Sinambu I 15

1Yeroboamun bandun wɔ̃ɔ wɔkura nɔɔbu ka itase sɔɔra Abiyamu u bandu di Yudaɔ. 2U kuawa wɔ̃ɔ ita bandu sɔɔ Yerusalɛmuɔ. Win mɛron yĩsira Maaka. U sãawa Abisalɔmun bii. 3Durum ye Abiyamun tundo u kua, yera win tii u maa kua. U ǹ win tii Yinni Gusunɔ wɛ̃ mam mam nge mɛ win sikado Dafidi u kua. 4Adama Dafidin bweseru ta n ka sɔ̃ɔsire bandu sɔɔ nge fitila, yen sɔ̃na Yinni Gusunɔ u nùn Abiyamu kã u kua win kɔsire bandu sɔɔ, Yerusalɛmuɔ. 5Domi Dafidi wi, u sĩa dee dee Yinni Gusunɔn wuswaaɔ. U ye kpuro mɛm nɔɔwa ye u nùn sɔ̃ɔwa u ko, ma n kun mɔ ye u Uri Hɛti go ma u win kurɔ sua baasi. 6Abiyamun tundo Roboamun waati sɔɔ, tabu kun kpa wi ka Yeroboamun baa sɔɔ. 7Ye Abiyamu u kuan sukum mu yorua Yudaban sinambun faagin tireru sɔɔ. Mɛya maa win waati ye sɔɔ, tabu wãa wi ka Yeroboamun baa sɔɔ. 8Yen biru Abiyamu u kpuna u gu, ma ba nùn sikua win baababan sikaɔ, Dafidin wuuɔ. Ma win bii Asa u bandu kɔsire kua. 9Yeroboamu Isireliban sunɔn bandun wɔ̃ɔ yɛndusewa Asa u bandu di Yudaɔ. 10U kuawa wɔ̃ɔ weeru ka tia Yerusalɛmuɔ. Win nikurɔn yĩsira Maaka. U sãawa Abusalɔmun bii. 11Asa wi, u sĩawa dee dee Yinni Gusunɔn wuswaaɔ nge win sikado Dafidi. 12U kurɔ tanɔbu gira win tem di. Ma u bũu ni win baababa ba raa seka kɔsuka. 13U maa win nikurɔ yara sina asakpɔ te u diin di, yèn sɔ̃ kurɔ wi, u Asitaaten bwãaroku kua. Ma Asa u bwãaroku ge kɔsuka u gu dɔ̃ɔ mɛni muku muku. U gen torom gura u wisi Sedoronin wɔwaɔ. 14Adama u ǹ gungunu mi ba ra yãkuru ko mi kɔsuke, baa mɛ u Yinni Gusunɔ kĩa ka win gɔ̃ru kpuro. 15U maa dera ba ka kɛ̃nu na Yinni Gusunɔn sãa yerɔ, nìn wooda win baaba ka win tii ba yi. Kɛ̃ɛ niya sii geesu ka wura ka sere maa yãnu ganu. 16Asan waati ye sɔɔ, tabu ra n wãawa wi ka Isireliban sunɔ Basan baa sɔɔ. 17Sɔ̃ɔ teeru Basa u Yudaba wɔri. Ma u Rama mwa u yen gbãraru sɔnwa. Kpa Yudaba bu ku raa maa ka du mi, bu yari. 18Yera Asa u sii geesu ka wura ye ya tie kpuro gura, saa sãa yerun arumani beru yerun di, ka sere sina kpaarun arumani beru yerun di u ka gɔra Damasiɔ Sirin sina boko Bɛni Hadadi Tabirimɔn biin mi, wi u sãa Hɛsionin debubu. Ma Asa u gɔro be sɔ̃ɔwa u nɛɛ, i nɛɛ, 19u de su arukawani bɔke nɛ ka wi nge mɛ ya raa wãa nɛn baaba ka win baaban suunu sɔɔ. Wee na nùn sii geesu ka wura kɛ̃ɛma. Yen sɔ̃, u de u arukawani ye kusia, ye u ka Basa Isireliban sunɔ bɔkua, kpa u nùn deri. 20Bɛni Hadadi u Asan gari nua, ma u win tabu sinambu gɔra Isirelin wuu marosɔ, ba da ba Iyoni wɔri ka Danu ka Abɛli Bɛti Maaka ka Kinɛrɔtu ka sere maa Nɛfitalin tem kpuro. 21Saa ye Basa Isireliban sina boko u ye nua, yera u Raman gbãra ten sɔmburu deri ma u da u wãa Tirisaɔ. 22Ma sina boko Asa u Yudaba kpuro mɛnna, baa tɔn turo ba ǹ deri. Ba da ba kpenu ka dãa gura ye Basa u raa ka gbãra te sɔmmɔ. Ma u dera ba ka ye Geban gbãraru sɔnwa Bɛnyamɛɛn tem sɔɔ, ka sere maa Misipagiru. 23Ye Asa u kuan sukum ka sere maa wuu si u bana kpuro ka wɔrugɔɔ te u sɔ̃ɔsi ye kpuron gari yi yorua Yudaban sinambun faagin tireru sɔɔ. Win tɔkɔru sɔɔ u naasu bara, 24ma u kpuna u gu. Ba nùn sikua win baababan sikaɔ win sikado Dafidin wuuɔ. Ma win bii Yosafati u gɔna sina. 25Nadabu Yeroboamun bii u bandu di Isireliɔ, Asa Yudan sina bokon bandun wɔ̃ɔ yiruse sɔɔ. Nadabu wi, u kuawa wɔ̃ɔ yiru bandu sɔɔ. 26U ǹ sĩa dee dee Yinni Gusunɔn wuswaaɔ. Kɔ̃sa u kua nge mɛ win tundo u raa kua ye ya Isireliba doke toraru sɔɔ. 27Ma Basa Akiyan bii Isakarin bweseru sɔɔ, u nùn seesi u sɛ̃re u go, Gibetoniɔ, Filisitiban temɔ, saa ye Nadabu ka Isireliba kpuro ba wuu ge tarusi. 28Asa Yudaban sina bokon bandun wɔ̃ɔ itase sɔɔra Basa u Nadabu wi go. Ma u bandu di win ayerɔ. 29Sanam mɛ u bandu di u kpa, yera u Yeroboamun yɛnugibu kpuro go. Baa ben tɔn turo u ǹ deri nge mɛ Yinni Gusunɔ u gerua Siloɔ saa win sɔmɔ Akiyan nɔɔn di. 30Yeni ya koorawa Yeroboamun durum sɔ̃ ka yèn sɔ̃ u Isireliba doke toraru sɔɔ. Ma ba Gusunɔ ben Yinnin mɔru seeya. 31Ye Nadabu u kuan sukum mu yorua Isireliban sinambun faagin tireru sɔɔ. 32Basa ka Asan baa sɔɔ, tabu wãawa sere be kpuro ba ka gu. 33Asa Yudaban sina bokon bandun wɔ̃ɔ itasewa Basa Akiyan bii u bandu di Tirisaɔ Isireliba kpuron suunu sɔɔ. U kuawa wɔ̃ɔ yɛnda nnɛ ban te sɔɔ. 34Adama u ǹ sĩa dee dee Yinni Gusunɔn wuswaaɔ. Kɔ̃sa u kua. Yeroboamun yira u swĩi, ye ya Isireliba doke toraru sɔɔ.

will be added

X\