Apocalipsis 19

1Jnda̱ teinom na nmeiiⁿ', jndiiya na teic'uaa jndyee cwii tmaaⁿ' nn'aⁿ na jndyendye na m'aⁿ cañoom'luee. Cwiluena: Aleluya. Nquii Ty'o̱o̱ts'om cwentaaya tseixmaaⁿ na cwilui'n'maaⁿndyo̱. Maty'iomna' na calawa̱a̱ndya̱a̱ya jom, ee nqueⁿ tseixmaaⁿ najneiⁿ. 2Macu'xeeⁿ nn'aⁿ cha'xjeⁿ na maty'iomyana' ndo' ñequio ñ'oom na mayuu'. Ee jnda̱ tu'xeeⁿ juu sculjaa' na jndye ñ'oom niom cantyja 'naaⁿ', tsaⁿ na sei'ndaa' nn'aⁿ tsjoomnancue na cwe' tyom'aⁿyana ñ'eⁿñe. Ee jnaaⁿ' juu na tja̱ nn'aⁿ cwentaa' Ty'o̱o̱ts'om na tyondye'ntjom nnoom, jo' chii s'aaⁿ na tioomñe tsaⁿ'ñeeⁿ. 3Ndo' cwiicheⁿ cwii ndii' jluena: —Aleluya. Ticantycwii na cwi'oowa ndioom na cwico tsjoom'ñeeⁿ. 4Ndo' joo ntquiuu nchoo' ñequiee nn'aⁿ na cwiluiitquiendye ñequio joo ñequiee naⁿ na ta'ndo', ty'eta'nquiona nnom nqueⁿ na wacatyeeⁿ tio. Tyola't'maaⁿ'ndyena jom, tyoluena: —Aleluya. Amén. 5Quia jo' teic'uaa cwii jndye nacañoom' tio, tso: Cha'tsondyo' 'o na cwindye'ntjom'yo' nnom Ty'o̱o̱ts'oomya, cala't'maaⁿ'ndyo' jom. 'O nn'aⁿ na cwicatyue'yo' jom, meiiⁿ na cje cwil'a'yo', meiiⁿ na t'maⁿ cwiluiindyo', cala't'maaⁿ'ndyo' jom. 6Quia jo' jndiiya na teic'uaa cha'cwijom na cwila'neiⁿ jndyendye nn'aⁿ, cha'cwijom na c'uaa 'ndyoo jndaa, ndo' cha'cwijom na jndeii cwila'xuaa ntsuee. Tyoluena: Aleluya. Nquii Ta Ty'o̱o̱ts'om cwentaaya, cha'tso nnom najndeii matseixmaaⁿ, m'aaⁿ na matsa̱'ntjoom. 7C'o̱o̱ⁿya na neiiⁿya. Cats'aana' na t'maⁿ na neiiⁿ' n'o̱o̱ⁿya, ndo' calawa̱a̱ndya̱a̱ya jom. Ee jnda̱ tue'ntyjo̱ na manncoco nquii Catsmaⁿ. Ndo' tsaⁿ na nluiiñe scoom'm mam'aaⁿc'eeñe. 8Macwee liaa lino na jeeⁿ ya na jnda̱ jndaa', caxueena' ndo' lju'na'. Juuna' tseixmaⁿna' cha'tso nnom ts'iaaⁿ na maty'iomyana' na ñel'a nn'aⁿ na tqueⁿ Ty'o̱o̱ts'om na lju' n'om. 9Quia jo' tso ángel no̱o̱ⁿ: —Luaa catseiljei': “Jeeⁿ neiiⁿ nn'aⁿ na maqueeⁿ' Ty'o̱o̱ts'om na cala'jomndye nantquie na macoco juu Catsmaⁿ.” Jnda̱ chii tsoom no̱o̱ⁿ: —Ñ'oommeiⁿ' la'xmaⁿna' ñ'oom na mayuu' na matseineiⁿ nquii Ty'o̱o̱ts'om. 10Quia jo' tco̱o̱'a xtya̱ jo nc'ee ángel'ñeeⁿ na nntseit'maaⁿ'ndyo̱ jom. Sa̱a̱ tsoom no̱o̱ⁿ: —Tintsa' na luaa' ee tjom na cwindya̱'ntjo̱o̱ⁿya nnom Ty'o̱o̱ts'om ñ'eⁿndyu' ñequio nquiee nc'ia' na cwiljoo'ndyetyeⁿ cantyja 'naaⁿ' ñ'oom naya na t'mo̱ⁿ Jesús. Macanda̱ nquii Ty'o̱o̱ts'om catseit'maaⁿ'ndyu'. Ee ñ'oom na cwitjei'yuu'ndye nn'aⁿ cantyja 'naaⁿ' Jesús, ljo'yu la'xmaⁿna' ñequio ñ'oom' Ty'o̱o̱ts'om na tyoñequia profetas. 11Quia jo' nty'iaya na wanaaⁿ cañoom'luee. Teitquioo'ñe cwii caso canchii' ndo' nqueⁿ na ljoom juuyo' matseicajndyuna' jom tsaⁿ na ñe'cwii na mach'eeⁿ ndo' na mayom'm. Macu'xeeⁿ nn'aⁿ cha'xjeⁿ na maty'iomyana' ndo' mach'eeⁿ tia' nacjoo nn'aⁿ na cwi'oo nacjoom'm. 12N'omnnoom matseijomna' cha'cwijom ntsaachom ndo' jndye corona ñjom xqueeⁿ. Waa xueⁿ'eⁿ na teiljeiina' nacjoom'm na macanda̱ nqueⁿ ntyjeeⁿ, tjaa'naⁿ 'ñeeⁿ caljeii. 13Cweⁿ cwii liaatco na teicoo'ñ'eⁿna' niom'. Ndo' xueⁿ'eⁿ na nquiu nn'aⁿ, jo' jo' Ñ'oom' Ty'o̱o̱ts'om. 14Ndo' joo na cwiluiindye sondaro cañoom'luee, ty'entyjo̱na naxeeⁿ'eⁿ na ntyjondyena catso canchii'. Cwee'na liaa canchii' na lju'na' na tuiina' ñ'eⁿ lino na jeeⁿ ya. 15Quii' 'ñom ndii' cwii xjo na jeeⁿ ta̱a̱. Juuna' ma'mo̱ⁿna' na nncu'xeeⁿ nn'aⁿ njoomnancue. Ndo' juu na nntsa̱'ntjoom t'maⁿ nlco'wi'na' joona. Cha'xjeⁿ cwinchjee nn'aⁿ ta̱uva na nluii' ndaa'na', maluaa' matseijomna' na nnts'aaⁿ joo nn'aⁿ na tiñe'quiandye cantyja 'naaⁿ'aⁿ. Ee nquii Ty'o̱o̱ts'om na matseixmaⁿñ'eeⁿ cha'tso nnom najnda̱, cantyjati na matseiw'eeⁿ, maluaa' nnts'aaⁿ na nlco'wi'na' naⁿ'ñeeⁿ. 16Cjoo' liaⁿ'aⁿ ndo' cjoo' tcweeⁿ'eⁿ jnda̱ teiljeii xueⁿ'eⁿ na matsona': “Ja cwiluiindyo̱ na matsa̱'ntjo̱ⁿya cha'tsondye nn'aⁿ na cwitsa̱'ntjom. Ja t'maⁿ cwiluiindyo̱ jo nda̱a̱ cha'tso nn'aⁿ na cwiluiit'maⁿndye.” 17Jnda̱ chii nty'iaya cwii ángel na meintyjee' naquii' ñe'quioom'. Jndeii matseixuaⁿ na maqueⁿ'eⁿ cha'tso cantsaa na ma'ntyja tsjo̱'luee. Matsoom: —Quio'yo' cala'jomndyo' nantquie t'maⁿ 'naaⁿ' Ty'o̱o̱ts'om. 18Quio'yo' na nntquie'yo' sei'ts'o 'naaⁿ nn'aⁿ na t'maⁿ n'iaaⁿ cwila'xmaⁿ, nn'aⁿ na cwitsa̱'ntjom sondaro, nn'aⁿ na cwiluiindye sondaro, sei'ts'o 'naaⁿ catso, mandiñ'eeⁿ nn'aⁿ na ñentyjondye jooyo'. Jndyendye nn'aⁿ nntquie'yo' sei'ts'o 'naaⁿna, mati ñ'eeⁿ nn'aⁿ na cwindye'ntjomtyeⁿ ndo' nn'aⁿ na m'aaⁿ xjeⁿ 'naaⁿ ñ'eⁿ nn'aⁿ na cje m'aⁿ, ndo' nn'aⁿ na jnda̱ tquiendye. 19Ndo' nty'iaya juu quioo'jndii tquiee ñequio cha'tso nn'aⁿna cwiluiitquiendye na cwitsa̱'ntjom tsjoomnancue ñequio sondaro 'naaⁿna. Tjomndyena na nl'ana tia' nacjoo' nqueⁿ na ljoom caso canchii' ndo' nacjoo sondaro 'naaⁿ'aⁿ. 20Ndo' nqueⁿ na ljoom caso canchii' ñequio sondaro 'naaⁿ'aⁿ jnaⁿndyena tia'ñeeⁿ. T'uena quioo'jndii tquiee ñequio quioo'jndii na jnda̱ we. Juu tsaⁿ na jnda̱ we jo', tyoñequiaa ñ'oom cantu, tyoch'ee 'naaⁿ t'maⁿ cantyja najndeii quioo'jndii tquiee. Tyonquiu'nn'aⁿ tsaⁿ'ñeeⁿ cha'tso nn'aⁿ na tquiandye na tyocañoom ljeii 'naaⁿ' quioo'ñeeⁿ lueena oo cantaana, ndo' tyola't'maaⁿ'ndyena na jlui'tsjaaⁿ'ñe juuyo'. Quia jo' nqueⁿ na ljoom caso canchii' tjoom'm wendye naⁿ'ñeeⁿ na tando' naquii' ndaaluee chom yuu na cwico ljo̱' sufra̱. 21Ndo' cha'tsondye sondaro 'naaⁿ naⁿ'ñeeⁿ na cwi'ndiina' tja̱na. Ee nqueⁿ na ljoom caso canchii', seicwjeⁿ joona ñ'eⁿ xjo na macalui'nom quii' 'ñom. Ndo' cha'tso cantsaa tcwa'caxii'ndyeyo' sei'ts'o 'naaⁿ naⁿ'ñeeⁿ.

will be added

X\