Apocalipsis 8

1Nquii Catsmaⁿ, quia na seicanaaⁿñê cwiicheⁿ joo na jnda̱ ntquiee' na ta̱'tyeⁿ tsom'ñeeⁿ, quia jo' teicheⁿ cañoom'luee cha'na xcwe hora. 2Jnda̱ jo' nty'ia ntquiee' ángeles na meiⁿ'ntyjee' jo nnom Ty'o̱o̱ts'om. To'ñoomna ntquiee' ntu. 3Ndo' tue'cañoom cwiicheⁿ ángel. Tjameintyjeeⁿ'eⁿ ndyeyu nomts'om na tuiina' ñ'eⁿ s'om cajaⁿ. Maleiñ'oom xo̱' cwentaa' tsioomsuu na tuiina' ñ'eⁿ s'om cajaⁿ. Ndo' to'ñoom cwenta jndye suu na nntseicoom nacjoo' nomts'om na meintyjee' jo nnom tio yuu na wacatyeeⁿ Ty'o̱o̱ts'om. Seitjoom suu'ñeeⁿ ñequio ñ'oom na cwila'neiⁿ cha'tso nn'aⁿ nnom Ty'o̱o̱ts'om, majoo nn'aⁿ na cwiluiindyena cwentaaⁿ'aⁿ. 4Jnda̱ jo' seicoom joona'. Tjawa tsioomsuu'ñeeⁿ jo nnom Ty'o̱o̱ts'om na tjoom'na' ñequio ñ'oom na cwila'neiⁿ nn'aⁿ nnoom na la'xmaⁿ cwentaaⁿ'aⁿ. 5Ndo' juu ángel'ñeeⁿ seicatom'm xo̱' 'naaⁿ'aⁿ ñequio ñoom na ntyjo nomts'om. Jnda̱ chii tjoom'm juuna' xjeⁿ tsjoomnancuecheⁿ. Mañoom' teic'uaa na jndeii cwila'xuaa ntsuee. Jndye nnom na tyowic'uaa. Tco'na' chom tsuee, ndo' s'eii. 6Quia jo' joo ntquiee' ángeles na cwilei'cho ntquiee' ntu, jla'jndaa'ndyena na nntjo̱o̱'na. 7Juu ángel najndyee tjo̱o̱ⁿ'o̱ⁿ ntu 'naaⁿ'aⁿ. Ndo' jnaⁿna' na tua' tsaaⁿ, tua' chom, na tjoom'na' niom'. Tquiaana' tsjoomnancue. Ndo' tco manndyoo' xcwe tsjoomnancue mati tco manndyoo' xcwe n'oom na meiⁿ'ntyjee', ndo' tco cha'tso jnda̱ ndeii. 8Ángel na jnda̱ we tjo̱o̱ⁿ'o̱ⁿ ntu 'naaⁿ'aⁿ, quia jo' ty'oom chom cwii cha'cwijom sjo̱ t'maⁿ, jnda̱ chii tju'na' jo' ts'om ndaaluee. Ndo' manndyoo' xcwe na cha'tso ndaaluee seicwaqueⁿna' niom'. 9Jo' chii s'aana' na manndyoo' xcwe na cha'tso quioo' na m'aⁿ ndaaluee, tja̱yo'. Ndo' manndyoo' xcwe l'aandaa seityuii'na'. 10Ángel na jnda̱ ndyee tjo̱o̱ⁿ'o̱ⁿ ntu 'naaⁿ'aⁿ, quia jo' jnaⁿ cwii caxjuu t'maaⁿ tsjo̱'luee. Cwicoñê cha'cwijom chom scacatsuu ndo' tiooñê nacjoo manndyoo' xcwe candaa ñ'eⁿ lui'xo̱'. 11Ndo' s'aana' jeeⁿ ja ndaatioo'ñeeⁿ cha'cwijom tsco tjacanoom. Jo' chii caxjuu'ñeeⁿ seicajndyuna' tsco tjacanoom. Ndo' jndye nn'aⁿ na teil'uee'ndye ndaa'ñeeⁿ, tja̱na ee jeeⁿ jana'. 12Ángel na jnda̱ ñequiee tjo̱o̱ⁿ'o̱ⁿ ntu 'naaⁿ'aⁿ, quia jo' manndyoo' cha'na xcwe ñe'quioom' ñ'eⁿ chi' sei'ndaa'na'. Teintomna'. Ndo' majo'ti cancjuu tei'ndaa'. Taticwixueena'. Mati ñe'quioom' seitjo̱o̱na' cha'na ñequiee hora na taticwixueeñê. Ndo' mati natsjom, seitjo̱o̱na' cha'na ñequiee hora na taticwixueeñe chi' ñequio cancjuu. 13Quia jo' nty'iaya, mantyja cwiicheⁿ ángel nandye. Ndo' jndiiya na jndeii matseixuaa, tso: —Jeeⁿ wi' nntjoom nn'aⁿ na m'aⁿ tsjoomnancue, quia na nleic'uaa ntu na cwinntjo̱o̱' ndyee ángeles'ñeeⁿ.

will be added

X\