Tito 3

1Catseilcwii'ndyu' nda̱a̱na na catuee'ndyecjena nnom gobiernom ñequio nt'omcheⁿ naⁿman'iaaⁿ, calacanda̱a̱'ndyena ndo' c'omc'eendyena na nl'ana yuu naya. 2Meiⁿcwiindyena tala'neiⁿna ñ'oomwi' nacjoo' x'iaana. Calaxmaⁿna nn'aⁿ na tjatia' cachona ñequio nt'omcheⁿ, ya nn'aⁿndyena ñequio cha'tso. Cat'mo̱o̱ⁿna na nioom' n'omna ñequio cha'tsondye nn'aⁿ. 3Ee xuee na ñejndyowana' mati jaa ñet'o̱o̱ⁿya na ntjeiⁿ ljo' ñel'aaya, na quie' n'o̱o̱ⁿya jo nnom Ty'o̱o̱ts'om. Tyolaxmaaⁿya nn'aⁿ na jnda̱ tsuundye. Tyondya̱'ntjo̱ⁿtya̱a̱ⁿ nda̱a̱ cha'tso nnom na queeⁿ n'om seii'a ñequio na jeeⁿ neinco nquiuuya. Tyolajomndyo̱ ñequio natia. Tyolata̱a̱' n'o̱o̱ⁿya, jndoo nn'aⁿ jaa ndo' jndo̱o̱ya joona. 4Sa̱a̱ nquii Ty'o̱o̱ts'om na macwji'n'maaⁿñê jaa, t'mo̱o̱ⁿ na jeeⁿ ya mach'eeⁿ ndo' na candya' ts'oom nn'aⁿ, 5tjei'n'maaⁿñê jaa, nchii nc'e na ñel'aaya yuu na maty'iomyana', sa̱a̱ nc'e na wi' ts'oom jaa. Tjei'n'maaⁿñê jaa na seiljoom'm jaa na tuiindyo̱xco̱o̱ cha cantyja 'naaⁿ' Espíritu nlaxmaaⁿya nn'aⁿ na cwita'ndo' xco. 6Cantyja 'naaⁿ' Jesucristo na macwji'n'maaⁿñê jaa, canda̱a̱'ya jnda̱ tquiaa Ty'o̱o̱ts'om Espíritu Santo quii' n'o̱o̱ⁿya, 7cha na nnda̱a̱ nnto'ño̱o̱ⁿya juu na ntyjaa'ya n'o̱o̱ⁿya na ticantycwii na cwitando̱o̱'a nc'e na jnda̱ jndyaandyo̱ jnaaⁿya nc'e naya na matseixmaaⁿ. 8Ñ'oomwaa' ñ'oom na mayuu' juuna', tintseitsaaⁿ'ndyu' na matseineiⁿ' joona' nda̱a̱ nn'aⁿ na cwila'yu'. Cjoo' n'omna na nl'ana cha'xjeⁿ na maty'iomyana' ee jeeⁿ ya na nluii naljo' ndo' cwitei'jndeiina' cha'tsondye nn'aⁿ. 9Sa̱a̱ cwji'ndyu' cantyja 'naaⁿ ñ'oom na cwila'ñ'eeⁿ' ndyuee nn'aⁿ, ñ'oom na cwilaneiⁿna cantyja 'naaⁿ nn'aⁿ na ñet'om teiyo, ñ'oom na cañ'eeⁿ' cantyja 'naaⁿ' ljeii na tqueⁿ Moisés na cantyja 'naaⁿ' jo' cwila'ntja'ndyena, ee nmeiⁿ' jeeⁿ cwe' ts'iaaⁿ'ndyo, ticateijndeiina' nn'aⁿ. 10Xeⁿ na m'aaⁿ 'ñeeⁿ juu quii' ntaaⁿ'yo' na mach'ee na cwito̱ⁿ'ndye nn'aⁿ tmaaⁿ' na macwji' Ty'o̱o̱ts'om cwentaaⁿ'aⁿ, cwaⁿ' tsaⁿñeeⁿ cwii oo we ndii', sa̱a̱ xeⁿ titseiñ'oom'ñê 'u, tañequiaa' na nntseijomñê quia cwitjomndyo', 11ee macaⁿna' na catsei'no̱ⁿ' na tixcwe m'aaⁿ tsaⁿ'ñeeⁿ jo nnom Ty'o̱o̱ts'om ndo' tseixmaaⁿ jnaⁿ, ndo' juuna' matseijndaa'ñena' na nnt'uiina' jom. 12Quia na njño̱o̱ⁿya Artemas oo Tíquico na m'aaⁿ', queⁿndyu' na nncja'ndo' ja tsjoom Nicópolis, ee jnda̱ seijndaa'ndyo̱ na nnc'o̱o̱ⁿya jo' jo' ncuee na teiⁿ. 13Ndo' cateijndei' Apolos ñ'eⁿ ti'Zenas, tsaⁿ na matsei'no̱ⁿ' ljeii na tqueⁿ Moisés. Catsa' cwanti na nnda̱a̱ nntsa' na nnteijndei' joona na nnc'oonquiana ñ'oom' Ty'o̱o̱ts'om, cha meiⁿcwii ticatseitjo̱o̱na' joona. 14Mati catsu' nda̱a̱ nn'aaⁿya na cwila'yu' na queⁿndyena na cal'ana cha'tso nnom na maty'iomyana' cha nnda̱a̱ nntei'jndeiina nn'aⁿ na matseitjo̱o̱na' joo. Cal'ana na ljo' cha nlaxmaⁿna nn'aⁿ na ya nn'aⁿndye. 15Cha'tsondye nn'aⁿ na m'aⁿ ñ'eⁿndyo̱ cwiluena na xmaⁿndyu'. Mati 'u catsu' na xmaⁿndye nn'aⁿ na wi' n'om jaa na tjoom' cwila'yu'ya n'o̱o̱ⁿya. Ty'o̱o̱ts'om catio'naaⁿñê cha'tsondyo'. Amén.

will be added

X\