1 Gusunɔn sɔmɔ Eli wi u wãa Tisibiɔ Galadin temɔ u sina boko Akabu sɔ̃ɔwa u nɛɛ, ka Gusunɔ Isireliban Yinni wi na sãamɔ minin wãaru, gura ka kakoru, yen gaa kun maa nɛmɔ wɔ̃ɔ sinin baa sɔɔ sere dɔma te na wure na nɛɛ, ya koo nɛ. 2 Yera Yinni Gusunɔ u Eli sɔ̃ɔwa u nɛɛ, 3 a seewo minin di kpa a da sɔ̃ɔ yari yeru gia a n wãa Keritin daarɔ Yuudɛnin guruɔ. 4 Daa ten nima kaa n da n nɔrumɔ kpa n gunɔmɔri gɔrima yi ka nun dĩanu naawa. 5 Ma Eli u doona min di u kua nge mɛ Yinni Gusunɔ u nùn sɔ̃ɔwa. U da u wãa daa ten mi. 6 Yera gunɔmɔri yi, yi ra ka nùn pɛ̃ɛ ka yaa naawɛ bururu ka yoka. Daa ten nima u ra n maa nɔrumɔ. 7 Sanam dɔɔ sanam wee, daa ten nim mu kpa. Domi gura kun maa nɛɛre tem mɛ sɔɔ. 8 Yera Yinni Gusunɔ u kpam Eli sɔ̃ɔwa u nɛɛ, 9 a seewo a da Sarepataɔ, Sidonin temɔ, kpa a n wãa mi. Domi na gɔmini goo sɔ̃ɔwa u nun diisia. 10 Ma u seewa u da Sarepata mi. Ye u wuu ge duɔ, yera u deema gɔmini goo wee, u dãa kasu. Ma u nùn soka u nɛɛ, a suuru koowo a doo, a man nim kasuama fiiko n nɔ. 11 Ye u nim mɛ kaso dɔɔ, Eli u kpam nùn soka u nɛɛ, a man pɛ̃ɛ kpiribu kasuama mi, n nɔɔ kpɛ̃ɛ. 12 Ma kurɔ wi, u nùn wisa u nɛɛ, ka Gusunɔ wunɛn Yinnin wãaru, na ǹ dĩa yebunu ganu mɔ yɛnuɔ, ma n kun mɔ som nɔm kure teeru te na mɔ kaarɔ ka sere maa gum fiiko bwãarɔ. Yen dãa na kasu mini, nà n sĩa yɛnuɔ, n ka doo ko su di ka nɛn bii. Yen biru kpa sa n gɔɔ mara. 13 Eli u nùn sɔ̃ɔwa u nɛɛ, a ku bɛrum ko, a doo a ko nge mɛ a gerua. Adama a gina man kira piibu kuama ka som mɛ. Yen biru kpa a wunɛ ka wunɛn biigiru ko. 14 Domi Gusunɔ Isireliban Yinni u gerua u nɛɛ, som mɛ mu wãa kaa te sɔɔ, ka gum mɛ mu wãa bwãa te sɔɔ, mu ǹ kpeemɔ pai, sere n ka ko tɔ̃ɔ te u koo de gura yu nɛ. 15 Ma u da u kua nge mɛ Eli u gerua. Wi ka win yɛnugibu ka Elin tii ba maa wa ba di sɔ̃ɔ dabi dabinu. 16 Som mɛ, ka gum mɛ, mu ǹ kpa nge mɛ Yinni Gusunɔ u raa gerua win sɔmɔ Elin nɔɔn di. 17 Yeniban biru, kurɔ win bii u bara gem gem ma u gu. 18 Yera u Eli sɔ̃ɔwa u nɛɛ, Gusunɔn tɔnu wunɛ, a nawa a ka Gusunɔ nɛn toranu yaayasia? Domi wee nɛn bii u gu. 19 Eli u kurɔ wi sɔ̃ɔwa u nɛɛ, a man bii wi wɛ̃ɛma. Ma u nùn mwa kurɔ win nɔman di u ka da dii ten gidambisan wɔllɔ mi u ra n wãa. Ma u nùn kpĩ win kpin yerɔ. 20 Ma u Yinni Gusunɔ kana u nɛɛ, Yinni kaa dewa kɔ̃sa yu kurɔ wi deema wìn mi na sɔbia? Kpa a de win bii u gbi? 21 Yera u bii wi kibarisi nɔn ita u Gusunɔ kana u nɛɛ, Gusunɔ nɛn Yinni, a de bii wi, u se. 22 Ma Yinni Gusunɔ u Elin kana te mwa, bii win wɛ̃siara wurama u kua waso. 23 Yera Eli u nùn suama u ka sarama wasiru u nùn win mɛro wɛ̃. U nɛɛ, wunɛn bii wee. 24 Ma kurɔ wi, u Eli sɔ̃ɔwa u nɛɛ, tɛ̃, na gia ma Gusunɔn tɔnuwa a sãa. Gari yi a maa gerumɔ yi sãawa gem, yi weewa Gusunɔn min di.
