Bandun Gari I 19

1Yeniban biru Nakasi, Amɔniban sina boko u gu. Ma win bii u bandu kɔsire kua. 2Ma Dafidi u nɛɛ, kon Hanuni, Nakasin bii wi tɔn geeru kua. Domi mɛya win tundo u man kua. Yera Dafidi u sɔmɔbu gɔra bu nùn nukuru yɛmiasia win tundon gɔɔn sɔ̃. Ye Dafidin sɔmɔ be, ba tura Hanuni win mi, Amɔniban temɔ bu ka nùn nukuru yɛmiasia, 3yera Amɔniban wirugibu ba Hanuni sɔ̃ɔwa ba nɛɛ, a tamaa Dafidi u ka wunɛn tundo bɛɛrɛ wɛ̃n sɔ̃na u sɔmɔbu gɔrima bu nun nukuru yɛmiasia? A ǹ yɛ̃ bu ka wuu ge bukiana bu gen saria gia kpa bu gu wɔrima bu kam koosian sɔ̃na sɔmɔ beni ba na wunɛn mi? 4Yera Hanuni u Dafidin sɔmɔ be mwa u ben toba kɔna ma u ben yabenu karana saa suunun di sere taanɔ. Ma u bu yɔ̃su ba doona. 5Ye Dafidi u nua ye n tɔn be deema ma u wa ba wãa seku bakaru sɔɔ, yera u gabu gɔra bu ka bu yinna kpa bu bu sɔ̃ bu gina doo bu sina Yerikoɔ sere ben toba ye, yà n kpia bu sere wurama. 6Ye Amɔni be, ba wa ma ba Dafidin mɔru seeyawa, yera Hanuni ka Amɔni be, ba sii geesun gobi nɔrɔbu (1.000) mɔrisia Sirigibun mi be ba wãa Mɛsopotamiɔ ka Maakaɔ ka sere Sobaɔ bu ka bu tabu kɛkɛba ka maasɔbu wɛ̃ɛma. 7Ma ba bu tabu kɛkɛ nɔrɔbun suba tɛna ka yiru (32.000) wɛ̃ɛma, ka maa Maakan sunɔ ka win tabu kowobu. Ma ba na ba ben sansani gira Mɛdebaɔ. Ma Amɔniba ba maa yarima ben wusun di ba mɛnna ka tabun sɔɔru. 8Ye Dafidi u nua mɛ, yera u bu Yoabu ka win tabu kowo damgibu sure. 9Ma Amɔniba ba yarima ba wãa wuun duu yerɔ. Sinam be ba maa bu somiru na, ma ba da ba yɔ̃ra nɛnnɛnka. 10Ma Yoabu u deema u koo tabu kowa biruɔ ka wuswaaɔ. Ma u Isireliban tabu kowo damgibu sɔɔ tabu kowo wuuru sua u Sirigibu kpare. 11Ma u maa win wɔnɔ Abisai tabu kowo be ba tie wɛ̃ bu ka Amɔniba wɔri. 12Ma u nɛɛ, Sirigibu bà n man kamiamɔ, a man somiru na. Amɔniba bà n maa nun kamiamɔ, kon nun somiru na. 13A de a n wɔrugɔru mɔ, kpa su taa bi ko ka wɔrugɔru bɛsɛn tɔmbun sɔ̃ ka maa Gusunɔ bɛsɛn Yinnin wusun sɔ̃. Kpa Yinni Gusunɔ u ko ye n ko n nùn wɛ̃re. 14Ma Yoabu ka win tɔmbu ba Sirigibu tabu wɔri. Ma Sirigii be, ba duki sua Yoabun wuswaan di. 15Ye Amɔniba ba wa ma Sirigibu ba duki sua, yera ben tii ba maa duki yarina Abisai, Yoabun wɔnɔn wuswaan di ba dua wuuɔ. Ma Yoabu u gɔsirama Yerusalɛmuɔ. 16Ye Sirigibu ba wa ma Isireliba ba bu kamiawa, yera ba sɔmɔbu gɔra bu Sirigii be ba wãa daarun guru giɔ sokuma. Sofaki, Hadadesɛɛn tabu kowobun wirugii u bu gbiiye. 17Ma ba ye Dafidi nɔɔsia. Yera u Isireliban tabu kowobu kpuro mɛnna, u ka bu Yuudɛni tɔbura, ma ba sĩa ba da Sirigii ben bera gia ba bu tabu wɔri ba kamia. Ma Sirigii be, ba duki sua Isireliban wuswaan di. 18Dafidi u ben tabu kɛkɛ be dumi gawe nɔrɔbun suba nɔɔba yiru (7.000) kɔsuka ka be ba wãa be sɔɔ, ka naanaakobu nɔrɔbun suba weeru (40.000), ka sere maa ben tabu sunɔ Sofaki. 19Ye Hadadesɛɛn sɔm kowobu ba wa ma Isireliba ba bu kamiawa, yera ba ka Dafidi nɔɔ tia kua ba nùn tii wɛ̃. Saa dɔma ten di, Sirigibu ba ku ra maa kã bu Amɔniba somiru da.

will be added

X\