Apocalipsis 1

1Ñ'oommeiiⁿ tquiaa Ty'o̱o̱ts'om nnom nquii Jesucristo na jom ca'mo̱o̱ⁿ joona' nda̱a̱ nquiee nn'aⁿ na cwindye'ntjom nnoom. Ñequio 'ndyoo ángel cwentaaⁿ'aⁿ seica'mo̱o̱ⁿ ñ'oom'ñeeⁿ no̱o̱ⁿ ja Juan na mandi'ntjo̱ⁿya nnoom. Ee joo ñ'oommeiiⁿ cwila'neiⁿna' cantyja na jnda̱ teicandyoo' na nluii. 2Jo' chii mamacwji'yuu'ndyo̱ ñ'oommeiiⁿ na t'mo̱ⁿ Ty'o̱o̱ts'om no̱o̱ⁿ ñequio Jesucristo. Macwji'yuu'ndyo̱ cha'tsoti na tco'na' na nty'iaya ndo' na jndiiya. 3Matio'naaⁿñe Ty'o̱o̱ts'om juu ts'aⁿ na matsei'naaⁿ' ñ'oommeiiⁿ cantyja chiuu cwii nndyona', ndo' mati joo nn'aⁿ na cwindye ndo' cwila'we joona' naquii' n'om. Ee jnda̱ mawaa xjeⁿ na nluii cha'xjeⁿ na cwit'mo̱o̱ⁿ ñ'oommeiiⁿ. 4Ja Juan matseicwano̱ⁿ ñ'oommeiiⁿ nda̱a̱' 'o na cwiluiindyo' ntquiee' ntmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ na m'aⁿ'yo' ndyuaa Asia. Cato'ñoom'yo' naya na matseixmaaⁿ ñequio juu na tjañomtiuu na mañequiaaⁿ quii' ts'om ts'aⁿ. Nqueⁿ na m'aaⁿ ndo' m'aaⁿñê ndo' tyom'aaⁿ cwitjo̱o̱cheⁿ na nncuaa tsjoomnancue ndo' nncwjee'nnaaⁿ'aⁿ ndo' mati cantyja 'naaⁿ ntquiee' Espíritu na m'aⁿna jo nnom tio na wacatyeeⁿ. 5Ndo' mati quiaa Jesucristo na nla'xmaⁿ'yo' joo naya'ñeeⁿ. Jom cwiluiiñê na macwji'yuu'ñê ñ'oom na mayuu' nda̱a̱ya, ndo' jom ts'aⁿ najndyee na tando'xco na tue'. Cwiluiiñê na matsa̱'ntjoom cha'tsondye nn'aⁿ na cwiluiitquiendye nda̱a̱ nn'aⁿ tsjoomnancue. Nqueⁿ na jeeⁿ candya' ts'oom jaa ndo' ñequio nioom'm na tcwe' tmaaⁿ jaa jnaaⁿya na waa. 6Jnda̱ tqueeⁿ jaa na t'maⁿ cwiluiindyo̱ na m'aaⁿya nacje 'naaⁿ' Ty'o̱o̱ts'om. Ndo' tqueeⁿ na cwiluiindyo̱ ntyee na cwindya̱'ntjo̱o̱ⁿya nnom Ty'o̱o̱ts'om na juu cwiluiiñe Tsotyeeⁿ. Catseit'maaⁿ'ñena' jom ndo' caluiit'maⁿñê cantyjati najndeii na matseixmaaⁿ cha'waati na yo. Amén. 7Queⁿ'yo' cwenta, manncwjee'cañoom Cristo ñequio nchquiu. Ndo' cha'tsoti nn'aⁿ nnty'iaa jom, ndiñ'eeⁿ nn'aⁿ na jla'jomndye na tueeⁿ'eⁿ. Ndo' cha'tso ntmaaⁿ' na cwii cwii nnom nn'aⁿ, jndeii nla'xuaana na chjoo' n'omna quia na nnty'iaana jom. Maxjeⁿ nntseicanda̱a̱'ñena' na ljo'. Amén. 8“Ja cwiluiindyo̱ Alfa ñequio Omega. Ja maxjeⁿ m'aaⁿya najndyee ndo' na macanda̱.” Luaa' matso nqueⁿ na matsa̱'ntjoom cha'tso. Nqueⁿ na m'aaⁿ ndo' m'aaⁿ ndo' maxjeⁿ ñet'oom ndo' nncue'ntyjo̱ na nncwjee'cañoom. Nqueⁿ na cwiluiiñê na cha'tso najndeii matseixmaaⁿ. 9Ja Juan na cwiluiindyo̱ nn'aⁿ'yo' tjom na cwiwino̱o̱ⁿya nawi' ñ'eⁿndyo', ndo' tjom na cwitue'ndyo̱cja̱a̱ya nnom Ty'o̱o̱ts'om. Ee nquii Jesucristo mañequiaaⁿ na tjom m'aaⁿya na ticatiom n'o̱o̱ⁿya. Ja tyom'aaⁿjnaⁿya ndyuaaxeⁿncwe na jndyuna' Patmos nc'e na tyoñequia ñ'oom' Ty'o̱o̱ts'om ndo' na tyocwji'yuu'ndyo̱ cantyja 'naaⁿ' Jesús. 10Juu xuee na cwila't'maaⁿ'ndyo̱ nqueⁿ na cwiluiiñê na matsa̱'ntjoom jaa, m'aaⁿya nacje 'naaⁿ' Espíritu Santo ndo' t'mo̱o̱ⁿ cwii na tco'na' no̱o̱ⁿya. Jndiiya na jndeii teic'uaa na seineiⁿ ts'aⁿ jo naxa̱ⁿ'a cha'cwijom jndyee' ntu. 11Tso no̱o̱ⁿ: —Ja maxjeⁿ m'aaⁿya najndyee cwii tjo̱o̱cheⁿ na nncuaa tsjoomnancue ndo' jo̱m'aaⁿtya̱ya meiiⁿ na tacuaana'. Cwa, catseiljei'tcuundyu' cantyja na manty'ia' njom'. Catsa' libro, ndo' catseicwanom' juuna' ndyuaa Asia ntquiee' tsjoom na m'aⁿ ntmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ. Cjaana' tsjoom Éfeso, Esmirna, Pérgamo, Tiatira, Sardis, Filadelfia, ñequio Laodicea. 12Quia jo' taqua̱ⁿxa̱ⁿ'a cha ya nnty'iaya 'ñeeⁿ juu matseineiⁿ ñ'eⁿndyo̱. Ndo' quia na jnda̱ taqua̱ⁿ, nty'iaya ntquiee' xjo s'om cajaⁿ na cwicañjoom' nlca. 13Xcwe quii'ntaaⁿ ncjo'ñeeⁿ nty'iaya meintyjee' nqueⁿ na matseijomna' cha'cwijom ts'aⁿ jom. Cweⁿ cwii liaatco xjeⁿ nomtyuaacheⁿ. Ndo' tsei'jñaaⁿ chu'tyeⁿ cwii 'naⁿ na tuii ñ'eⁿ s'om cajaⁿ. 14Sooxqueeⁿ canchii'na' cha'cwijom soo' catsmaⁿ canchii', ndo' cha'na canchii' tsaaⁿ. N'omnnoom xueena' cha'cwijom chom. 15Nc'eeⁿ caxueena' cha'na colo na matseixmaⁿ s'om wee quia na je'ndyo jlui'na' naquii' chom, ndo' seilju'ya ts'aⁿ juuna'. Ndo' c'uaa na matseineiiⁿ cha'cwijom c'uaa quia na cwicwjee' jndaa. 16Ts'o̱o̱ⁿ ntyjaya too'ndye ntquiee' cancjuu ndo' quii' 'ñom macalui'nom cwii xjo na we ntyja ta̱a̱. Ndo' jeeⁿ caxuee nnoom cha'na xueeñe ñe'quioom' na quiajmeiⁿ'. 17Quia na nty'iaya jom, tioondyo̱ jo nc'eeⁿ cha'cwijom ts'oo ja. Ndo' teicaljoom ts'o̱o̱ⁿ ntyjaya nacjoya, tsoom no̱o̱ⁿ: —Tinty'ue'. Ee maja na m'aaⁿya najndyee cwii tjo̱o̱cheⁿ na nncuaa tsjoomnancue ndo' jo̱m'aaⁿtya̱ya meiiⁿ na tacuaana'. 18Ja cwiluiindyo̱ na wando̱'a. Ndo' meiiⁿ na jnda̱ t'io̱ sa̱a̱ je' m'aaⁿya na ticantycwii na wando̱'a. Cha'tso nn'aⁿ na cwiwje m'aⁿna nacje 'naⁿya ndo' mati Hades yuu meindoo' l'oo. 19Cwa catseiljei' cha'tso na maco'na' njom' na manty'ia', ñequio cha'tso na nlco'na' nnty'ia' na cwiluii je' ndo' na cwii nncjaaluii. 20Je' nntsjo̱o̱ ljo' ma'mo̱ⁿ ñ'oom wanty'iuu'waa cantyja 'naaⁿ ntquiee' cancjuu na nty'ia' na too'ndye ts'o̱o̱ ntyjaya, ndo' ntquiee' xjo s'om cajaⁿ na cwicañjoom' nlca. Joo ntquiee' cancjuu'ñeeⁿ, jo' jo' ntquiee' ángeles na cwil'a cwenta ntquiee' ntmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ. Ndo' joo ntquiee' xjo s'om cajaⁿ na cwicañjoom' nlca, jo' jo' ntquiee' ntmaaⁿ' naⁿ'ñeeⁿ na la'xmaⁿ cwentaa' Ty'o̱o̱ts'om.

will be added

X\