Bandun Gari I 14

1Sɔ̃ɔ teeru, Hiramu, Tirin sunɔ u Dafidi sɔmɔbu gɔria ka dãa gea ye ba sokumɔ sɛduru ka dãa dãkobu ka be ba ra kpenu dãku, kpa bu nùn sina kpaaru bania. 2Dafidi u tuba ma Gusunɔwa u win bandun dam siremɔ. Wiya u maa ban te wɔlle suamɔ win tɔmbu Isireliban sɔ̃. 3Yen biru Dafidi u maa kurɔbu gabu sua Yerusalɛmuɔ. Ma ba nùn bii tɔn durɔbu ka tɔn kurɔbu marua. 4Bera Samua ka Sobabu ka Natani ka Salomɔɔ 5ka Yibaa ka Elisua ka Elifelɛti 6ka Nɔga ka Nɛfɛgi ka Yafia 7ka Elisama ka Beliada ka sere Elifelɛti goo. 8Ye Filisitiba ba nua ba Dafidi gum tãre wirɔ u kua Isireliba kpuron sunɔ, yera be kpuro ba seewa ba nùn wɔrim wee. Ye u nua mɛ, yera u sara u da u ka bu yinna. 9Saa ye sɔɔra Filisiti be, ba tunuma ba tɛria Refan wɔwaɔ. 10Ma Dafidi u Yinni Gusunɔ bikia u nɛɛ, n doo n Filisiti be wɔri? Kaa man bu nɔmu bɛria? Ma Yinni Gusunɔ u nùn wisa u nɛɛ, a doo, kon nun bu nɔmu bɛria. 11Ma ba seewa ba da Baali Perasimuɔ. Miya Dafidi u Filisiti be go go. Ma u gerua u nɛɛ, Yinni Gusunɔ u nɛn yibɛrɛban wuuru gĩa nge mɛ nim tora ya ra guna gĩɛ. Yen sɔ̃na ba yam mi yĩsiru kã Baali Perasimu. 12Yera Filisiti be, ba duki sua ba ben bwãarokunu deri mi. Ma Dafidi u win tɔmbu sɔ̃ɔwa bu nu guro bu dɔ̃ɔ mɛni. 13Amɛn biru, Filisiti be, ba kpam na ba tɛria Refan wɔwa mi. 14Ma Dafidi u Yinni Gusunɔ bikia u nɛɛ, n maa doo n bu wɔri? Ma Yinni Gusunɔ u nùn wisa u nɛɛ, oo. Adama a ku da sɔru sɔrum mɛ. A besiro kpa a da a n wãa dãa ye ba mɔ̀ miren sɔ̃ɔwɔ. 15Sanam mɛ a naa damu damusu gasu nɔɔmɔ dãa wɔllɔ, a yarima. Domi nɛ, Yinni Gusunɔwa na nun gbiiye n ka ben sansani ye wɔri. 16Ma Dafidi u kua nge mɛ Yinni Gusunɔ u nùn sɔ̃ɔwa. U da u Filisiti be go go saa Gabaonin di n ka da Gesɛɛɔ. 17Ma Dafidi u yĩsiru yara tem baama kpuro sɔɔ. Ma Yinni Gusunɔ u nùn dam wɛ̃ bwesenu kpuro sɔɔ.

will be added

X\