Apocalipsis 10

1Quia jo' nty'iaya cwiicheⁿ ángel na waa najndeii na tseixmaⁿ. Jndyocueeⁿ na jnaaⁿ cañoom'luee. Cha'waañê wandi' nchquiu ndo' ntyjaty'io catsuu tsoom'naⁿ' jo ts'om xqueeⁿ. Caxuee nnoom cha'cwijom ñe'quioom', ndo' nc'eeⁿ cha'cwijom ntsaachom na teincoo. 2Cwii ts'o̱o̱ⁿ ndii' libro chjoo na jnda̱ n'meiiⁿ'. Tcoom'm x'eeⁿ ntyjaya nnom ndaaluee, ndo' x'eeⁿ ntyjatymaaⁿ' nnom tyuaatcwii. 3Jndeii seixuaⁿ cha'na matseixuaa liom. Quia na jnda̱ seixuaⁿ, quia jo' teic'uaa ndyuee ntquiee' ntsuee. 4Quia na jnda̱ teicheⁿ ndyuee ntquiee' ntsuee'ñeeⁿ, quia jo' seijndaa'ndyo̱ na nntseiljeiya ñ'oom na jluena, sa̱a̱ jndiiya cwii jndyee na teic'uaa cañoom'luee. Matso: —Ñ'oom na jndi' na jlue ntquiee' ntsuee'ñeeⁿ cwanty'iuu'ndyu' joona', tintseiljei'. 5Ndo' juu ángel na nty'iaya na meintyjee' nnom ndaaluee ndo' nnom tyuaatcwii, seiweeⁿ ts'o̱o̱ⁿ ntyjaya jo cañoom'luee. 6Tyeⁿ ñ'oom tjoom'm na cjoom'm na malcweeⁿ'eⁿ xuee' Ty'o̱o̱ts'om na tjaa yuu ntycwii na wando', nqueⁿ na s'aaⁿ cañoom'luee ñequio tsjoomnancue ñequio ndaaluee ñequio cha'tso nnom na niom jo' jo'. Luaa ñ'oomtyeⁿ na seineiiⁿ, tsoom: —Taxocwindoo'ti Ty'o̱o̱ts'om. 7Ee jnda̱ tue'ntyjo̱ xjeⁿ na juu ángel na jnda̱ ntquiee' nncjo̱o̱ⁿ'o̱ⁿ ntu 'naaⁿ'aⁿ. Xjeⁿ'ñeeⁿ matseicanda̱a̱'ñena' ñ'oom na ntyjii nquii Ty'o̱o̱ts'om. Majuu ñ'oom'ñeeⁿ na jnda̱ tqueⁿtyeeⁿ nda̱a̱ nquiee profetas na cwindye'ntjomtyeⁿ nnoom. 8Quia jo' juu na jndiiya na seineiⁿ cañoom'luee, seineiⁿnnda' no̱o̱ⁿ. Matso: —Cja'co'ñom' libro chjoo na mein'meiiⁿ' na ndii'na' ts'o̱ ángel na meintyjee' nnom ndaaluee ñequio nnom tyuaa. 9Jo' chii tjo̱ntyjaa'a ángel'ñeeⁿ, tsjo̱o̱ nnoom na nñequiaaⁿ libro chjoo'ñeeⁿ no̱o̱ⁿ. Tsoom no̱o̱ⁿ: —Luaa libro. Qui'ñom', cwa' juuna'. Nnts'aana' na jeeⁿ chi quii' 'ndyo' cha'cwijom tsiom' canty'i sa̱a̱ ts'om tsia' nnts'aana' na jeeⁿ ja. 10Quia jo' to'ño̱ⁿ libro chjoo'ñeeⁿ na ndii' ts'o̱ ángel, ndo' tcwaa'a juuna'. Ndo' quii' 'ndyo̱ s'aana' na chi ntyjii cha'cwijom tsiom' canty'i sa̱a̱ ts'om tsia jeeⁿ ja s'aana'. 11Quia jo' tso ángel'ñeeⁿ no̱o̱ⁿ: —Maxjeⁿ macaⁿna' na cwiicheⁿ cwii ndii' nntseineiⁿ' ñ'oom na ma'mo̱ⁿ Ty'o̱o̱ts'om njom'. Nñequiaa' ñ'oom chiuu nntjoom nn'aⁿ jndye ndyuaa, ndo' ñequio jndye nnom ñ'oom na cwila'neiⁿna ndo' nda̱a̱ nn'aⁿ na cwiluitquiendye nda̱a̱na.

will be added

X\