1 Vaŋ-nshwi via, viŋ kɔ' kɨɨ laa nu ŋkɨə faŋ yia nə jwì yɨ viŋ nə, kee ndì day me. 2 Viŋ baa luu kɨɨ faŋ yia nə bɨ yè ŋɨ' ntɨ' Filipi, vɨɨ kɔ ŋɨ' tɨ́ yia dɨdɨ'. Luu nə, yia jia fwi bu' Nwi wia, jwi fɨ̀'tə ntɔŋ yijəə Nwi tɨ́ viŋ, faŋ vɨ nə kɔlə nywènə yia nə. 3 Yia nə kee tɨsə viŋ nə nu faŋ ŋkə kee yiku'nə me, kee gì tɨ́ viŋ nə fwi yibwə me, kee mɔ̀ŋ maa məbwe'sə viŋ me. 4 Yia bee kii gisə nu ŋkɨə faŋ Nwi kəə, bu' laa ŋwə nə mɔ̀ŋ yia laa yia kù'nə mu, buu kɔ̀ nu kɔ́ taa ghɔ yia, faŋ lùu ntɔŋ yijəə Nwi. Yia fɨ'tə ntɔŋ yɔ́ nɨniŋ, kee kəə kɨ bawsə too vɨɨ me, luu she' maa məbawsə too Nwi faŋ ŋwə kɔ' kɨɨ nə fwi sia. 5 Viŋ kɔ' kɨɨ laa yia nə kee ta gì yigisə bəŋ tɨ́ viŋ tuu yighee mu' me, tɨ'nə me gì yigi yimɔ́' maa məshitə viŋ shɔ, maa məkəə ka fɨ yiba me. Nwi kɔ' kɨɨ nɨniŋ nɨzi. 6 Yia nə kee kəə laa viŋ, tɨ'nə me vɨɨ mɔ́', kɨ bəŋsə yia me, 7 faŋ yia nə kɔlə kìi wutə bu' laa yia lùu vɨɨ ntɔŋ Kristo. Yia nəə bwasə yiŋwaa yia nsi, kɨ' viŋ faŋ nsiŋ nə luu mɔ́' nə, she' yaa nshu weembwa yaa kɨ kɨ' ŋwiŋ wi nə. 8 Bu' ŋkawnə yia maa viŋ, yia nə kee kaw she' laa yia fɨ'tə ntɔŋ yijəə Nwi tɨ́ viŋ me. Yia nə bee kii kɔ̀ yiŋwaa yia tɨ́ viŋ, bu' faŋ yia kaw viŋ dɨdɨ'. 9 Vaŋ-nshwi via, maa viŋ lùmə faŋ yia nə fà' nə wutə, fà' vətu' nə shɨshwi, laa kɨ tuu wə fɨ wiŋ kee kɨ ye ŋɨ' maa məzəsə yia me, faŋ yia nə fɨ̀'tə ntɔŋ yijəə Nwi tɨ́ viŋ nə. 10 Nshɨ-tɔ wiŋ, nə Nwi, nə ye nə yisɨ faŋ nshinə yia nə luu yiley, baa lùu yiloomə taa ŋwaa viŋ, yia kee gu tuu nu maa viŋ, faŋ viŋ nùŋ fwi siŋ maa Nwi nə me. 11 Viŋ kɔ' kɨɨ laa yia nəə yɨ nu maa wə nə mu' nə mu' fɨ wiŋ she' faŋ tɨɨ wee yaa kɨ yɨsə maa ŋwiŋ wi. 12 Yia nəə bwasə fwi siŋ, kwàŋ wutə maa viŋ, kɨ tɨsə viŋ maa məshi nshinə njyə faŋ nyə kù'nə tɨ́ Nwi, faŋ ŋwə tìi viŋ taa nu yifwàŋ ki, faŋ ŋkə bàw yaa ŋwə. 13 Nɨniŋ, yia bwaŋ Nwi bu' viŋ ghee nshə. Yighee njyə faŋ yia nə jwì nə yigisə Nwi tɨ́ viŋ nə, viŋ zɔ, nùŋ fwi siŋ shɔ, kee ndì yigisə yɔ́ yaa yigisə wə mənsaw me, ndì lùu yaa yigisə Nwi, faŋ nyə lùu nɨniŋ yinsəŋ. Nə luu nɨniŋ bu' laa Nwi nə fa' taa ŋwaa viŋ, faŋ viŋ nə nùŋ fwi siŋ maa ŋwə nə. 14 Vaŋ-nshwi via, viŋ ndi ghuu yito' vɨɨ Nwi fɨ shɨ Judia, faŋ vəŋ lùu vɨɨ Nwi fiiba Yeso Kristo, bu' faŋ viŋ ye ŋɨ' fɨ ghɔ vɨɨ shɨ viŋ, she' faŋ vɨɨ Jus vɔ́ ye ŋɨ' fɨ ghɔ vɨɨ shɨ vəŋ nə. 15 Vɨɨ Jus nə kee kɔ ŋɨ' she' tɨ́ vɨɨ Nwi fiiba Yeso me, vəŋ nə bee kii zwì nshɨ-tɔ tɨta Yeso, baa zwilə nshiisə-ŋii sɔghɔ nɨzi, baa luu sho' ghuu ghia. Vəŋ kee bàw tɨ́ Nwi me; vəŋ lùu vɨɨ mbeenə vɨɨ vənshə. 16 Vəŋ baa fəŋ yia laa kɨ yia kɨ gisə tɨ́ vɨɨ tətɔŋ fu, tɨ́ ka' Nwi bweysə vəŋ me. Nɨniŋ, vəŋ lwèsə mfɨ' nu bwə vəŋ yighee mu'. Luu nə, nsɔ' Nwi du'tə nyə jia vəŋ maa məndisə vəŋ. 17 Vaŋ-nshwi via, faŋ nsiŋ nə gàasə maa wee-fɨ-kuŋtə yighee nee nə, jɨŋ yiŋ za yia dɨdɨ', faŋ vɨ kɔlə gàasə she' məyenə yiŋwaa nyaa-nsiŋ, kee gàasə fwi saŋ-nsiŋ me. Nɨniŋ, yia kəə ŋkee dɨdɨ' maa məye yikə' yiŋ ghee nshə, 18 kəə jwi ye viŋ ghee ghee. Nshɨ-tɔ ŋwaa, Pɔɔl, yaa kəə jwi yɨ viŋ yighee mu', tɨ'nə me ghee bɔɔ, luu nə, tɨɨ vəzwitə vəbwəvə fəŋ yia. 19 Nu ŋkɨə tɨ́ ka' yia ŋaytə shɔ vɨsɨ tɨta ŋwaa-nsiŋ Yeso maa yighee njyə faŋ ŋwə ndɔ bəŋ jwi nə, taa luu kə? Nu ŋkɨə tɨ́ ka' vɨ ndɔ bəŋsə yia shɔ, yia nùŋ fwi sia shɔ, lùu kə? Maa luu she' viŋ. 20 Yia ndɔ ŋaytə maa yighee yɔ́ luu bu' viŋ. Nwi yɨsə yia kwalə bu' viŋ.
