Apocalipsis 15

1Quia jo' nty'iaya cwiicheⁿ 'naaⁿ t'maⁿ cañoom'luee na seicaty'uena' ja. Nty'iaya ntquiee' ángeles na cwilei'cho ntquiee' nnom nawi' na nntjoom nn'aⁿ. Joona' la'xmaⁿna' nawi' na macanda̱ ee quia na jnda̱ teinom cantyja 'naaⁿ joona', mana cwintycwii na matseiw'ii Ty'o̱o̱ts'om nn'aⁿ. 2Ndo' mati nty'iaya cwii na matseijomna' ndaaluee na jeeⁿ caxuee cha'na tsioo jnda'jom cha'cwijom too' chom. Jndye nn'aⁿ meintyjee' 'ndyoo ndaaluee'ñeeⁿ, jo' jo' nquiee nn'aⁿ na jnda̱ jnaⁿndye ñequio quioo'jndii, ñequio juu na jlui'tsjaaⁿ'ñeyo', ñequio número' na ma'mo̱ⁿna' xuee'yo'. Too' arpa lueena na jnda̱ tquiaa Ty'o̱o̱ts'om. 3Cwitana luantsa cantyja na tjei'n'maaⁿñe Ty'o̱o̱ts'om joona ñequio l'o̱ Moisés, tsaⁿ na ñejndi'ntjom nnoom, ndo' mati tana luantsa na cwila't'maaⁿ'ndyena Catsmaⁿ na tjei'n'maaⁿñê joona. Matsona': 'U Ta Ty'o̱o̱ts'om matsei'xmaⁿ'ñ'eⁿ' cha'tso nnom najnda̱. Jeeⁿ t'maⁿ ts'iaaⁿ mache', tjacantyja na ya joona'. 'U cwiluiindyu' na matsa̱'ntjom' cha'waa tsjoomnancue. Cha'tso cantyja 'naⁿ' matsei'xmaⁿ' na maty'iomyana' ñequio na mayuu'. 4'U Ta, tjaa'naⁿ ts'aⁿ c'oom na tinquiaa' 'u, ndo' tjaa'naⁿ ts'aⁿ c'oom na xocatseit'maaⁿ'ñe xue'. Ee mañenncu'cheⁿ' tseixmaⁿ' na lju' ts'om'. Cha'tso nn'aⁿ cwii cwii ndyuaa nñequiona na nla't'maaⁿ'ndyena 'u, nc'e na jnda̱ tjanty'ee ñ'oom cantyja 'naⁿ' na cha'tso na mache' maxjeⁿ maty'iomyana'. 5Jnda̱ teinom na nmeiiⁿ', quia jo' nty'iaya wats'om cañoom'luee, na jnda̱ jnaⁿ nacañoomticheⁿ yuu na m'aaⁿ nquii Ty'o̱o̱ts'om. Juu jo' yuu na tyola'we nn'aⁿ Israel ljo̱' na teiljeii ljeii naqui quia na tyolei'ñ'omna wats'omliaa. 6Ndo' jo' jo' jlui' ntquiee' ángeles. Cwilei'chona ntquiee' nnom nawi' na nntjoom nn'aⁿ. Cwee'na liaa lino na canchii', na jeeⁿ caxueena'. Ndo' cwii cwiindyena chu'tyeⁿ tsei'jndya cwii 'naⁿ na tuii ñ'eⁿ s'omcajaⁿ. 7Quia jo' cwii tsaⁿ'ñeeⁿ na ñequiee na cwita'ndo' tquiaa ntquiee' watso na tuiina' s'omcajaⁿ nda̱a̱ ángeles'ñeeⁿ. Joona' too'cheⁿ ñjom nawi' na jeeⁿ cwajndii na nntjoom nn'aⁿ ee juu Ty'o̱o̱ts'om na ñequii'cheⁿ na wando', matseiw'eeⁿ nn'aⁿ tsjoomnancue. 8Ndo' ndiocheⁿ yuu na m'aaⁿ Ty'o̱o̱ts'om seintyjana' ndioom nc'e na jeeⁿ neiⁿncoo' caxueeñê ndo' tjacantyja najneiⁿ. Meiⁿ tjaa 'ñeeⁿ juu nnda̱a̱ nncjaaquiee' jo' jo' hasta na jnda̱ teinom ntquiee' nawi' na nntjoom nn'aⁿ na cwilei'cho ntquiee' ángeles'ñeeⁿ.

will be added

X\