1 Nu kee baa lùu shɔ mə baa nyɔ̀' tɨ́ viŋ kɔ̀ŋ fa' ŋgwə faŋ nsiŋ baytə vətɔ maa məgaŋtə vɨɨ ley Nwi fɨ shɨ Jerusalem nə me. 2 Mə kɨɨ nə fwi yijəə yiŋ, baa bəŋsə viŋ shɔ tɨ́ vɨɨ Makedonia. Mə nàysə tɨ́ vəŋ laa vɨɨ Akaya nə du'tə vəŋ tey kɨ baytə vətɔ vəvəŋ shù fɨ maa ŋu' njii. Wutə kiŋ kɔ́ suŋtə vəŋ vəyaŋ. 3 Mə tɔ̀ŋ vaŋ-nshwi vaŋ-nsiŋ vɔ́ laa nu ŋkɨə faŋ yia bəŋsə viŋ shɔ nə, kee kiasə gù nu dayday maa nu kɔ́ me. Bàw viŋ baytə vətɔ viŋ nùŋsə, faŋ mə nə nàysə tɨ́ viŋ nə. 4 Kee bàw laa yighee njyə faŋ yia vɨɨ Makedonia vəmɔ́' jwì, vəŋ ye laa viŋ kee ta bàytə mbiŋ vətɔ me, buu tɔ kia taa dɨɨ, bu' laa yia nə nùŋ fwi sia maa viŋ. Ka' ŋkee tɔ kiŋ taa dɨɨ shɔ nɨzi. 5 Lùu ŋi' nu ŋkɨə faŋ mə nə bɨ̀'tə laa ŋkə bàw laa mə tɨ vaŋ-nshwi vaŋ-nsiŋ vɔ́, laa vəŋ fi vɨsɨ, jwì yè viŋ, viŋ baytə vətɔ vɔ́ faŋ viŋ nə kɔ̀'nə yighee vɨsɨ maa məndɔ gaŋtə vɨɨ ley Nwi fɨ shɨ Jerusalem shɔ nə. Mə taa kɨ jwi, tɨ́ mbə luu shɔ yaa fa jəə tɨ́ Nwi. Kɨ ŋkə kee lùu laa viŋ ndɔ luu yaa vɨɨ faŋ vəŋ kee kaw kɔ me. 6 Viŋ lumə laa wə ntɨə faŋ ŋwə sɔ̀ say tɨti', ndɔ shwi tɨti'; wə ntɨə faŋ ŋwə sɔ̀ yaŋ, ndɔ shwì yaŋ. 7 Bàw wə tɨ̀ me wə kɔ faŋ fwi yi kàw, kee kɔ baa bɨ'tə nshu' yi me, bu' laa Nwi yaa kɨ kaw wə ntɨə faŋ ŋwə kɔ nə məŋaytə. 8 Viŋ kɔ' kɨɨ laa Nwi kìi wutə maa məkey viŋ nə vətɔ vəjəəvə vənshə, mbə yaŋ sàynə, laa vətɔ vəjəəvə lwaŋ ghɔ viŋ, kù'nə ghee nshə, maa vənu vənshə, tɨ́ ka' viŋ baa kɨ yɨsə vənu vəjəəvə vənshə, mbə yaŋ sàynə. 9 Lùu faŋ ŋkə lùu taa ŋwa'lə Nwi laa, «Wə ntɨə faŋ ŋwə saynə vətɔ vi, kɔ̀ tɨ́ mbəəsə, nu ki lùu kəloomə, gò'sə yighee mu'.» 10 Nɨniŋ, Nwi faŋ ŋwə yaa kɨ gaa ŋgwisə vətɔ tɨ́ vɨɨ məbia, baa nə bee maa məzɨ, taa kɔ ŋgwisə vətɔ tɨ́ viŋ nɨzi, yɨsə mbə ta, tɨ́ ka' viŋ kɨ kɔ, nu kiŋ lùu kəloomə. 11 Nwi yɨsə vətɔ vənshə lwaŋ ghɔ viŋ, tɨ́ ka' viŋ kɔ̀ vətɔ ghee nshə nə fwi yimu', yia fi, gə̀ kɔ̀ tɨ́ vɨɨ, ŋkə yɨsə vəŋ kɨ bwaŋ Nwi. 12 Viŋ kɔ' kɨɨ laa ŋi' fa' ŋgwə faŋ nsiŋ fa' maa məgaŋtə vɨɨ nə, kee luu she' nu məkɔ vətɔ mbɨə faŋ mbə bəə fɨ ghɔ vɨɨ ley Nwi nə me. Ŋwə ndɔ yɨsə nu faŋ ŋkə shɔ̀ɔ yiŋkii, nu kɔ́ lùu laa vɨɨ vəyaŋ ndɔ kɨ bwaŋ Nwi shɔ. 13 Fa' ghɔ́ ndɔ twelə nu kiŋ tɨ́ vəŋ laa viŋ kù'nə maa nu Nwi. Vəŋ kɨ bəŋsə Nwi, bu' laa viŋ bìŋ ntɔŋ yijəə Nwi kɔ̀ŋ Yeso Kristo ntee, zɔnə ŋwə, gaŋtə vəŋ nə vətɔ viŋ nə fwi yimu'. Vəŋ ndɔ biŋ viŋ nɨniŋ, ghɔ vɨ vɨɨ Nwi vənshə, 14 ndwaŋ Nwi tɔ viŋ. Jɨŋ yiŋ kɨ zasə vəŋ nɨzi, bu' gəŋsə Nwi, faŋ Nwi nə gaŋtə viŋ shɔ̀ɔ ki nə. 15 Nsiŋ kɨ bwaŋ Nwi bu' laa ŋwə nə key nsiŋ shɔ̀ɔ ki.
