Sinambu I 16

1Saa ye sɔɔra Yinni Gusunɔ u win sɔmɔ Yehu Hananin bii gɔra Basan mi, u nùn sɔ̃ u nɛɛ, 2wiya u nùn gɔsa sanam mɛ u ǹ sãa gãanu ma u nùn kua win tɔmbu Isireliban kparo. Adama u Yeroboamun yira swĩi. Ma u wi Gusunɔn tɔmbu doke toraru sɔɔ ba win mɔru seeya. 3Yen sɔ̃, Gusunɔ u koo win yɛnu kpeerasia kpa gu ko nge Yeroboamu Nɛbatin biiguu. 4Win yɛnugii wi u koo gbi wuuɔ, bɔ̃na nu koo yɛ̃ron goru tem. Wi u maa gu yakasɔ, gunɔsa su koo yɛ̃ron goru di. 5Ye Basa u kuan sukum ka wɔrugɔɔ te u sɔ̃ɔsi, ye kpuron gari yi yorua Isireliban sinambun faagin tireru sɔɔ. 6Yen biru Basa u kpuna u gu. Ba nùn sika win baababan sikaɔ Tirisaɔ. Ma win bii Ela u gɔna kɔsire kua. 7N deema Basa u sere gbi, Yinni Gusunɔ u nùn sɔ̃ɔwa saa win sɔmɔ Yehu Hananin biin nɔɔn di u nɛɛ, win yɛnu ga koo kowa nge Yeroboamuguu, kɔ̃sa ye u kuan sɔ̃, ye ya wi, Yinni Gusunɔn mɔru seeya, ka sere yèn sɔ̃ u Yeroboamun yɛnugibu kpuro go. 8Asa Yudaban sina bokon bandun wɔ̃ɔ yɛnda nɔɔbu ka tiase sɔɔra Ela Basan bii u bandu di Tirisaɔ. U kuawa wɔ̃ɔ yiru ban te sɔɔ. 9Win tabu sunɔ turo wi ba mɔ̀ Simiri wi u ra tabu kɛkɛ yi dumi gawen bɔnu kpare u nùn seesi saa ye wi, Ela u wãa Tirisaɔ u tam nɔrumɔ mu nùn goomɔ Tirisan sunɔn sɔm kowobun wirugiin mi, wi ba mɔ̀ Aritisa. 10Miya Simiri u dua u nùn sɛ̃re u go. Saa ye sɔɔ, Asa Yudaban sina bokon bandun wɔ̃ɔ yɛnda nɔɔbu ka yiruse sɔɔra mi. Ma Simuri wi, u bandu di wi, Elan ayerɔ. 11Sanam mɛ u ban te di u kpa, yera u Basan tɔmbu kpuro go, ka win dusibɔ ka win kpaasibɔ. Baa ben tɔn turo u ǹ deri. 12Simiri u Basan yɛnugibu kpuro gowa nge mɛ Yinni Gusunɔ u gerua saa win sɔmɔ Yehun nɔɔn di, 13ye u nɛɛ, u koo de bu Basan yɛnu kpeerasia, wi ka win bii Elan toranun sɔ̃ te ba dera Isireliba ba kua. Domi ba dera ba bũnu sãwa ma ya wi Gusunɔ Isireliban Yinnin mɔru seeya. 14Ye Ela u kuan sukum ba yen gari yorua Isireliban sinambun faagin tireru sɔɔ. 15Asa, Yudaban sina bokon bandun wɔ̃ɔ tɛna ita sarise sɔɔra Simiri u bandu di Tirisaɔ. Ma u kua sɔ̃ɔ nɔɔba yiru ban te sɔɔ. N deema saa ye sɔɔ, Isireliba ba ben sansani gire Filisitiban wuu ge ba sokumɔ Gibetonin deedeerɔ. 16Tɔn be ba wãa sansani mi, ba nua ma Simiri u sina boko seesi, sere u mam nùn go. Yen dɔma tera, Isireli be ba wãa sansani mi, ba tabu sunɔ Omiri kua sunɔ Isireliba kpuro sɔɔ. 17Ma Omiri ka tɔn be, ba seewa Gibetonin min di ba da ba Tirisa tarusi. 18Ye Simiri u wa ba wuu ge tarusi mɛ, yera u da u kukua sina kpaarɔ sere sina bokon dirɔ. Ma win tii u dii te dɔ̃ɔ sɔ̃re. 19Nge mɛya u ka gu win tora te u kuan sɔ̃. Domi kɔ̃sa u kua Yinni Gusunɔn wuswaaɔ. Yeroboamun yira u swĩi ye ya Isireliba doke toraru sɔɔ. 20Ye Simiri u kuan sukum ka nge mɛ u Isireliban sinambu seesi u go, ye kpuro ya yorua Isireliban sinambun faagin tireru sɔɔ. 21Saa ye sɔɔra Isireliba ba bɔnu kua wuunu yiru. Wuu teeru ta ka Tibini Ginatin bii yɔ̃ra, ma ta nùn kua sunɔ. Teera maa ka Omiri yɔ̃ra. 22Be ba ka Omiri yɔ̃ra bera ba dabiru bo. Tibini u gu. Ma Omiri u kua be kpuron sunɔ. 23Asa Yudaban sina bokon bandun wɔ̃ɔ tɛna ka tiase sɔɔra Omiri u bandu di Isireliɔ. U raa bandu di Tirisaɔ wɔ̃ɔ nɔɔba tia u sere kua Isireliba kpuron sunɔ. Ma u kua wɔ̃ɔ wɔkura yiru ban te sɔɔ. 24Yera u da Semɛɛn mi u Samarin guuru dwa ka sii geesun gobi nɔrɔbun suba nɔɔba tia (6.000). Ma u wuu bana guu ten wɔllɔ u gu yĩsiru kã Samari, Semɛɛ win yĩsirun sɔ̃. 25Omiri wi, kɔ̃sa u kua Yinni Gusunɔn wuswaaɔ ya kere sinam be ba nùn gbiiyegia. 26Yeroboamu Nɛbatin biin yira u swĩi mam mam ye ya Isireliba doke toraru sɔɔ. Ya dera ba bũnu sãwa. Ma Gusunɔ Isireliban Yinni u ka bu mɔru kua. 27Ye Omiri u kuan sukum ka wɔrugɔɔ te u sɔ̃ɔsi, ye kpuro ya yorua Isireliban sinambun faagin tireru sɔɔ. 28Omiri wi, u kpuna u gu, ma ba nùn sikua win baababan sikaɔ Samariɔ. Yen biru, win bii Akabu u gɔna kɔsire kua. 29Asa Yudaban sina bokon bandun wɔ̃ɔ tɛna ka nɔɔba itase sɔɔra Akabu Omirin bii u maa bandu di Isireliban mi Samariɔ. U kuawa wɔ̃ɔ yɛnda yiru ban te sɔɔ. 30Yinni Gusunɔn nɔni sɔɔ, u kɔ̃sa kua n kere sinam be ba nùn gbiiye. 31U ǹ daa mam yɛ̃ Yeroboamu Nɛbatin bii u durum kua, wigian kpãarun saabu. Domi u Yesabɛli Etibaalin bii sua kurɔ. Etibaali wiya u sãa Sidonigibun sunɔ. Yen biru u maa da u bũu wi ba mɔ̀ Baali sãamɔ. 32Ma u bũu wi diru bania Samariɔ. Ma u yãku yeru kua dii te sɔɔ. 33Ma u bũu wi ba mɔ̀ Asitaaten bwãaroku kua ge ba ko n da maa sã. Yeya n dera Yinni Gusunɔ u ka nùn mɔru kua n kere sinam be ba nùn gbiiye. 34Akabun waati ye sɔɔ, Hili Betɛligii u seewa u Yeriko bana. Saa ye u wuu gen kpɛɛkpɛɛku swĩimɔ ma win bii gbiikoo Abiramu u gu. Saa ye u maa gen gbãrarun gambo dokemɔ ma win bii dãako Segubu u maa gu. N deema Yinni Gusunɔ u raa gerua Yosue Nunin biin nɔɔn di u nɛɛ, wi u maa wuu ge bana, mɛsuma yɛ̃ron bibu ba koo gbi.

will be added

X\