Bandun Gari I 25

1Dafidi ka tabu sinambu ba Asafun bibun bweseru ka Hemanin bibugiru ka Yedutum bibugiru gɔsa ba yi nɛnɛm sãarun sɔ̃. Gari yi Gusunɔ u bu sɔ̃ɔwa, yiya ba ra ka womusu ko ka mɔrɔkunu ka guunu ka sɛkɛtirɛnu. Be ba sɔma ye mɔ̀, ben yĩsa wee. 2Asafun bibun bweseru sɔɔ, Sakuri ka Yosɛfu ka Nɛtania ka Asarela. Ben tundo Asafuwa u ra n bu kpare. Gari yi Gusunɔ u nùn sɔ̃ɔwa yiya u ra n ka womu mɔ̀ nge mɛ sina boko u nùn yiire. 3Yedutum bibun bweseru sɔɔ, Gedalia ka Seri ka Esai ka Hasabia ka Matitia ka Simɛiwa. Ben tundo Yedutumwa u ra n bu kpare. Gari yi Gusunɔ u nùn sɔ̃ɔwa, yiya u ra n ka womu mɔ̀ ka mɔrɔku, u n ka Gusunɔ siaramɔ kpa u n nùn bɛɛrɛ wɛ̃ɛmɔ. 4Hemanin bibun bweseru sɔɔ maa, Bukia ka Matania ka Usiɛli ka Sebuɛli ka Yerimɔti ka Hanania ka Hanani ka Eleata ka Gidaliti ka Romanti Esɛɛ ka Yosibekasa ka Malɔti ka Hotiri ka Makasiɔti. 5Beni kpurowa ba sãa Hemanin bibun bweseru. Hemani wiya u ra Yinni Gusunɔn dam wɔlle sue kpa u sina boko sɔ̃ ye Yinni Gusunɔ u gerua. Hemani wi, u bii tɔn durɔbu mara wɔkura nnɛ, bii tɔn kurɔbu maa ita. 6Tɔn be kpurowa ba ra womusu ko Yinni Gusunɔn sãa yerɔ ka sɛkɛtirɛnu ka guunu ka mɔrɔkunu kpa ben tundobu ba n bu kpare. Ba ra ben sɔmburu kowa ka sina bokon wooda. Kpa Asafu ka Yedutum ka Hemani ba n bu gbiiye. 7Be ba womusu yɛ̃ ka be ba bu swĩi, be kpuron geera sãawa goobu ka wɛnɛ ka nɔɔba ita (288). 8Ba tɛtɛ tobawa bu ka sɔmburun kpunaa yi. Ba ǹ nɛɛ, bukurowa gee, ǹ kun mɛ biiwa gee. Mɛya ba ǹ maa nɛɛ, be ba womusu yɛ̃wa gee, ǹ kun mɛ be ba torumɔwa gee. 9- 31Wuuru ka wuurun wirugii be ba gɔsa ka tɛtɛ, be wee. Yosɛfu, Asafun bweseru sɔɔ, wiya u sãa gbiikoo. Ma Gedalia u sãa yiruse. Ma Sakuri u sãa itase. Ma Yiseri u sãa nnɛse. Ma Nɛtania u sãa nɔɔbuse. Ma Bukia u sãa nɔɔba tiase. Ma Yesarela u sãa nɔɔba yiruse. Ma Esai u sãa nɔɔba itase. Ma Matania u sãa nɔɔba nnɛse. Ma Simɛi u sãa wɔkuruse. Ma Asarɛli u sãa wɔkura tiase. Ma Hasabia u sãa wɔkura yiruse. Ma Subaɛli u sãa wɔkura itase. Ma Matitia u sãa wɔkura nnɛse. Ma Yeremɔti u sãa wɔkura nɔɔbuse. Ma Hanania u sãa wɔkura nɔɔbu ka tiase. Ma Yosibekasa u sãa wɔkura nɔɔbu ka yiruse. Ma Hanani u sãa wɔkura nɔɔbu ka itase. Ma Malɔti u sãa wɔkura nɔɔbu ka nnɛse. Ma Eliata u sãa yɛnduse. Ma Hotiri u sãa yɛnda tiase. Ma Gidaliti u sãa yɛnda yiruse. Ma Makasiɔti u sãa yɛnda itase. Ma Romanti Esɛɛ u sãa yɛnda nnɛse. Wuuru baateren wirugii ka win yɛnugibu ba ra n sãawa wɔkura yiru.

will be added

X\