Apocalipsis 14

1Jnda̱ jo' nty'iaya na meintyjee' Catsmaⁿ xqueⁿ ta Sión. Ndo' ñeⁿ'naaⁿ' nacañom'm m'aⁿ cwii tmaaⁿ' nn'aⁿ na jndyendye. Tuee' cwii siaⁿnto meiⁿ waljoo' wen'aaⁿ nchoo' ñequiee meiⁿ joona. Ndo' cantaana jnda̱ teiljeii xuee' nquii Catsmaⁿ ñequio xuee' Tsotyeeⁿ. 2Ndo' jndiiya na c'uaa nandye cañoom'luee cha'cwijom c'uaa na maco'na' ndaa, oo cha'cwijom najndeii matseixuaa tsuee. Jo' jo' jndiiya na jndye arpa cwitjo̱o̱' nn'aⁿ. 3Cwitana cwii luantsa xco jo nnom tio na wacatyeeⁿ Ty'o̱o̱ts'om, ndo' jo nda̱a̱ ñequiee naⁿ na tando', ndo' jo nda̱a̱ ntquiuu nchoo' ñequiee nn'aⁿ na cwiluiitquiendye. Ndo' tjaa 'ñeeⁿ juu na nnda̱a̱ nntsei'naaⁿ' luantsa'ñeeⁿ, macanda̱ nquiee nn'aⁿ na cwii siaⁿnto waljoo' wen'aaⁿ nchoo' ñequiee meiⁿndye. Ee quii'ntaaⁿ nn'aⁿ tsjoomnancue, macanda̱ joona na jnda̱ tjei'n'maaⁿñe Ty'o̱o̱ts'om. 4Joo naⁿm'aⁿ tyoo'ndyena Ty'o̱o̱ts'om. Macanda̱ jom cwila't'maaⁿ'ndyena. Cwi'oontyjo̱na naxeⁿ' Catsmaⁿ meiⁿyuucheⁿ na wjaⁿ. Tioml'ua Ty'o̱o̱ts'om jnaaⁿna na tjeii'ñê joona quii'ntaaⁿ nn'aⁿ cha macanda̱ nla'xmaⁿna cwentaaⁿ'aⁿ ndo' cwentaa' juu na matseicajndyuna' Catsmaⁿ. 5Meiⁿcwii ñ'oom na cwe' cantu ticaljeii' ndyueena. Ndo' meiⁿcwii tyoola'tjo̱o̱ndyena nnom Ty'o̱o̱ts'om. 6Quia jo' nty'iaya cwiicheⁿ ángel na mantyja nandye cañoom'luee. Mañequiaaⁿ ñ'oom naya na m'aaⁿ ndo' m'aaⁿna' nda̱a̱ nn'aⁿ tsjoomnancue. Matseicañeeⁿ nn'aⁿ ticwii cwii tsjoomnancue, ñequio ticwii cwii ndyuaa nn'aⁿ, ñequio nn'aⁿ na ticwii cwii ñ'oom na cwichuii' na cwila'neiⁿ, ñequio nn'aⁿ na ticwii cwii nnom na tjachuii'ndye. 7C'uaa 'ñom matseineiiⁿ, tsoom: —Calcwi'yo' Ty'o̱o̱ts'om ñequio na nquia'yo' jom ee na jnda̱ tue'ntyjo̱ xjeⁿ na nncu'xeeⁿ nn'aⁿ. Cala't'maaⁿ'ndyo' nqueⁿ na s'aaⁿ cañoom'luee ñequio tsjoomnancue, ñequio ndaaluee, ndo' ñequio cha'tso nqueⁿljo' yuu na cwinaaⁿ' ndaa. 8Ndo' tjantyjo̱ cwiicheⁿ ángel na jnda̱ we naxeⁿ' ángel'ñeeⁿ. Matso: —Jnda̱ tyuii' tsjoom Babilonia. Jnda̱ tyuii' tsjoom t'maⁿ'ñeeⁿ. Ee nn'aⁿ tsjoom'ñeeⁿ jnda̱ jla'ndaa'na n'om nn'aⁿ ticwii cwii ndyuaa ñequio natia na cwil'ana na juu jo' matseijomna' cha'cwijom cwila'cwena nn'aⁿ winom cha candyee naⁿ'ñeeⁿ. 9Ndo' tjantyjo̱ cwiicheⁿ ángel na jnda̱ ndyee. Jndeii matseineiⁿ, matso: —Nty'iaa'ndye joo nn'aⁿ na cwila't'maaⁿ'ndye quioo'jndii tquiee ñequio juu na jlui'tsjaaⁿ'ñeyo'. Ndo' nty'iaa'ndye joo nn'aⁿ na tquiandye na tjacañoom ljeii cwentaa' quioo'jndii'ñeeⁿ cantaa oo luee. 10Naⁿ'ñeeⁿ maxjeⁿ jndei'na' na nncwena winom 'naaⁿ' Ty'o̱o̱ts'om na juu jo' ma'mo̱ⁿna' na matseiw'iiyayaaⁿ joona. Nntseicatom'm waso ñ'eⁿ winom'ñeeⁿ na meiⁿchjoo tjaa ljo' tjoom' nc'e na tyeⁿ waa na matseiw'eeⁿ. Ndo' t'maⁿ nlco'wi'na' joona naquii' chom ñequio sufra̱ na cwico. Joo ángeles na lju' n'om ñequio Catsmaⁿ nnty'iaana na wi' nntjoom naⁿ'ñeeⁿ. 11Tixocjaameintyjee' na cwi'oowa ndioom na maco'wi'na' naⁿ'ñeeⁿ. Meiⁿchjoo tixocata'jndyeena naxuee natsjom ee joona tyola't'maaⁿ'ndyena quioo'jndii tquiee ñequio juu na jlui'tsjaaⁿ'ñeyo' ndo' joona jñoom 'naaⁿ cantaana na ma'mo̱ⁿna' xuee'yo'. 12Jo' chii joo nn'aⁿ na maqueⁿ Ty'o̱o̱ts'om na lju' n'om macaⁿna' na tyeⁿ cwintyjee'na cantyja 'naaⁿ'aⁿ. Cala'canda̱na ñ'oom na matsa̱'ntjoom, ndo' tyeⁿ cala'yu'ya n'omna ñ'eⁿ Jesús. 13Quia jo' jndiiya na teic'uaa jndye na jnaⁿna' cañoom'luee. Tso no̱o̱ⁿ: —Luaa catseiljei': “Juu xuee na cwiwjaana', matio'naaⁿñena' joo nn'aⁿ na m'aⁿ cantyja 'naaⁿ' Ta Jesucristo na quia nncwje.” Majo'ti matso Espírtu Santo, ee cañoom'luee nta'jndyeena cantyja na ñejla'jnda̱na naquii' ts'iaaⁿ 'naaⁿ' Ty'o̱o̱ts'om. Ndo' wjaañ'eⁿ ñ'oom ñ'eⁿndyena na ma'mo̱ⁿna' cantyjati na ya na jnda̱ ñel'ana. 14Quia jo' nty'iannda'a ndo' ljei cwii nchquiu canchii'. Nacjoo' nchquiu'ñeeⁿ wacatyeeⁿ cwii na matseijomna' ts'aⁿ. Xqueeⁿ ñjom cwii corona na tuiina' ñ'eⁿ s'om cajaⁿ, ndo' t'ueeⁿ xjo carwato na ta̱a̱ 'ndyoo. 15Jnda̱ jo' jnaⁿ cwiicheⁿ ángel wats'om cañoom'luee. Jndeii seineiⁿ nnom nqueⁿ na wacatyeeⁿ nacjoo' nchquiu'ñeeⁿ. Tso: —Cwa, c'oom' xjo carwato 'naⁿ', catyjee' ntjommeiⁿ' ee jnda̱ tue'ntyjo̱ xjeⁿ na nntu'xeⁿndye nn'aⁿ na m'aⁿ tsjoomnancue. Ndo' joona matseijomna' cha'cwijom ntjom na jnda̱ tmaⁿ. 16Quia jo' jom na wacatyeeⁿ nacjoo' nchquiu'ñeeⁿ, tjoom'm xjo 'naaⁿ'aⁿ nnom tsjoomnancue chii tyjeeⁿ ntjom na niom nnom tsjoomnancue, jo' jo' nn'aⁿ jo'. 17Ndo' jnaⁿ cwiicheⁿ ángel wats'om cañoom'luee. Mati juu ñ'oom xjo carwato na ta̱a̱ 'ndyoo. 18Ndo' cwiicheⁿ ángel na tseixmaⁿ na mando' chom na ntyjo nomts'om jo' jo', juu jlui'nom ndo' jndeii seineiⁿ nnom juu ángel na maleiñ'oom xjo carwato. Tso nnom ángel'ñeeⁿ: —Cwa, c'oom' xjo ta̱a̱ 'naⁿ', catyjee' n'eiiⁿ uva l'o̱o̱ na meintyjee' tsjoomnancue, ee jnda̱ jnda̱a̱ ta̱. 19Quia jo' to̱' ángel'ñeeⁿ tjoom'm xjo carwato 'naaⁿ'aⁿ nnom tsjoomnancue. Seitjoom n'eiiⁿ uva l'o̱o̱ na meintyjee' jo' jo'. Tioom ta̱'ñeeⁿ ts'om cwii catsiuu' tsjo̱' yuu na nluii' ndaa'na'. Ts'iaaⁿ'ñeeⁿ ma'mo̱ⁿna' cantyja na cwajndii nntjoom nn'aⁿ na matseiw'ii Ty'o̱o̱ts'om joona. 20Jo nnom tsjoom tuii ts'iaaⁿ'ñeeⁿ na tyonchjeena uva'ñeeⁿ. Jo' jo' jluii' nioom nn'aⁿ hasta seijomna' cha'cwijom cwii jndaa niom'. Njoom m'aaⁿ niom' hasta tue'cañoomna' frenom ndyuee catso. Ndo' tquia tjanoomna', tuee'na' cha'na ndyee siaⁿnto kilómetros.

will be added

X\