Bandun Gari I 10

1Filisitiba ba Isireliba tabu wɔri. Ma Isireliban tabu kowobu ba duki sua. Filisiti be, ba bu naa gira ba go go Giliboan guurɔ. 2Ba maa Sɔɔlun tii ka win bibu ita Yonatam ka Abinadabu ka Maakisua naamwɛ. Ma ba bii be go. 3Sannɔ ge, ga Sɔɔlu swĩɛ. Tɛn towobu ba nùn sɛ̃ɛnu twee ba mɛɛra kua gem gem. 4Yera u win tabu yãa sɔɔwo sɔ̃ɔwa u nɛɛ, u win takobi womɔ u nùn ye sɔku kpa bango sarirugii be, bu ku raa nùn sɔku bu yaa kasiki. Adama durɔ wi, u yina u ko mɛ, domi bɛrum nùn mwa gem gem. Ma Sɔɔlu u takobi ye mwa u ka tii sɔka u kibarisi u taare. 5Ye win tabu yãa sɔɔwo wi, u wa ma u gu, yera u maa win takobi sua u tii sɔka nge mɛ Sɔɔlu u kua. Ma ba gu yam tem mi. 6Nge mɛya Sɔɔlu u ka gu ka win bibu ita be, ka win tabu yãa sɔɔwo ka sere maa win tabu kowobu kpuro sannu. 7Ye Isireli be ba wãa Yisirɛɛlin wɔwaɔ ba nua ma ben tabu kowoba duki sua, Sɔɔlu ka win bii tɔn durɔbu ba maa gu, yera ba ben wusu deri ba duki sua. Ma Filisitiba ba na ba sina wuu si sɔɔ. 8Ye n kua sisiru Filisitiba ba na ba goo nin yãnu potirimɔ. Yera ba Sɔɔlu ka win bibu itan gonu wa Giliboan guurɔ. 9Ma ba Sɔɔlun wiru bura ba win tabu yãnu kpuro potira. Yera ba sɔmɔbu gɔra bu yen labaari kpara ben bũu diaɔ ka ben tɔmbun mi, ben tem sɔɔ kpuro. 10Yera ba win tabu yãnu sua ba doke ben bũu dirɔ. Ma ba win wiru sua ba bwɛ̃ ben bũu wi ba mɔ̀ Dagonin dirɔ. 11Sanam mɛ Yabɛsi ye ya wãa Galadin temɔ, yen tɔmbu ba nua ye Filisitiba ba Sɔɔlu kua, 12yera be ba sãa tabu durɔ wɔrugɔba ba seewa ba Sɔɔlu ka win bibun goo ni sua ba ka da Yabɛsiɔ. Ma ba ben kukunu sikua dãru garun nuurɔ Yabɛsi mi. Ma ba nɔɔ bɔkua sɔ̃ɔ nɔɔba yiru. 13Sɔɔlu u guwa yèn sɔ̃ u Yinni Gusunɔ tɔnu kam kom kua, u ǹ win woodaba mɛm nɔɔwɛ. U bikiaru dawa be ba ra gɔribu sokun mi. 14U ǹ Yinni Gusunɔ bikie. Ma Yinni Gusunɔ u dera u gu. Ma u win bandu sua u Isain bii, Dafidi wɛ̃.

will be added

X\