Korinti I 8

1Tɛ̃, gãa ni ba ka bũu yãkuru kua, nin gari sɔɔra na wura. Geema, bɛsɛ kpuro sa yɛ̃ru mɔ. Yɛ̃ra tii suabu mɔ, adama kĩra ta ra tɔnu tãsisie. 2Goo ù n tamaa u gãanu yɛ̃, u ǹ yɛ̃ gina nge mɛ n weenɛ u n yɛ̃. 3Adama wi u Gusunɔ kĩ, Gusunɔ u yɛ̃ro yɛ̃. 4Tɛ̃ dĩa ni ba ka bũu yãkuru kua, amɛniwa nin dibun gari sãa. Sa yɛ̃ ma bũu kun gãanu handunia sɔɔ. Sa maa yɛ̃ ma Gusunɔ turowa wãa. 5Domi baa bà n gerumɔ bũnu wãa wɔllɔ ka temɔ, nge mɛ sa yɛ̃ ma bũu dabinu ka yinni dabinu nu wãa, 6ka mɛ, bɛsɛn mi, Gusunɔ turowa wãa. Wiya sãa Baaba wìn min di gãanu kpuro nu naamɔ. Win sɔ̃na sa maa wãa. Yinni turowa maa wãa. Wiya Yesu Kirisi wìn min di gãanu kpuro nu koora. Win saabuwa sa maa wãaru mɔ. 7Adama n ǹ tɔmbu kpuro ba yeni yɛ̃. Gabu be ba gina bũu sãarun dɔɔnɛ mɔ, ba yaa ye temmɔ nge bũu sãa dĩanu, ma ben gɔ̃ru dam sariruguu ga bu taarɛ wɛ̃ɛmɔ. 8N ǹ mɔ dĩana nu koo ka sun susi Gusunɔn mi. Sà kun di, n ǹ kɔmiaru, sà n maa di, n ǹ turiru. 9Adama i tii laakari koowo bɛɛn tii mɔɔ te, tu ku raa de be ba ǹ dam mɔ bu tora. 10Domi wunɛ wi a yɛ̃ru mɔ, ma a sɔ̃ a dimɔ bũu dirɔ, gɔ̃ru dam sarirugii ù n nun wa mi, u ǹ koo wɔrugɔru ko u ka bũu sãa dĩanu di? 11Kpa kĩnasi wi, wìn sɔ̃ Kirisi u gu, u kam ko wunɛn yɛ̃run saabu. 12Nge mɛya ì n bɛɛn berusebu torari ma i ben gɔ̃ru dam sariruguu ge mɛɛra mɔ̀, Kirisiwa i torari. 13Yen sɔ̃, dĩanu nù n koo nɛn beruse torasia, na ǹ maa yaa temmɔ sere ka baadommaɔ, n ku ka nɛn beruse torasian sɔ̃.

will be added

X\