Sinambu I 1

1Dafidi u tɔkɔ kua u bukura gem gem. Baa bà n nùn beka bubusi, ka mɛ, u ra n kurusinɛwa woorun sɔ̃. 2Sɔ̃ɔ teeru win bwãaba na ba nùn sɔ̃ɔwa ba nɛɛ, Yinni, a de su nun wɔndia kasuama u n da n wãa wunɛn bɔkuɔ u n nun nɔɔrimɔ kpa u n da n nun bɔkasi a n ka yam susuru waamɔ. 3- 4Ma ba wɔndia kurɔ burɔ kaso wɔri Isireliban tem kpuro sɔɔ. Yera ba wɔndia goo wa wi ba sokumɔ Abisagi. Wɔndia wi, kurɔ burɔn tiiwa. U sãawa Sunɛmugii. Ma ba nùn mwaama ba ka na sina bokon mi. Wiya u ra n nùn nɔɔrimɔ. Adama u ǹ nùn yɛ̃ kurɔ. 5- 6Adoniya wi Dafidi u ka Hagiti mara wiya u kua Dafidin yeruma Abusalɔmun gɔɔn biru. U sãawa durɔ burɔn tii. Tundo kun nùn wɔkisire saa mìn di ba ka wãa. U ǹ maa nùn bikiare u nɛɛ, mban bwesera a mɔ̀ mɛ. Yera Adoniya wi, u tii wɔlle sua u nɛɛ, wiya u koo bandu di. Ma u tii tabu kɛkɛ kasua ye dumi gawe ka maasɔbu ka sere tabu durɔbu tɔnu weeraakuru be ba ra n nùn gbiiye. 7Ma u ka Yoabu Seruyan bii ka yãku kowo Abiataa gari bɔkua. Ma ba ka nùn yɔ̃ra. 8Adama yãku kowo Sadɔku ka Bɛnaya Yehoyadan bii, ka Gusunɔn sɔmɔ Natani, ka Simɛi ka Rei ka sere Dafidin tabu kowo damgibu, beya ba ǹ ka Adoniya nɔɔ tia kue. 9Ma Adoniya u yãkuru kua ka yãanu ka kɛtɛ kpɛmi yi yi gum mɔ Sohelɛtin kperun bɔkuɔ te ta wãa Eni Rogɛlin bera gia. Ma u win tundo turosibu dim soka mi, ka Yudaba kpuro, be ba sãa sina bokon bwãabu. 10Adama u ǹ Gusunɔn sɔmɔ Natani soka ka Bɛnaya ka Dafidin tabu durɔ damgii be, ka maa sere Salomɔɔ win tundo turosi. 11Yera Natani u da u Bati Seba Salomɔɔn mɛro sɔ̃ɔwa u nɛɛ, a ǹ nua ma Adoniya Hagitin bii, u bandu di? Dafidi bɛsɛn yinni kun maa yɛ̃. 12Yen sɔ̃, a na tɛ̃ n nun bwisi kɛ̃ ye kaa ko a ka wunɛn hunde bere, ka maa wunɛn bii Salomɔɔgia. 13A doo a wunɛn yinni Dafidi sina boko deema a nùn sɔ̃ a nɛɛ, n ǹ wiya u nɔɔ mwɛɛru kua u nɛɛ, wunɛn bii Salomɔɔwa u koo bandu di win biru? Mba n kua Adoniya u ka bandu sina. 14Saa ye kaa ka nùn gari yi tore, kon duuma mi nɛn tii, kpa n wunɛn gari sire n sosi. 15Ma Bati Seba u seewa u da diru mi sina boko u kpĩ. Domi sina boko u tɔkɔ kua gem gem. Abisagi Sunɛmugiiwa u wãa mi, u nùn nɔɔrimɔ. 16Ye Bati Seba u tura mi, u yiira sina bokon wuswaaɔ. Ma sina boko u nùn bikia u nɛɛ, mba a kĩ. 17Ma u wisa u nɛɛ, nɛn yinni, wuna a man nɔɔ mwɛɛru kua ka bɔ̃ri a nɛɛ, sere ka Yinni Gusunɔn yĩsiru nɛn bii Salomɔɔwa u koo bandu di wunɛn biru. 18Wee tɛ̃ Adoniya u bandu di. Wunɛ nɛn yinni sina boko a ǹ ka baaru. 19Ma u kɛtɛ kpɛmi yi yi gum mɔ ka yãa dabinu go. Ma u win tundo turosibu dim soka ka Abiataa yãku kowo ka sere Yoabu wi u sãa tabu sunɔ. Adama u ǹ wunɛn bii Salomɔɔ soka. 20Tɛ̃ sina boko, wee, wuna Isireliba kpuro ba swaa daki a ka bu sɔ̃ wi u koo ko wunɛn kɔsire bandu sɔɔ. 21Yinni, saa ye kaa kpuna nge wunɛn baaba, ba koo nɛ ka nɛn bii Salomɔɔ mɛɛriwa taarɛgibu. 22Ye Bati Seba ka Dafidi ba gari mɔ̀, yera Gusunɔn sɔmɔ Natani u tunuma mi. 23Ma ba sina boko sɔ̃ɔwa ba nɛɛ, Gusunɔn sɔmɔ Natani wee, u tunuma. Yera u sina boko yiira u wuswaa tem girari. 24U nùn bikia u nɛɛ, yinni, wuna a nɛɛ, Adoniya u bandu dio u ko wunɛn kɔsire sina gɔnaɔ? 25Domi wee, u kɛtɛ kpɛmi yi yi gum mɔ go ka yãa dabi dabinu. Ma u win tundo turosibu sokusia ka tabu sinambu ka Abiataa yãku kowo. Wee, ba dimɔ ba nɔrumɔ win wuswaaɔ. Ma ba gerumɔ ba mɔ̀ Adoniya, sina boko, win hunde yu dakaa da. 26Adama u ǹ nɛ ka Sadɔku yãku kowo soka, ka Bɛnaya Yehoyadan bii, ka sere maa wunɛn bii Salomɔɔ. 27Sina boko, wunɛn min diya gari yini yi koora? Ma a ǹ sere bɛsɛ wunɛn bwãabu sɔ̃ɔwa wi u koo bandu di wunɛn biru? 28Ma Dafidi sina boko u nɛɛ, i man Bati Seba sokuo. Ma ba nùn soka u susi u yɔ̃ra sina bokon wuswaaɔ. 29Yera sina boko u bɔ̃rua u nɛɛ, sere ka Yinni Gusunɔn wãaru wi u man yara saa wahala kpuron di, 30kon nɛn nɔɔ mwɛɛru yibia gisɔ te na nun kua ka Gusunɔ bɛsɛ Isireliban Yinnin yĩsiru na nɛɛ, Salomɔɔwa u koo bandu di nɛn biru u ko nɛn kɔsire. 31Ma Bati Seba u yiira u wuswaa tem girari u nɛɛ, nɛn yinni sina boko, wunɛn hunde yu dakaa da. 32Ma Dafidi u nɛɛ, bu nùn Sadɔku yãku kowo sokuo ka Gusunɔn sɔmɔ Natani ka maa Bɛnaya Yehoyadan bii. Ye ba tunuma, yera ba dua mi u wãa. 33Ma u bu sɔ̃ɔwa u nɛɛ, i nɛn bwãabu suo kpa i nɛn bii Salomɔɔ kɛtɛku yɔɔsia i ka nùn da bwia ye ba mɔ̀ Gihoniɔ. 34Miya yãku kowo Sadɔku ka Gusunɔn sɔmɔ Natani ba koo nùn gum tãre wirɔ u ka ko Isireliban sunɔ, kpa i kɔbi wura, yen biru i gere i nɛɛ, Salomɔɔ sina bokon hunde yu dakaa da. 35Yen biru kpa i nùn suama u na u sina nɛn sina gɔnaɔ u ko nɛn kɔsire. Domi wiya na gɔsa u ka Isireliba ka Yudaba kpara. 36Ma Bɛnaya Yehoyadan bii u nɛɛ, ami, nɛn yinni sina boko. Yinni Gusunɔ u de n koora mɛ. 37Nge mɛ Yinni Gusunɔ u ka nun wãa, u n maa ka Salomɔɔ wãa mɛ, kpa u win bandu wɔlle sua n wunɛgiru kera. 38Yera yãku kowo Sadɔku ka Gusunɔn sɔmɔ Natani ka Bɛnaya Yehoyadan bii ka Keretiba ka Pelɛtiba be ba sãa sina bokon tiin kɔ̃sobu, ba da ba Salomɔɔ deema. Ma ba nùn yɔɔsia sina bokon kɛtɛku wɔllɔ ma ba da Gihoni mi. 39Ye ba tura mi, yera Sadɔku u da kuu bekurugirɔ u gum kɔba tama. Ma u Salomɔɔ gum mɛ tãre wirɔ u ka nùn ko sunɔ. Yen biru ba kɔba so, ma tɔn be kpuro ba nɛɛ, sina boko Salomɔɔ, wunɛn hunde yu dakaa da. 40Ma tɔn be kpuro ba nùn swĩi ba kɔbi soomɔ ka nuku doo bakabu. Ma n sãare nge tem mu yĩirumɔwa ben wurenun sɔ̃. 41Adoniya ka win tɔn be u dim soka mi kpuro ba wure ni nua saa yè sɔɔ ba dim kpa. Ye Yoabu u kɔban swĩi nua, yera u nɛɛ, mban sɔ̃na ba wure mɛni wuuɔ. 42U gari yi gerumɔ u ǹ kpa, yera Yonatam, Abiataa yãku kowon bii u tunuma. Ma Adoniya u nɛɛ, a dam kooma tabu durɔ naanɛgii. Na yĩiyɔ n labaari gea nɔ wunɛn min di. 43Yonatam u nùn wisa u nɛɛ, aawo. Domi Dafidi sina boko bɛsɛn yinni u Salomɔɔ bandu wɛ̃. 44Ma u dera Sadɔku yãku kowo ka Gusunɔn sɔmɔ Natani ka Bɛnaya Yehoyadan bii ka Keretiba ka Pelɛtiba ba nùn sina bokon kɛtɛku yɔɔsia, 45ba da Gihoniɔ. Miya Sadɔku yãku kowo ka Gusunɔn sɔmɔ Natani ba nùn gum tãre wirɔ, u kua sunɔ. Yen biruwa ba gɔsirama min di ka nuku doo bakabu. Ma wuu ge, ga gbisimɔ ka wurenu. Niya i nɔɔmɔ mi. 46Salomɔɔ u maa sɔ̃ sina gɔnaɔ kɔ. 47Ma sina bwãaba na ba bɛsɛn sina boko Dafidi domaru kua ba nɛɛ, Gusunɔ u Salomɔɔn yĩsiru ka win bandu wɔlle sua n kere wi Dafidigiru. Ma Dafidi u seewa u wuswaa tem girari win kpin yerun wɔllɔ. 48Ma u gerua u nɛɛ, Gusunɔ Isireliban Yinnigia siarabu wi u nùn goo kã u win sina gɔna kɔsire kua. Ma u maa ka yɛ̃ro nɔni wa. 49Be Adoniya u dim soka mi kpuro, ba nanda ye ba gari yi nua. Ma ben baawure u win swaa mwa u doona. 50Yera Adoniya u bɛrum soora Salomɔɔn sɔ̃, ma u seewa u da u yãku yerun kãanu nɛnua Salomɔɔ u ku ka nùn gon sɔ̃. 51Yera ba Salomɔɔ sɔ̃ɔwa ba nɛɛ, wee Adoniya u bɛrum soore wunɛn sɔ̃. U da u yãku yerun kãanu nɛni u mɔ̀, wunɛ Salomɔɔ a be bɔ̃ruo gisɔ ma a ǹ nùn goomɔ. 52Ma Salomɔɔ u nɛɛ, ù n tii nɛnua dee dee, baa win wirun seri tia ya ǹ wɔrumamɔ. Adama sà n kɔ̃sa gaa wa win min di, u koo gbiwa. 53Yera u dera ba nùn yara yãku yee ten min di. Ma Adoniya wi, u na Salomɔɔn wuswaaɔ u kpuna u nùn tɔbura. Yen biru Salomɔɔ u nɛɛ, u wio win yɛnuɔ.

will be added

X\