Apocalipsis 17

1Quia jo' cwii na ntquiee' ángeles'ñeeⁿ na tyolei'cho ntquiee' watso, tyje'cañoom ja. Tsoom no̱o̱ⁿ: —Candyo' luaa ndo' m'mo̱o̱ⁿya njom' na nntu'xeⁿndye nn'aⁿ tsjoom t'maⁿ'ñeeⁿ na wacatyeeⁿna' cjoo' jndye ndaa. Juu tsjoom'ñeeⁿ matseijomna' cha'cwijom cwii sculjaa'. 2Cha'na cwila'ntjeiⁿndye nn'aⁿ na cwe' luaa' m'aⁿ ñ'eⁿ sculjaa', maluaa' cwil'a nn'aⁿ na cwitsa̱'ntjom tsjoomnancue, na cwilajomndye cantyja 'naaⁿ' tsjoom t'maⁿ'ñeeⁿ. Ee cwi'oontyjo̱na cha'tso nnom jnaⁿ na cwinty'iaana na cwiluii tsjoom'ñeeⁿ. Ndo' jndye nn'aⁿ na cwinaⁿ cha'waa tsjoomnancue, cha'cwijom cwindyeena cantyja 'naaⁿ' winom na matseixmaⁿ tsjoom'ñeeⁿ. Juu na cwila'jomndyeñ'eⁿna na matseixmaⁿna', matseijomna' cha'cwijom na matseitjomñe ts'aⁿ ñequio sculjaa'. 3Quia jo' tco'na' no̱o̱ⁿ cwii na t'mo̱ⁿ Espíritu Santo. Tjañ'oom ángel'ñeeⁿ ja cwii joo yuu na tjaa'naⁿ nn'aⁿ c'oom. Jo' jo' nty'iaya cwii yuscu na wa'ljoo nacjoo' quioo'jndii na weeñe. Cha'waañeyo' teiljeii ñ'oom ntjeiⁿ na matseijnaaⁿ'na' Ty'o̱o̱ts'om. Ndo' niom ntquiee' xqueⁿyo' ndo' nqui ndei'jndyee'yo'. 4Cwee yuscu'ñeeⁿ liaa colo catsioo' ñ'eⁿ colo wee, ndo' tycwi'ñê ñequio s'omcajaⁿ, ñequio jndye nnom ljo̱' ñ'eⁿ ta̱' na jeeⁿ jnda. Ndii' waso na tuii ñ'eⁿ s'omcajaⁿ ts'o̱o̱ⁿ. Waso'ñeeⁿ too'cheⁿ ñjom na cwajndii na matseijomna' natia na mach'eeⁿ na matseintjeiiⁿ nn'aⁿ. 5Ndo' staaⁿ teiljeii ñ'oom na cwe' tjañoom' na matseicajndyuna' jom. Matsona': “Luaañe tseixmaⁿ tsjoom t'maⁿ Babilonia. Cwiluiiñê tsondyee lculjaa', ndo' x'ee cha'tso na cwajndii na cwiluii tsjoomnancue.” 6Ndo' nty'iaya yuscu'ñeeⁿ, cha'cwijom na cañeⁿ na jeeⁿ neiiⁿ'eⁿ matseicwjeⁿ nn'aⁿ na cwiluiindye cwentaa' Ty'o̱o̱ts'om, na tyotjei'yuu'ndye cantyja 'naaⁿ' Jesús. Quia na nty'iaya jom jeeⁿ seitsaⁿ'na' ja. 7Sa̱a̱ matso ángel'ñeeⁿ no̱o̱ⁿ: —¿Chiuu na jeeⁿ m'aaⁿ' ts'om'? Ja m'mo̱o̱ⁿya njom' ñ'oom wanty'iuu' cantyja 'naaⁿ' yuscum'aaⁿ', ndo' cantyja 'naaⁿ' quioo'jndii tquiee na chuu jom luaa', na niom ntquiee' xqueⁿ ndo' nqui ndei'jndyee'. 8Juu quioo'jndii'ñeeⁿ na jnda̱ tco'na' na nty'ia' ñetando'yo' ndo' je' tacwando'yo' sa̱a̱ quia nlui'nnda'yo' yuu na ticantycwii na njoom. Jnda̱ chii nncju' Ty'o̱o̱ts'om juuyo' yuu na nntsuuñeyo'. Cantyjati na tuii tsjoomnancue maxjeⁿ waa cwii libro na chuuna' ncuee nn'aⁿ na ticantycwii na cwita'ndo'. Sa̱a̱ nquiee nn'aⁿ na m'aⁿ tsjoomnancue na tyoowiljeii ncueena nacjoo' libro'ñeeⁿ, jeeⁿ nntseitsaⁿ'na' joona quia na nnty'iaannda'na quioo'jndii'ñeeⁿ. Ee teiyo ñet'oomyo' ndo' je' tac'oomñeyo' sa̱a̱ quia nncwje'nnda'yo'. 9’Ts'aⁿ na jndo̱' ts'om macaⁿna' na catsei'no̱o̱ⁿ'o̱ⁿ ñ'oomwaa: Ntquiee' xqueⁿ quioo'jndii'ñeeⁿ cwit'mo̱o̱ⁿna' ntquiee' ta yuu na wacatyeeⁿ yuscu'ñeeⁿ. 10Ndo' mati joo ntquiee' xqueⁿyo' cwit'mo̱o̱ⁿna' ntquiee' nn'aⁿ na cwitsa̱'ntjom. 'Omndye joona jnda̱ tja̱, ndo' cwii joona mam'aaⁿ ts'iaaⁿ je', ndo' cwii quia nnc'oom. Sa̱a̱ quia na nncwjeeⁿ'eⁿ matsona' na tijndye xuee nnc'oom. 11Ndo' quioo'jndii'ñeeⁿ na ñetando' ndo' je' tacwando', juuyo' cwiluiiñeyo' cwiicheⁿ ts'aⁿ na matsa̱'ntjom na jnda̱ ñeeⁿ ndo' matseix'iaa'ñe ñequio ntquiee' naⁿ'ñeeⁿ. Sa̱a̱ xeⁿ jnda̱ nncju' Ty'o̱o̱ts'om jom yuu na cwitsuundye nn'aⁿ. 12’Ndo' nqui ndei'jndye na tco'na' na nty'ia' na ntyjoo xqueⁿyo' cwit'mo̱o̱ⁿna' nqui nn'aⁿ na cwiluiit'maⁿndye sa̱a̱ tyoonaⁿna' na nntsa̱'ntjomna. Quia nnto'ñoomna na nntsa̱'ntjomna cwe' cwii taⁿ'ndyo ñequio juu quioo'jndii. 13Naⁿm'aⁿ' ñe'cwii ñ'oom joona, ndo' cantyjati najnda̱ na la'xmaⁿna ñequio na cwitsa̱'ntjomna nñe'quiana jo' nnom quioo'jndii'ñeeⁿ. 14Nqui naⁿ'ñeeⁿ nl'ana tia' nacjoo' Catsmaⁿ, sa̱a̱ jom nnaⁿñê ñ'eⁿndye joona ee cwiluiiñê Ta jo nda̱a̱ cha'tso nn'a na cwiluiitquiendye ndo' na cwiluiiñê na matsa̱'ntjoom cha'tsondye nn'aⁿ na cwitsa̱'ntjom. Ndo' mati nquiee nn'aⁿ na t'maⁿ Ty'o̱o̱ts'om, joona nla'jomndyena ñ'eⁿ nquii Catsmaⁿ, ee cwiluiindyena nn'aⁿ na jnda̱ tjeii'ñê cwentaaⁿ'aⁿ ndo' cwila'canda̱a̱'ndyena jo nnoom. 15Quia jo' tsoti ángel'ñeeⁿ no̱o̱ⁿ: —Ndaa na tco'na' na nty'ia' na cwitjom yuu na wacatyeeⁿ sculjaa'ñeeⁿ, jo' jo' ma'mo̱ⁿna' nn'aⁿ na jndyendye na jnaⁿ ticwii cwii ndyuaa, ndo' ticwii cwii nnom nn'aⁿ na tjachuii'ndye, ñequio ticwii cwii nnom na tjachuii' ñ'oom na cwila'neiⁿna. 16Ndo' joo nqui ndei'jndye na nty'ia' na ntyjoo xqueⁿ quioo'jndii na cwit'mo̱o̱ⁿna' nqui nn'aⁿ na cwiluiit'maⁿndye, nncue'ntyjo̱ na joona nnc'omna na jndoona sculjaa'ñeeⁿ. Nla'tyuii'na jom ndo' cha'cwijom nl'ana na nljoo'ñê na ñecasei'ñê. Nntquiina seiiⁿ'eⁿ ndo' nla'cona jom ñ'eⁿ chom. 17Ee s'aa Ty'o̱o̱ts'om naquii' n'omna na cal'ana cantyja na seijndaa'ñê hasta nntseicanda̱a̱'ñeñ'eⁿna' ñ'oom na tqueⁿtyeeⁿ. Jo' chii nnc'omna na ñecwii ñ'oom joona ndo' nñe'quiana najndeii na la'xmaⁿna nnom quioo'jndii. 18Ndo' juu sculjaa'ñeeⁿ na tco'na' na nty'ia' ma'mo̱ⁿna' tsjoom t'maⁿ'ñeeⁿ na maqueⁿna' xjeⁿ cha'tso nn'aⁿ na t'maⁿ cwiluiindye tsjoomnancue.

will be added

X\