Bandun Gari I 16

1Ye ba ka kpakoro te tunuma, yera ba tu doke ten ayerɔ kuu bekurugiru sɔɔ te Dafidi u kua ten sɔ̃. Yen biruwa u Yinni Gusunɔ yãku dɔ̃ɔ mwaararuginu ka siarabun yãkunu kua. 2Ye Dafidi u yãku ni kua u kpa, yera u win tɔmbu Isireliba domaru kua ka Yinni Gusunɔn yĩsiru. 3Ma u be kpuro dĩanu bɔnu kua, tɔn kurɔbu ka tɔn durɔbu. U baawure pɛ̃ɛ ka yaa wɔ̃ɔra wɛ̃ ka sere maa kira te ba kua ka resɛm gbeba. 4Ma Dafidi u Lefi ben gabu sɔma wɛ̃ woodan kpakoro ten sɔ̃, kpa bu ka Gusunɔ be Isireliban Yinni sã. Kpa bu nùn siara, kpa bu nùn bɛɛrɛ wɛ̃. 5Asafuwa u sãa ben wirugii. Ma Sakari u sãa win yiruse. Ma Yeyɛli ka Semiramɔtu ka Yehiɛli ka Matitia ka Eliabu ka Bɛnaya ka Obɛdi Edɔmu ka sere Yeyɛli ba guunu ka mɔrɔkunu soomɔ. Ma Asafu u maa sɛkɛtirɛnu soomɔ. 6Ma yãku kowo beni, Bɛnaya ka Yasiɛli ba kɔbi soomɔ tãa tãa Yinni Gusunɔn woodan kpakoro ten wuswaaɔ. 7Tɔ̃ɔ tera Dafidi u dera Asafu ka wigibu ba Yinni Gusunɔ tɔmam torua. Ba nɛɛ, 8i Yinni Gusunɔ siaro, kpa i nùn sã, kpa i bwesenu nɔɔsia sɔm baka ni u kua. 9I nùn tɔmɔ. I nùn siaro ka womusu, kpa i win sɔm maamaakiginun gari kpara. 10I yɛ̃ɛrio win yĩsi dɛɛrarun sɔ̃, kpa i nuku dobu ko bɛɛ bèn gɔ̃ru ga nùn kasu. 11I gɔsiro Yinni Gusunɔ Dam kpurogiin mi, kpa i nùn kasu baadomma. 12- 13Bɛɛ Isireliba, Yakɔbu Gusunɔn sɔm kowon bweseru, bɛɛ be u gɔsa, i yaayo sɔm maamaakigii ni u kua ka gari yi u bɛɛ sɔ̃ɔwa. 14Gusunɔwa u sãa bɛsɛn Yinni. Wiya u koo handunia kpuro siri. 15- 16I arukawani ye yaayo baadomma ye u ka Aburahamu bɔkua ka maa nɔɔ mwɛɛ te u Isaki kua. 17U ka ye Isireliba, Yakɔbun bweseru bɔkuawa ya n sãa wooda sere ka baadommaɔ. 18U nɛɛ, u koo bu Kananin tem wɛ̃ bu tubi di. 19N deema sanam mɛ, Isireliba ba ǹ dabi, ma ba sãa sɔbu tem mɛ sɔɔ. 20Ba ra n daamɔwa bwese tukunun mi ka wuu tukusɔ. 21Adama u ǹ dere goo u bu dam dɔre. U maa sinambu sɛɛyasia ben sɔ̃. 22U nɛɛ, i ku nɛn tɔn be na gɔsa baba. I ku maa nɛn sɔmɔbu kɔ̃sa kua. 23Yen sɔ̃, bɛɛ handuniagibu, i Yinni Gusunɔ tɔmɔ. I win faaban gari kparo tɔ̃ɔ baatere. 24I win yiikon girima ka win sɔm maamaakiginu kparo bwesenun suunu sɔɔ. 25Domi Yinni Gusunɔ u kpã. Wiya n weenɛ bu siara. U bũnu kpuro nanum kere. 26Bwese tukunun bũnu nu sãawa kam dirum. Adama Yinni Gusunɔwa u wɔllu kua. 27Yiiko ka girima ya wãa win wuswaaɔ. Ma dam ka nuku dobu wãa win wãa yerɔ. 28Bɛɛ bwesenu kpuro, i Yinni Gusunɔ yiiko ka bɛɛrɛ wɛ̃ɛyɔ. 29I Yinni Gusunɔn yĩsiru yiiko wɛ̃ɛyɔ. I ka nùn kɛ̃nu daawo win sãa yerɔ. Kpa i yiira win wuswaaɔ i nùn sã win dɛɛrarun sɔ̃. 30Bɛɛ handuniagibu kpuro, i diirio win wuswaaɔ. Tem mu dam mɔ, mu ǹ bãarimɔ. 31Wɔllu, a yɛ̃ɛrio, kpa tem mu nuku dobu ko. I bwesenu kpuro sɔ̃ɔwɔ ma Yinni Gusunɔ u bandu dii. 32Nim wɔ̃ku gu kuuki koowo, ka ye ya wãa ge sɔɔ. Ye ya wãa gen bera mi gia kpuro, yu nuku dobu koowo. 33Dãnu, i nuku dobun kuuki koowo Yinni Gusunɔn wuswaaɔ. Domi u wee u handuniagibu siri. 34I Yinni Gusunɔ siaro win tɔn geerun sɔ̃. Win kĩru ta ǹ nɔru mɔ. 35I nùn nɔɔgiru sueyo i nɛɛ, Gusunɔ bɛsɛn Faaba kowo, a sun faaba koowo. A sun wɔro bwese tukunun nɔman di, kpa a sun mɛnna. Saa yera sa ko nun tɔma sa n wunɛn yĩsi dɛɛraru soku, kpa sa n yɛ̃ɛrimɔ, sa n mɔ̀, 36Gusunɔ, Isireliban Yinni, wuna ba ko n siaramɔ sere ka baadommaɔ. Ma tɔmbu kpuro ba nɛɛ, ami! I Yinni Gusunɔ siaro. 37Yen biru Dafidi u Asafu ka wigibu yiire ba n wãa Yinni Gusunɔn woodan kpakoro ten mi, ba n sɔmburu mɔ̀ baadomma. 38Ma u Obɛdi Edɔmu ka Hosa ka begibu gɔsa. Ben geera sãawa tɔmbu wata ka nɔɔba ita (68). Obɛdi Edɔmu, Yedutum bii, ka Hosa ba sãawa kɔnnɔ kɔ̃sobu. 39Ma Dafidi u yãku kowo Sadɔku ka wigibu yiire bu sɔmburu ko gunguru wɔllɔ Gabaoniɔ, mi ba ra Yinni Gusunɔ yãkuru kue, 40ba n da nùn yãku dɔ̃ɔ mwaararuginu kue baadomma yãku yerɔ, bururu ka yoka, kpa bu maa ko kpuro ye ya wãa wooda sɔɔ ye u Isireliba wɛ̃. 41Be sɔɔra Hemani ka Yedutum ka sere be ba gɔsa ba ben yĩsa sia sia mi, bu ka Yinni Gusunɔ sã ba wãa. Domi wi, Yinni Gusunɔn tɔn geeru ta ra n wãawa sere ka baadommaɔ. 42Hemani ka Yedutum, bera ba ra kɔbi ka sɛkɛtirɛnu ka sere maa yãa ni nu tien wunanɔsu ko, ni ba ra ka womusu ko bà n Yinni Gusunɔ sãamɔ. Yedutum biba ba maa sãa kɔnnɔn kɔ̃sobu. 43Yen biru, tɔmbu kpuro ba gɔsira ba wura ben yɛnusɔ. Ma Dafidi u maa da win yɛnuɔ u ka win yɛnugibu domaru kua.

will be added

X\