Bandun Gari I 11

1Isireliba kpuro ba mɛnna ba na Dafidin mi Heboroniɔ. Ma ba nùn sɔ̃ɔwa ba nɛɛ, bɛsɛ ka wunɛ, sa sãawa yɛm tem. 2Baa yellun di, saa ye Sɔɔlu u sãa bɛsɛn sunɔ, wuna a ra sun mɛnnɛ a sun kpara a ka tabu da, kpa a ka maa sun wurama. Gusunɔ wunɛn Yinni u maa nun sɔ̃ɔwa u nɛɛ, wuna kaa ko bɛsɛn wirugii kpa a bɛsɛ win tɔmbu kpara. 3Yera Isireliban guro gurobu kpuro ba na Dafidi sina bokon mi Heboroniɔ. Ma u ka bu arukawani bɔkua Yinni Gusunɔn wuswaaɔ Heboroni mi. Yera ba nùn gum tãre wirɔ, ba nùn kua be, Isireliban sunɔ nge mɛ Yinni Gusunɔ u gerua saa Samuɛlin nɔɔn di. 4Sɔ̃ɔ teeru, Dafidi ka Isireliba kpuro ba Yerusalɛmu wɔri. Yerusalɛmu yera ba maa sokumɔ Yebusi. Miya Yebusiba ba wãa. 5Yera ba Dafidi sɔ̃ɔwa ba bɛɛ, n ǹ koorɔ u duuma wuu ge sɔɔ. Adama Dafidi u bu wɔri u ben wuu gbãraruguu ge mwa. N deema gera ba maa sokumɔ Siɔni. Yen biru ba gu soka Dafidin wuu. 6N deema Dafidi u raa win tabu kowobu sɔ̃ɔwa u nɛɛ, wi u gbia u Yebusiba wɔri u kamia, yɛ̃rowa u koo ko tabu kowobun wirugii. Ma Yoabu, Seruyan bii u gbia u bu wɔri u kamia. Ma u kua wirugii. 7Dafidi u da u sina wuu gbãraruguu gen mi. Yen sɔ̃na ba gu soka Dafidin wuu. 8Ma u bani kua u ka gu sikerena. U banawa saa Milon di u ka sikerena. Ma Yoabu u maa gen mi n tie sɔnwa. 9Ma Dafidin dam mu sosimɔ. Domi Gusunɔ wɔllu ka tem Yinni u wãa ka wi. 10Wee be ba sãa Dafidin tabu kowobun wirugibu. Be ka Isireliba kpurowa ba nùn kua sina boko nge mɛ Yinni Gusunɔ u gerua win tɔmbun sɔ̃. Ba nùn mɛm nɔɔwawa mam mam win bandun waati ye kpuro sɔɔ. 11Yasobeamu, Hakumɔnin bii u sãa tabu kowobun wirugii ben turo. Wiya u tɔmbu gooba wunɔbu (300) go ka yaasa nɔn teerun tabu sɔɔ. 12Yen biru Eleasaa, Dodon bii, Akosigii, u sãawa tabu kowobu ita yen turo. 13U wãa ka Dafidi Pasi Damimuɔ, sanam mɛ Filisitiba ba mɛnna bu ka bu tabu wɔri. Ma Isireliba ba duki Filisitiban wuswaan di. N deema gberu gara wãa mi, tè sɔɔ ba ɔɔsu duura. 14Yera Eleasaa ka win tɔmbu ba yɔ̃ra gbee ten suunu sɔɔ ba ka tu yina. Ma ba ka Filisitiba tabu kua ba bu go. Yinni Gusunɔ u bu nasara baka wɛ̃ dɔma te. 15Sɔ̃ɔ teeru Dafidin tabu sinambu tɛna ye sɔɔ, ben ita ba da ba nùn deema Adulamun kpee wɔruɔ, sanam mɛ Filisitiban tabu kowobun wuuru garu ta na ta ten sansani gira Refaban wɔwaɔ. 16Saa ye sɔɔ, Dafidi u wãa kpee wɔru ge sɔɔ, ma Filisitiban sansani ya maa gire Bɛtelehɛmuɔ. 17Ma Dafidi u Bɛtelehɛmun bɛkɛ kua u nɛɛ, wara u koo ka man Bɛtelehɛmun gbãra kɔnnɔn dɔkɔn nim naawa n nɔ. 18Yera win tabu durɔbu ita be, ba da ba Filisitiban sansani ye wɔri ka dam ba Dafidi nim mɛ takama ba ka na. Adama u ǹ mu nɔra. U ka mu yãkuru kuawa, u Yinni Gusunɔ yaria. 19U nɛɛ, Gusunɔ u man gbara bu nɛɛ, nɛna na nim mɛ nɔra. Domi mɛn sɔ̃na tɔn beni ba ben wãaru kari bɔrie. Nim mɛ, mu sãawa nge ben yɛm mɛ mu koo raa yari. Yen sɔ̃na u yina u mu nɔ. Yeniba kpurowa Dafidin tabu kowobu ita be, ba kua. 20Abisai, Yoabun wɔnɔwa u sãa tabu sinambu tɛna yen wirugii. Tɔmbu gooba wunɔbuwa (300) u go ka win yaasa. Ma u yĩsiru yara wigibun suunu sɔɔ. 21Ba nùn bɛɛrɛ wɛ̃ too. Adama u ǹ tabu durɔbu ita be tura. 22Bɛnaya, Kabisɛɛligii, Yehoyadan bii, u sãawa tabu durɔ wɔrugɔ. Ma u yĩsiru yara nasara dabi te u wan sɔ̃. Wiya u Mɔabuban tɔmbu yiru gabu go, be ba sɛ̃ nge gbee sinansu. Wiya u maa dua dɔkɔ kpiriru sɔɔ u gbee sunɔ kãasi mi, u go puran saa sɔɔ. 23Ma u Egibitin tabu durɔ damgii goo go. Win gunum mu sãawa gɔm soonu nɔɔbu. Ma u yaasa nɛni. Yen buru ta sãawa nge weson dɛka ye u ra beku yasa tɛ̃ke. Saa yè sɔɔ u nùn wɔrim dɔɔ, bokura u nɛni. Ye u tura mi, ma u durɔ win yaasa ye u nɛni mi wɔra u ka nùn sɔka u go. 24Yeniba kpurowa Bɛnaya Yehoyadan bii u kua. Ma u yĩsiru yara tabu kowobu tɛna ye sɔɔ. 25U bɛɛrɛ baka wa Dafidin tabu durɔbu tɛna ye sɔɔ. Adama ya ǹ tabu durɔ gbiikobu ita begia tura. Ma Dafidi u nùn kua win tiin kɔ̃sobun wirugii. 26Dafidin tabu kowo ben gabun yĩsa wee, Asaɛli, Yoabun wɔnɔ, ka Ɛlikanani, Dodon bii, Bɛtelehɛmugii, 27ka Samɔti, Harorigii, ka Helɛsi, Palonigii, 28ka Ira, Ikɛsin bii, Tekoagii, ka Abiesɛɛ, Anatɔtugii, 29ka Sibekai, Husagii, ka Ilai, Akoasigii, 30ka Maharai, Nɛtofagii, ka Helɛdi, Baanan bii, wi u maa sãa Nɛtofagii, 31ka Itai, Ribain bii, Gibeagii, ye ya wãa Bɛnyamɛɛn temɔ, ka Bɛnaya, Piratonigii, 32ka Hurai, Nasale Gaasigii, ka Abiɛli, Arabagii, 33ka Asimafɛti, Basarumugii, ka Eliaba, Saabonigii, 34ka Bɛnɛ Hasɛmu, Gisonigii, ka Yonatam, Sagen bii, Hararigii, 35ka Akiamu, Sakaan bii, Hararigii, ka Elifali, Urun bii, 36ka Hefɛɛ, Mɛkeragii, ka Akiya, Palonigii, 37ka Hɛsiro, Kaamɛligii, ka Naarai, Ɛsibain bii, 38ka Yoɛli, Natanin mɔɔ, ka Mibisaa, Hagirin bii, 39ka Selɛki, Amɔnigii, ka Nakarai, Berɔtugii wi u ra Yoabu, Seruyan biin tabu yãnu sɔbe, 40ka Ira, ka Garɛbu be ba sãa Yetɛɛba, 41ka Uri, Hɛti, ka Sabadi, Alaigii, 42ka Adina, Sisan bii, Rubɛnin bwese kɛran wirugii turo, wi u tabu kowobu tɛna mɔ, 43ka Hanani, Maakan bii, ka Yosafati, Mitinigii, 44ka Osiasi, Asitarɔtugii, ka Sama, ka Yeyɛli be ba sãa Hotamun bibu, Aroɛɛgibu, 45ka Yediɛli, Simurin bii, ka win wɔnɔ Yoka, Tisigii, 46ka Eliɛli, Makafimugii, ka Yeribai, ka Yosafia, Elinamun bibu, ka Yitima, Mɔabu, 47ka Eliɛli, ka Obɛdi, ka Yasiɛli, Sobagii.

will be added

X\