Romanos 15

1Jaa na tyeⁿ la'xmaaⁿya na cwila'yu'ya n'o̱o̱ⁿya ñ'eⁿ Ty'o̱o̱ts'om cantyja 'naaⁿ' ñ'oommeiⁿ', joo nn'aⁿ na tityeⁿ cwila'yu'na cantyja 'naaⁿ' jo', laxmaaⁿya na cacho̱o̱ya na cateijndeii joona, nchii macanda̱ cwijndo̱o̱'a cantyja 'naaⁿ ncjo̱o̱ya. 2Cwii cwiindyo̱ cal'aaya yuu na nncjaawee' n'om nc'iaaya, cha nnteijndeiina' joona, ndo' cha na nnc'oonajnda̱na na cwila'yu'ya n'omna ñ'eⁿ Ty'o̱o̱ts'om. 3Ee meiⁿ nquii Cristo tîcats'aaⁿ yuu na cjaawee' ntyjeeⁿ. Jom tjoom cha'xjeⁿ waa ljeii naquii' libro Salmos na matsona': “Ñ'oomwi' na tyotuee' nn'a nacjo', mati ty'oomna' ja.” 4Ee cha'tso ñ'oom' Ty'o̱o̱ts'om na teiljeii tandyo xuee, teiljeiina' cha ca'mo̱ⁿna' nda̱a̱ya chiuu na c'o̱o̱ⁿya jo nnoom. Teiljeiina' cha cantyja 'naaⁿ joona' nnda̱a̱ nntsaantyjo̱o̱ya cantyja 'naaⁿ'aⁿ na ñecwii n'o̱o̱ⁿya ndo' na nnc'o̱o̱ⁿt'maaⁿ'ndyo̱ n'o̱o̱ⁿya na nntyjaa' n'o̱o̱ⁿya na nluii cha'tso chiuu t'maⁿ ljeii'ñeeⁿ. 5Nquii Ty'o̱o̱ts'om na mañequiaaⁿ nda̱a̱ya na cwicantyjaa' n'o̱o̱ⁿya jom, cateijneiⁿ 'o na ya c'om'yo' ñequio nc'iaa'yo' cha'xjeⁿ na l'ue ts'om Cristo Jesús, 6cha na cha'tsondyo'ñ'eⁿ'yo' ñequio ñecwii jndyee'yo' na nla't'maaⁿ'ndyo' Ty'o̱o̱ts'om Tsotye nquii Ta Jesucristo. 7Jo' chii cato'ñoom'yo' nc'iaa'yo' cha'xjeⁿ Cristo maco'ñoom 'o, cha na nluiit'maⁿñe Ty'o̱o̱ts'om. 8Luaa matsjo̱o̱ nda̱a̱'yo', Cristo jñoom na jndyondi'ntjoom nda̱a̱ nn'aⁿ judíos cha na nntseicanda̱a̱'ñê ñ'oom na tso Ty'o̱o̱ts'om nda̱a̱ welooya na nnts'aaⁿ ndo' mati cha m'mo̱ⁿna' na mayom'm. 9Mati jndyo Cristo cha nn'aⁿ na nchii judíos nnda̱a̱ nla't'maaⁿ'ndyena Ty'o̱o̱ts'om na m'aaⁿ na wi' ts'oom joona. Ee matso ñ'oom'm na teiljeii: Maxjeⁿ nntseit'maaⁿ'ndyo̱ 'u quii'ntaaⁿ nn'aⁿ na nchii judíos. Nntaya luantsa na nntseit'maaⁿ'ñena' 'u. 10Ndo' cwiicheⁿ ñ'oom na teiljeii matsona': 'O nn'aⁿ na nchii judíos, c'om'yo' na neiⁿ'yo' ñequio nn'aⁿ na maqueⁿ Ty'o̱o̱ts'om na cwiluiindye cwentaaⁿ'aⁿ. 11Mati mawaa cwiicheⁿ ñ'oom na teiljeii na matsona': Cha'tsondyo' 'o nn'aⁿ na nchii judíos cwiluiindyo', cala't'maaⁿ'ndyo' Ta Ty'o̱o̱ts'om. 12Ndo' mati teiljeii ñ'oom na tso Isaías: Nch'ioo' Isaí nndei' ts'oom'ndaa, jom nntseiwena' na nntsa̱'ntjoom nn'aⁿ na nchii judíos cwiluiindye. Joona nla'cantyjaa' n'omna jom. 13Nquii Ty'o̱o̱ts'om mañequiaaⁿ na cwicantyjaa' n'o̱o̱ⁿya. Macaⁿ'a na nñequiaaⁿ na nla'xmaⁿñ'eⁿ'yo' na neiⁿ'yo' jo nnoom, ndo' na nnc'om'yo' na tjañomtiuu m'aⁿ'yo' nc'e na cwilayu'yo' ñ'eⁿñê, cha cantyja 'naaⁿ' Espíritu Santo nntseicwaljoo'tina' na laxmaⁿ'yo' na cwicantyjaa' n'om'yo' jom. 14Cantyja 'naⁿ' 'o nn'aⁿya na cwila'yu'yo', matsei'no̱ⁿ'a na cwila'xmaⁿ'yo' cha'tso nnom na nnteijndeiina' nc'iaa'yo'. Ndo' mati cwila'no̱ⁿ'ya'yo' cantyja 'naaⁿ' ñ'oom na cwilayuu'a, hasta mati nnda̱a̱ nnt'mo̱ⁿ'yo' joona' nda̱a̱ nc'iaa'yo'. 15Sa̱a̱ ti'maaⁿ' ts'o̱o̱ⁿya na matseiljeiya cartawaa na m'aⁿ' 'o nn'aⁿya na cwila'yu'yo' cha tintsuu' n'om'yo' joona'. Mats'aa naljo' nc'e cha'cwijom cwii xuu na maju'na' nacjoya na cats'aaya. Mats'aa na ljo' ee naya na mañequiaa Ty'o̱o̱ts'om na matseixmaⁿ. 16Ndo' naljo', majo' na tqueeⁿ ja na mandi'ntjo̱ⁿya nnom Jesucristo quii'ntaaⁿ nn'aⁿ na nchii judíos. Mañequiaya ñ'oom naya 'naaⁿ'aⁿ na macwji'n'maaⁿñê nn'aⁿ na cwila'ljo Jesucristo naquii' n'om, cha nñequiaya joona nnom Ty'o̱o̱ts'om cha'xjeⁿ mañequiaa ts'aⁿ cwii ofrenda na nnco'ñoom, ee nquii Espíritu Santo jnda̱ tqueⁿ ljoom'm joona. 17Nc'e na matseiyu'a ñ'eⁿ Cristo Jesús, mañequiaana' na neiⁿya na laa'ti' waa na mandi'ntjo̱ⁿya nnom Ty'o̱o̱ts'om. 18Ticats'aana' ntyjii na nncwjii'a cwenta cwanti ya ts'iaaⁿ na nl'a nt'omcheⁿ, macanda̱ ntyjiiya na Ty'o̱o̱ts'om ñeteil'uee'ñê ja na nncwantjo̱ⁿya nn'aⁿ na nchii judíos cwentaaⁿ'aⁿ, cha nla'canda̱a̱'ndyena jo nnoom. Ñetantjo̱ⁿya joona ñequio ñ'om'ndyo̱ya, ndo' ñequio ljo' na ñenty'iaana chiuu waa na tyom'aaⁿya quii'ntaaⁿna. 19Ndo' na luaa' waa, jnda̱ seicanda̱a̱'ndyo̱ na mañequia ñ'oom naya na macwji'n'maaⁿñe Cristo nn'aⁿ, tyots'aa na ljo' Jerusalén ñequio cha'tso ntyja hasta tue'ñoomna' ndyuaa Ilírico. 20Luaa' waa na tyotseijndo̱ na tyoñequiaya ñ'oom nda̱a̱ nn'aⁿ cantyja 'naaⁿ' na cwilui'n'maaⁿndyena, tyots'aa ts'iaaⁿ yuu na tijoom ñejndye nn'aⁿ ñ'oom cantyja 'naaⁿ' Cristo, cha nchii ts'iaaⁿ na jnda̱ to̱' nt'omcheⁿ nntseicañjo̱o̱ⁿ'a. 21Ee waa ñ'oom 'ndyoo Isaías na teiljeii cantyja 'naaⁿ' Cristo, tsoom: Nn'aⁿ na tijoom ñenty'iaa jom nndyena cantyja 'naaⁿ'a. Ndo' joo nn'aⁿ na tijoom ñejndye cantyja 'naaⁿ'aⁿ, nla'no̱ⁿ'na. 22Nc'e ts'iaaⁿmeiⁿ', jndye xuee tyotseicu'na' ja na nncua̱caño̱o̱ⁿya 'o na m'aⁿ'yo' Roma. 23Sa̱a̱ je' ticaⁿna' na ñequii'cheⁿ nñ'a̱ⁿ ñjaaⁿ. Ndo' nc'e na majndye ndyu matseiqueeⁿna' ts'o̱o̱ⁿya na ñe'cjo̱cando̱o̱'a 'o, 24jo' chii na matseitiuuya na nncwino̱o̱ⁿya na m'aⁿ'yo' quia na nncjo̱ya ndyuaa España, ndo' xeⁿ jnda̱ tquiaana' na neiⁿya na mam'aaⁿtjo̱o̱ⁿya cwantindyo xuee, quia jo' mancjo'ti'yo' nnteijndei'yo' na nncjo̱ ncjo̱tya̱. 25Sa̱a̱ jo̱jndya̱a̱ya Jerusalén, ee jo̱n'o̱ⁿya cwii na nnteijndeiina' nn'aⁿya nn'aⁿ judíos na cwila'yu' na m'aⁿ jo' jo'. 26Ee nn'aaⁿya na m'aⁿ ndyuaa Macedonia ñequio Acaya jnda̱ jla'tjomna tsjo̱'ñjeeⁿ na nla'cwanomna na matei'jndeiina' nn'aaⁿya na cwila'yu' na jeeⁿ jñeeⁿ'ndye na m'aⁿ Jerusalén. 27Ee jla'tiuuna na nl'a naya'ñeeⁿ nn'aⁿ jndíos na cwilayu', ndo' maty'iomna' na ljo' cal'ana ee cha'cwijom na cho'jnaⁿna nda̱a̱ naⁿ'ñeeⁿ, ee cwicandaana na cwicalui'n'maaⁿndyena nc'e nn'aⁿ judíos. Jo' chii matsona' na catei'jndeiina naⁿ'ñeeⁿ 'naⁿ na macaⁿna'. 28Ndo' quia na jnda̱ seicanda̱a̱'ndyo̱ ts'iaaⁿmeiⁿ', ndo' xeⁿ jnda̱ ljo tsjo̱'ñjeeⁿ'ñeeⁿ lueena, quia ljo' nncwino̱o̱ⁿya na m'aⁿ'yo' na jo̱ ndyuaa España. 29Ee ntyjiiyaya quia na nncua̱ya na m'aⁿ'yo', jeeⁿ ya nntio'naaⁿñe Cristo 'o na nñequiaya ñ'oom'm nda̱a̱'yo'. 30'O nn'aⁿ na cwila'yu'yo', nc'e Taya Jesucristo ndo' cantyja 'naaⁿ' na mañequiaa Espíritu Santo na wi' n'o̱o̱ⁿya nc'iaaya, macaⁿna' na queⁿndyo' na calajomndyo' ñ'eⁿndyo̱ na nlana̱a̱ⁿya nnom Ty'o̱o̱ts'om cantyja 'naⁿya. 31Cataⁿ'yo' nnoom na nlui'n'maaⁿndyo̱ luee joo nn'aⁿ na m'aⁿ ts'o̱ndaa Judea na tiñe'cala'yu'. Ndo' mati joo nn'aⁿ cwentaaⁿ'aⁿ na m'aⁿ Jerusalén nncjaawee' n'omna na nnto'ñoomna naya na jo̱ñ'o̱ⁿ cwentaana. 32Cha xeⁿ na Ty'o̱o̱ts'om l'ue ts'om nncue'caño̱o̱ⁿya 'o ñequio na neiⁿya, ndo' na nnty'iaya 'o nnts'aana' jndaa'jom na nncwajndya̱ya. 33Nquii Ty'o̱o̱ts'om na mañequiaa na tjaa'naⁿ ñomtiuu cwic'o̱o̱ⁿya jo nnoom, c'oomñê ñ'eⁿndyo' na cha'tsondyo'. Amén.

will be added

X\