua wɔ̃ɔ yɛnda nɔɔbu bandu sɔɔ Yerusalɛmuɔ. Win mɛron yĩsira Asuba Silikin bii. 43U kua ye ya Yinni Gusunɔ wɛ̃re. Win tundo Asan yira u swĩi mam mam. 44Adama u ǹ gungunu mi ba ra bũu yãkuru ko kɔsuke. U dera tɔmba ben yãkunu mɔ̀ mi, ma ba turare dɔ̃ɔ dokemɔ. 45Mɛya maa bɔri yɛnda wãa wi ka Isireliban sina bokon suunu sɔɔ. 46Ye Yosafati u kuan sukum ka wɔrugɔɔ te u sɔ̃ɔsi tabu sɔɔ, ye kpuron gari yi yorua Yudaban sinambun faagin tireru sɔɔ, 47ka nge mɛ u kurɔ tanɔ be ba tie saa win tundo Asan waatin di gira, be ba gɔsa ba n ka sakararu mɔ̀ ben sãarun swaa sɔɔ. 48Saa ye sɔɔ, Edɔmuba ba ǹ sunɔ mɔ. Adama Yudaban sina boko u goo yi mi, u n ka sãa ben wirugii. 49Yosafati u goo nimkusu dãka si ba ko n da ka wura kaso de Ofiriɔ. Adama su ku ra turi mi, su ra kɔsirewa swaaɔ, wuu ge ba mɔ̀ Ɛsioni Gebɛɛɔ. 50Yera Akasia Akabun bii u Yosafati sɔ̃ɔwa u nɛɛ, a kĩ wunɛn sɔm kowobu ka nɛgibu ba n da de sannu? Ma Yosafati u yina. 51Yen biruwa Yosafati u kpuna u gu. Ma ba nùn sikua win baababan sikaɔ Dafidin wuuɔ. Ma win bii Yoramu u bandu kɔsire kua. 52Akasia, Akabun bii u bandu di Isireliba sɔɔ Samariɔ, Yosafati Yudaban sina bokon bandun wɔ̃ɔ wɔkura nɔɔbu ka yiruse sɔɔ. Ma Akasia wi, u kua wɔ̃ɔ yiru bandu sɔɔ. 53Win ban te sɔɔ, kɔ̃sa u kua Yinni Gusunɔn wuswaaɔ. Win tundo ka win mɛron yira u swĩi, ka sere maa Yeroboamu Nɛbatin biigia, wi u Isireliba doke toraru sɔɔ. 54Bũu wi ba mɔ̀ Baali wiya u ra yiire u n sãamɔ. Ma u Yinni Gusunɔn mɔru seeya nge mɛ win tundo u raa kua.

will be added

X\