1 Yeso nə baa nàysə yigisə tii yimɔ́' tɨ́ vəŋ, gì laa lee, 2 «Nu yifwàŋ yizɔ lùu yaa nu fwàŋ mɔ́' faŋ ŋwə nə nàysə yitianə məndaa ŋwiŋ wi. 3 Ŋwə tɔŋ vəndifwaŋ vi laa vəŋ to' tìi vɨɨ mbɨə faŋ vɨ nə sho' vəŋ maa məzɨ yitianə məndaa ghɔ́. Vəndifwaŋ vɔ́ gə, vɨɨ vɔ́ kee biŋ jwì me. 4 Ŋwə baa kɨ tɔŋ vəndifwaŋ vəmɔ́', gì laa, «Viŋ gə gì tɨ́ vɨɨ vɔ́ faŋ vɨ nə sho' vəŋ nə, laa vɨ du'tə vɨ naa fazɨ, zwìlə vəmbaw nə nyaasə ndawsə, vətɔ vənshə kù'nə. Bàw vəŋ jwi maa məndaa ghɔ́ ndwə.» 5 Vəndifwaŋ vɔ́ gə. Vɨɨ vɔ́ shɨshiasə. Vɨɨ mɔ́' gə taa fa' vəŋ, vɨɨ mɔ́' gə taa yiwiŋ vəŋ. 6 Vəmɔ́' jiatə vəndifwaŋ vɔ́, yɨ̀ ŋɨ' maa vəŋ, zwìlə vəŋ. 7 Fwi fwàŋ ghɔ́ za, ŋwə tɔŋ vɨɨ yighaw vi, vəŋ zwilə vɨɨ vɔ́, twàŋ ntɨ' vəŋ yinshə. 8 Fwàŋ ghɔ́ kɨ nii gì tɨ́ vəndifwaŋ vi laa, «Yitianə məndaa kù'nə. Luu nə, vɨɨ mbɨə faŋ vɨ nə sho' vəŋ nə, kee yiku'nə me. 9 Nɨniŋ, viŋ gə mfaysə jɨɨsə, tìi vɨɨ mbɨə faŋ viŋ yè shɔ, laa vəŋ jwi zɨ̀ məndaa.» 10 Vəndifwaŋ vɔ́ gə jɨɨsə, bàytə vɨɨ vənshə faŋ vəŋ yè, vɨɨ bwənə nə vɨɨ jəənə, vəŋ jwi, lwàŋ taa ŋii məndaa yɔ́, dù' nsi kɨ zɨ. 11 Fwàŋ kɨ nii jwì maa məshɔ'tə vɨɨ məzɨ məndaa ghɔ́, yè wə mɔ́' shɔ faŋ ŋwə kee mɔ̀' njwi məndaa me. 12 Ŋwə gi tɨ́ wə ghɔ́ laa, «Wuumba ŋwaa, a sii ŋìi taa ŋii məzɨ məndaa faŋ a kee mɔ̀' njwi məndaa me kɨkə?» Wə ghɔ́ gay. 13 Fwàŋ ghɔ́ gi tɨ́ vəndifwaŋ vi laa vəŋ ka fəŋ ghi nə kwiŋ ghi, fùusə ŋwə, mɔ̀' ŋwə taa shəŋ ŋkɨə faŋ ŋkə fəŋ laa shiŋ, ŋwə kɨ gwia fɨ fuŋ, ndɔ kwə gɨ' ghi. 14 Nwi yaa kɨ tii vɨɨ ŋkee vəyaŋ, luu nə, shò' vɨɨ ŋkee vətɨti'.» 15 Yeso nə gì nɨniŋ, vɨɨ Farisii gə kà yighaw faŋ vəŋ taa kɔ'sə ŋwə nə yigi maa məkwaŋ ŋwə taa nsɔ'. 16 Vəŋ tɔŋ vɨɨ məzwetə nu vəŋ ghɔ vɨ vɨɨ məbiŋ nu fwàŋ Herod tɨ́ Yeso. Vɨɨ vɔ́ gə yè Yeso, gì tɨ́ ŋwə laa, «Tɨta, yia kɔ' kɨɨ laa a lùu wuu yinsəŋ faŋ ŋwə deesə jɨɨ Nwi yinsəŋ, kee fee wə me, bu' laa a kee lùu wuu fəntɔ-fə-yisɨ me. 17 Yia kəə bitə nu tɨ́ ghɔ. Naysə tɨ́ yia, a bɨ'tə laa ŋkə kù'nə maa məmɔ' tasə tɨ́ fwàŋ kwalə Kaysa mu?» 18 Yeso kɨɨ nə mənay vəŋ, gì laa, «Aŋ viŋ, vɨɨ məbo' ŋwaa, viŋ sii mɔŋ mə bu' kə? 19 Viŋ də ka ŋgwə faŋ vɨ mɔ' tasə shɔ nə tɨ́ mə.» Vəŋ jwi nə ka ghɔ́ tɨ́ ŋwə. 20 Ŋwə bitə tɨ́ vəŋ laa, «Lùu tɔ ndə nə, nə yizii ndə faŋ vɨ nyɔ̀' fuu yi nə?» 21 Vəŋ gi laa, «Lùu njyə fwàŋ Kaysa.» Ŋwə gi tɨ́ vəŋ laa, «Ŋkə bàw laa vɨ kɔ fa Kaysa tɨ́ Kaysa, kɔ̀ fa Nwi tɨ́ Nwi.» 22 Vəŋ zɔ nɨniŋ, shuu vəŋ yɔŋ, vəŋ me'tə ŋwə, gə̀. 23 Kɨ luu she' maa shi kɔ́, vɨɨ Sadusii vəmɔ́' faŋ vəŋ nəə gisə laa vəŋku və nsisə kee ndɔ ywey me, jwi yɨ Yeso, bìtə tɨ́ ŋwə laa, 24 «Tɨta, Mose nə gì laa, kɨ luu wə ku, kee bì wee me, bàw weenshu wi ndaa zu wi ghɔ́, bì vaŋ fuŋ, jìa nji-ŋiinə weenshu wi ghɔ́. 25 Nɨniŋ, vaŋ-nshwi vəmɔ́' nə luu shɔ ghɔ yia kwatia. Ŋgwə vɨsɨ ndaa wəzwi ku, mè'tə zu wi ghɔ́ tɨ́ weenshu wi, bu' laa ŋwiŋ wi nə kee lùu shɔ me. 26 She' nɨniŋ, mbe'sə yi ndi wəzwi ghɔ́, baa luu ku. She' nee, gə zi' tɨ́ vəŋ kwatia. 27 Vəŋ vənshə me, wəzwi ghɔ́ ku nɨzi. 28 Ndɔ luu maa yighee məywey fɨ shɨ yiku, wəzwi ghɔ́ sii ndɔ kii ndə, faŋ vəŋ vənshə nə ndàa wəzwi ghɔ́ nə?» 29 Yeso bəŋsə tɨ́ vəŋ laa, «Viŋ gù, bu' laa viŋ kee kɨ̀ɨ nə ŋwa'lə Nwi me, tɨ'nə me wutə Nwi me. 30 Yighee njyə faŋ vɨɨ ndɔ ywey fɨ shɨ yiku, vəŋ kee ndɔ ndaa vəki me, vəki kee ndàa vəndɔŋ me. Vəŋ ndɔ luu she' yaa nshiisə-ŋiisə Nwi. 31 Gə fɨ maa nu məywey fɨ shɨ yiku, viŋ kee ta tìi fɨ taa ŋwa'lə Nwi faŋ Nwi nə gì tɨ́ viŋ laa, 32 «Mə lùu Nwi Abraham, baa lùu Nwi Isak, nə Nwi Jeykob» nə yimu? (Nwi nə gi nɨniŋ maa yighee njyə faŋ vɨɨ vɔ́ nə du'tə vəŋ kukə fɨshi.) Nɨniŋ, ŋwə kee lùu Nwi vəŋku və nsisə me, lùu Nwi vɨɨ bweynə.» 33 Vɨɨ mbɨə faŋ vəŋ nə shə̀ŋtə yifi nə, shuu vəŋ yɔŋ maa nu ŋkɨə faŋ ŋwə nəə deesə tɨ́ vəŋ nə. 34 Vɨɨ Farisii zɔ faŋ Yeso nə shìa yigi fɨ shuu vɨɨ Sadusii, shəŋtə jwì yɨ ŋwə. 35 Wə mu' fɨ taa ŋwaa vəŋ faŋ lùu wuu mədeesə ŋwa'lə Nwi, mɔŋ ŋwə nə yigi, bìtə tɨ́ ŋwə laa, 36 «Tɨta, ntɨ njyə faŋ nyə kwàlə fɨ maa ntɨsə Nwi lùu njyə?» 37 Yeso bəŋsə tɨ́ ŋwə laa, «Kɨ kaw Mɔ'mbi, Nwi wə, nə fwi yə yinshə, baa nə wutə kə kənshə, baa nə mbɨ'tə yə yinshə. 38 Lùu ntɨ yikwalə baa lùu njyə vɨsɨ nɨzi. 39 Njyə faŋ nyə be'sə luu she' yikwalə yaa nyə nɨzi. Nyə lùu laa, «Kɨ kaw wənjɨɨ wə yaa nshɨ-tɔ wə.» 40 Vənu vənshə faŋ mbə lùu taa ŋwa'lə ntɨsə Nwi nə taa vəŋwa'lə və nshiisə-ŋii sɔghɔ fàynə she' maa ntɨsə sə̀ səbɔɔ nə.» 41 Faŋ vɨɨ Farisii nə shə̀ŋtə nɨniŋ nə, Yeso bitə tɨ́ vəŋ laa, 42 «Viŋ sii bɨ'tə ŋkiŋ bu' Kristo laa kə? Ŋwə lùu wee ndə?» Vəŋ gi tɨ́ ŋwə laa lùu wee wee fwàŋ Deyvid. 43 Ŋwə gi tɨ́ vəŋ laa, «Faŋ ŋkə lùu nɨniŋ nə, sii yɨ̀ kə buu fwàŋ Deyvid tii ŋwə fɨ taa Zwitə Ley Nwi laa «tɨta»? Maa fwàŋ Deyvid nə gì laa lee, 44 «Tɨta Nwi nə gì tɨ́ tɨta ŋwaa laa, du' nsi maa kwiŋ ma'nə ŋwaa, zì' maa yighee njyə faŋ mə ndɔ mɔ' vɨɨ mbeenə və nsi, laa a tə ghuu ghə fuu ŋwaa vəŋ.» 45 Nɨniŋ, faŋ fwàŋ Deyvid nə tii ŋwə nə tɨta wi, buu ŋwə baa luu ŋwiŋ wi kɨkə?» 46 Yeso nə gì nɨniŋ, wə kee lùu shɔ, tɨ́ ka' ŋwə bə̀ŋsə nu tɨ́ ŋwə me. Shù fɨ maa shi kɔ́, wə kee baa kìi fwi maa məbaa bìtə nu tɨ́ ŋwə me.
